Lễ hội Cà phê Buôn Ma Thuột tâl 9 năm 2025 mbra ƀư di rnôk nkah ndray 50 năm rklaih luh Buôn Ma Thuột 10/3/2025, mbra lah rnôk gay wăch rgum năch rlong uănh gĭt tât ăp ntŭk pâl nđaih tuch tăm uĕh êng. Nkoch mpeh săk geh hun hao pâl nđaih nkre đah rlong joi gĭt văn hoá cà phê, wa Nguyễn Thiên Văn, Groi Kruanh UBND n’gor Dak Lak lah rjăp aơ lah du trong rƀŏng hăn khlay kơl n’hao rnoh khlay wăng sa n’gâng kan cà phê bah n’gor.

Jêng, n’gor dôl rgum ntop kơl ăp trong leo ƀư mât chăm cà phê jŏ jong, nkre đah hun hao pâl nđaih rlong uănh saơ gay nkre mât ndray săk tơm văn hóa, nkre n’hao nău geh wăng sa an nuĭh ƀon lan. Dak Lak mbra ntuh kơl tay tâm ntŭk pâl nđaih ta ăp nkual tăm cà phê rgum tơm, ntrŭt nsôr tâm boh đah ăp doanh nghiệp n’hanh nuĭh ƀon lan gay rdâk njêng ăp ntŭk pâl nđaih uĕh êng.