Trong link nău nchih gâl 2 pơk ta  aơ: https://cms-vov4.vov.vn/mnong/nkoch-nau-ueh-blau-tam-nau-reh-van-hoa/ak-nau-nchih-reng-hvi-ap-nau-bu-ueh-nau-nchih-2-rdak-bu-tay-trong-mur-ndram-dak-456656.vov4

Du rơh, nău roh hêng chĭng gong, nô nău rgum rvăt ndah rup môch blang, rgum joi ăp ntil  ndơ uh goh … hŏ jêng ntêr lĕ ăp drăp ndơ ơm yău ntlơi an tay văn hoá khlay bah ăp rnoi nuĭh ta Tây Nguyên. Măt êng tă bah rgâl trong kan tuch tăm, dŏng ăp ndơ ntrŭp dŏng têh uĕh mhe jêng ăp ndơ dŏng rêh, tuch tăm, nchron pănh way bên bah nuĭh Rđe roh hêng đŏng, mô dơn nê geh ntil ndơ mô hôm geh nha tâm nău rêh ăp nar đŏng. Yơn đah Nghị quyết mpeh “Mât ndray n’hanh ntik n’hao săk tơm văn hóa rnoi nuĭh tâm n’gâng kan rdâk njêng n’hanh mât njrăng neh dak bah “bah Thị uỷ Buôn Hồ, n’gor Dak Lak, âk nău kan geh nkô̆ khlay hŏ n’hanh dôl ntik n’hao săk tam ngăn ngăn.

Rdâk tay ndrâm dak, rdâk njêng nkual văn hóa, jay rot n’hanh jay pla n’hơ ta buôn K’Li A, phường Đạt Hiếu bah thị xã Buôn Hồ lah ƀư jêng ngăn ngăn nău “Mât ndray n’hanh ntik n’hao săk tơm văn hóa rnoi nuĭh tâm  n’gâng kan rdâk njêng n’hanh mât njrăng neh dak”. Nău nkoch lơn ma jêng khuh n’gôr, rlay kah nău uănh khlay, mât ndray văn hóa rnoi nuĭh rnôk kruanh UBND thị xã Buôn Hồ geh siƀŭt njuăl: rgŏ jă ăp mpôl, ăp nuĭh rong an ăp ndơ ơm yău, rup gui, ndơ ơm yău kăl e geh tât rnôk rdâk njêng n’hanh hun hao thị xã Buôn Hồ. Lĕ rngôch ăp ndơ ơm yău dja mbra jao tay an ntŭk pla n’hơ bah buôn K’Li A.

“Gâp  lah nuĭh Rđe. Gâp rong ani mpăl juh mbrăch. Aơ lah ndơ dŏng ơm geh bah kăl e, way dŏng tâm nău rêh ăp nar. Aơ lah ndơ ma u che gâp ntlơi an tay. Gâp ŭch n’gân păng trôm jay pla n’hơ gay lĕ rngôch ăp nuĭh saơ n’hanh nkah tay văn hóa rnoi nuĭh he.”

Mhe aơ nơh lah nău bah che Y Xuân Ayun, 71 năm deh, nai ntĭm rlu ranh aƀaơ dôl gŭ rêh ta buôn Kwăng, xã Cư Bao. Wa Y Xuân nkoch, rnôk hôm hăn ntĭm  kon se, păng way đă kon se nuĭh Rđe ân tâm ôp, tiăr nti nău ngơi, chữ nchih bah rnoi nuĭh he. Aơ  lah nkô̆ nău gĭt blău văn hoá bah rnoi nuĭh he. Dŭt rngot yor aƀaơ geh âk nuĭh dơi nti n’hanh jêng cán bộ, yơn khân păng mô ngơi n’hanh mô nchih dơi nău me deh he nơm. Ta buôn Kwăng, xã Cư Bao, wa Y Khuê Ayun nkoch: ntơm nơh rnăk păng geh âk chĭng yăng, glah kông đŏng. Yơn geh ndơ ri an bu, geh ndơ hŏ tăch hôm. mĭn mbro, wa Y Khuê sơch du ndơ dŏng di măt đŏng.

“Gâp rong an du mpăl rnăy peh phe ba ma si. gâp mpŏng jêh aơ tay rơh mom ndăm uănh saơ n’hanh mbra gĭt wât lơn ăp ndơ  dŏng dêh bên bah u che he. Mpăl dja hŏ geh bah dŭt ơm ngăn, nklăp 100 năm hôm. Mpăl dja nuĭh Rđe dŏng gay peh phe ba, juh rnih.”  

