UBND n’gor Dak Lak mhe ƀư Tâm nchră n’glôch jêh 20 năm pah kan mât ndray n’hanh ntik n’hao drăp ndơ văn hóa chĭng gong (2005–2025), rƀŏng tât năm 2030. Bar rach năm aơ, văn hóa chĭng gong dơi mât ndray đah ăp trong ƀư rdâk tay nău way ơm, mât kơn ăp rmôt chĭng gong, pơk jrô trêng nti an druh ndăm, nkơnh n’hơ drăp ndơ ơm yău ntlơi an tay lam ntŭr neh, nkre mât ndray n’hanh hun hao pâl nđaih văn hóa.

Êng ta Dak Lak, 20 năm aơ, n’gor hŏ phăt 214 bor chĭng n’hanh rlău 1.140 blah bok ao cheh tanh; pơk 26 jrô trêng nti ndơ uh goh, mpât mprơ, ot ndrong; rgum nchih, rdâk tay ăp nău chĭng gong way ơm bah nuĭh Rđe, Bu Nong; ntăm an n’hanh ƀoi tĭng ntăm an săk ntơ Nghệ nhân ưu tú an 45 nuĭh hăr blău. Tĭng wa Đào Mỹ, Groi Kruanh UBND n’gor Dak Lak, ma trong tâm nchră, n’gor nchih nkah âk nău rgop, mbơh lư geh rnoh khlay gay mât ndray, ntik n’hao lơn đŏng drăp ndơ ơm yău văn hóa chĭng gong.