Lơ 1/12/1945 di nar 27/10 năm Ất Dậu, rnôk mhe tât ta nkuăl ƀon têh Buôn Ma Thuột rĭ ntŭk kan geh tahen Pháp rdul lơh ndal, ƀư an 100 tahen khĭt n’hanh geh âk nuĭh ƀon lan dŭt âk lah bu ranh, bu ur, oh kon se ta ƀon Lạc Giao lĕ khĭt. Ba kơi tay nuĭh ƀon lan ta ntŭk sŏk nar 27/10 âm lịch ăp năm ƀư nar kahgĭt nar khĭt an ăp tahen n’hanh ƀon lan ta aơ. Ta rơh kahgĭt, ăp đại biểu lĕ mpoh su nhang n’hanh nkah tay nău nkoch ta lơ 27/10 năm Ất Dậu -1945, mpơl nău lah ueh, ryơk n’hao đah nău khĭt ji bâh ăp rơh hăn ba năp. Nkah đah ƀon lan, ngăn lah rơh mom mpeh nău way “Ngêt dak kahgĭt tu”, bâh nĕ n’hao nău gĭt vât, nău dơn kan ta rơh rdâk njêng n’hanh mât đăp mpăn neh dak.