Yuh H'Nghin Niê, Bí thư chi bộ buôn Krưm B, xã Cư Bao, an gĭt: Ta rơh hop bah chi bộ, ăp đảng viên nuĭh Rđe tâm nchră khuh n’gôr n’hanh tâm ban ŭch nău mĭn: rong an ăp ndơ nha hôm geh, ndơ dŏng rêh way ơm lah trong ƀư gay ăp ndơ nê dơi mât ndray uĕh lơn đŏng. Rnôk ăp ndơ ma he rong an dơi pla n’hơ,  dơi âk nuĭh uănh saơ lah nău n’hao  êng săk nơm đŏng.

“Chi bộ buôn rgŏ jă ăp đảng viên rong an ăp ndơ hôm nha geh. Nê lah ndơ dŏng rêh, ndơ nchron pănh, ăp ntil ndơ uh goh, yăng gri ơm yău, n’glah kông ơm yău gay mât ndray an kon său he jêh aơ tay saơ, gay mô chuêl roh ăp ndơ dŏng u che he way dŏng. Kăl e  nơh du mblâm glah mô lah du yăng ndrănh ân rgâl ma 1 mô lah 2 mblâm rpu”.

Hŏ geh 11 mpôl kan, đơn vị n’hanh 34 nuĭh rong an 60 ntil ndơ. Bah ndơ  dŏng rêh way bên, ndơ nchron pănh, tât ăp ntil ndơ uh goh…tâm nê geh ăp ntil ndơ dŭt geh rnoh khlay kơt: yăng, glah kông, chĭng gong ơm yău. Wa Nguyễn Văn Tài, Kruanh Jrô  kan Văn hóa Thông tin n’hanh Thể thao thị xã Buôn Hồ an gĭt: đơn vị dôl ƀư tâm  pă ntil, uănh năl jŏ năm gay njêng siƀŭt mbơh an gĭt na nê̆ tĭng ntil ndơ nha hôm geh.

“Jrô kan Văn hoá n’hanh Thông tin dơn ăp ndơ nha hôm geh mât bah ăp nhih pah kan, đơn vị, mpôl kan, cán bộ, công chức, tĭng nuĭh ƀon lan bah nsum mpôl rong an gay n’glăp mât ndray n’hanh geh trong nchrăp pla n’hơ”.

Nkhêp nkah ndray tâl 134 năm nar deh Kruanh Hồ Chí Minh 19/5 mhe aơ, Ban Thường vụ Thị ủy Buôn Hồ hŏ ƀư tâm nchră way nkô̆ “Sol uănh êng săk  nơm, nkra êng tâm nău mât ndray n’hanh ntik n’hao săk tơm văn hóa ăp rnoi nuĭh ta thị xã”. Ta tâm nchră dja, kruanh thị xã hŏ  mpư n’hao n’hanh ndơ̆ siƀŭt kơp dơn ăp nsum mpôl, ăp nuĭh hŏ rong an ndơ nkah ndray. Wa Nguyễn Thị Thu Nguyệt, Bí thư Thị uỷ Buôn Hồ, lah rjăp:

“Năm 2024 dja thị xã hŏ ƀư tâm nchră “Sol uănh êng săk  nơm, nkra êng tâm nău mât ndray n’hanh ntik n’hao săk tơm văn hóa ăp rnoi nuĭh ta ntŭk”. Đảng bộ hŏ geh nghị quyết way nkô̆ na nê̆, kuăl jă ăp tơm ndơ gay hun hao thị xã, hun hao ntŭk  ntô ndơ dŏng, ăp trong tĭng văn hoá. Bah nê, nău dơn kan bah ăp mpôl kan Đảng bah ăp đảng viên dơi n’hao dŭt kloh, đah âk nău kan ngăn ngăn.”

 Jay pla n’hơ bah buôn K’Li A mbra pơk ngăn mpông wơt năch tât lăp uănh pâl tâm khay 11 năm 2024 dja, di tâm rnôk Dak  Lak ƀư nkah ndray 120 năm njêng n’gor. Ăp nău kan geh nău tam ngăn ngăn, tŏng đah nău ŭch rŏng mpŏng geh tâm di bah ăp rơh kơn ƀon lan hŏ n’hanh dôl ring lam ƀon lan ăp rnoi nuĭh. Đảng bộ, n’gâng kan thị xã nsrôih đah nău ŭch tât: năm 2025 Buôn Hồ mbra jêng đô thị ntil III- du nkual ƀon têh “Ndrŏng uĕh, rsach se, nđĭr uĕh, geh nău tâm rŏng”