Lễ hội Katê năm 2025 bah ƀon lan Chăm ta n’gor Khánh Hòa n’hanh Lâm Đồng mbra ƀư ntơm bah nar 20 tât 23/10 tât ta nkual đền tháp Chăm. Ăp nar rlău aơ, tiăr nti njroh mprơ khuh n’gôr lam ăp ƀon lan Chăm. Ăp ƀon hăr blău ti kan njêng ăp ndơ geh ƀư mhe tĭng nău nchăm đă bah năch. Lĕ rngôch ƀư an khay Katê năm aơ tâm ban kơt tât ơm lơn, rhơn mƀak lơn.

Yuh Nguyễn Thuý Linh, nuĭh tơm quán Coffee&homestay Hoa Sứ ta thôn Hữu Đức, xã Phước Hữu, n’gor Khánh Hoà hŏ lĭr yông uĕh tay 2 jrô nkah ndray an năch pâl nđaih tâm nar lễ hội Katê. Quán pla n’hơ tay ăp ndơ geh ƀư ntĭt êng bah n’gor, kơt: dak mắm, vang nho, puăch rpu 1 nar ih, djăr mƀơk mât tâm mir n’hanh ăp ndơ geh ƀư bah bok cheh tanh Chăm lah dŭng cheng, dŭng yar, ao khoác...

 Gay njêng mông nar rhơn mƀak an nar Katê, xã Phước Hữu hŏ rgum bơi pe rhiăng kon se nti, druh ndăm n’hanh bu ur tât bah ăp thôn tâm xã râng njroh mprơ. Bol trôk nar mô sơh uĕh yơn mông nar tiăr nti ta tach chưng play thôn Hữu Đức nha hôm khuh n’gôr n’hanh lĕ n’hâm suan đŏng. Yuh Nguyễn Thuý Linh an gĭt:

"Tâm ăp nar rlău aơ, ăp oh yuh bu ur tâm thôn rgum ƀư mpôih kuaih kloh uĕh ntŭk gŭ rêh ta ăp njăr trong ƀon, hôm ăp kon se nti dăp rgum êng mông nti gay kêng măng sĭt râng nti văn nghệ, gay tât nar Katê râng tâm rmôt wơt dak Y trang. Hôm ta ăp rnăk mât srăch uĕh, mprĭp tay uĕh nhih jay, nchrăp bánh play đŏng, lơn lah bánh way ơm bah nuĭh Chăm. Bah meng nê, saơ âk ƀon lan Chăm êng rgum nti rmôt njroh mprơ tâm ƀon lan đŏng, tâm nê geh nău ntuh kơl ƀư mhe ăp nău njroh mprơ, uănh uĕh ngăn. Ăp năm bah năp nơh dơn geh bar pe ƀon ƀư dơm, năm aơ ƀư du rơh dĭl".)

   Ndrel tiăr nti njroh mprơ, ăp nar rlău aơ, ăp nuĭh bah Hợp tác xã Gốm Chăm Bàu Trúc rgum lĕ rngôch gay ƀư luh âk ndơ mon uk năn rhŏ an năch pâl nđaih tâm khay Katê dja.

   Wa Phú Hữu Minh Thuần, Giám đốc Hợp tác xã Gốm Chăm Bàu Trúc, xã Ninh Phước, n’gor Khánh Hòa an gĭt, aƀaơ rĭng ăp nar geh rlău 1.000 tơ̆ năch tât uănh pâl ƀon mon uk Bàu Trúc rlong uănh saơ n’hanh rvăt ndơ. Năm aơ, hợp tác xã hŏ nănh ntuh kơl rdâk njêng tay nkual pla n’hơ uk Chăm Bàu Trúc. Ndơ ƀư mô dơn lah ntŭk nkoch mbơh rsang rnglăy nău  kan mon uk way ơm ma hôm lah ntŭk gŭ rêh văn hóa Chăm săk ntơr uĕh, nkre đah nchreng an uănh ndơ uh goh rnoi mpôl đê̆, njroh mprơ way ơm, kơl năch wât lơn mpeh nău rêh, nău way ơm n’hanh nău nsrôih mât ndray săk tơm văn hóa bah nuĭh Chăm. Wa Thuần an gĭt tay:

"Năm aơ năch dŭt mpưm, yor kơt nê̆ ma HTX ƀư tay jay pla n’hơ gay rhŏ dŏng an năch tâm khay Katê dja. Lah năch geh nău ŭch ri mbra geh rmôt mbơh rblang ta ntŭk dĭl, rlong uănh saơ tâm ban kơt nchreng an uănh ndơ uh goh way ơm bah nuĭh Chăm gay rhŏ dŏng an năch. Rnôk n’gor Khánh Hoà mhe dơi njêng ri nklăp rnoh năch mbra hao âk, yor nkoch trêng nău lư buăt nthoi dơi đah n’gor Ninh Thuận ơm n’hanh n’gor Khánh Hoà mhe, yor kơt nê̆ ma rêng lam hvi lơn".)

   Hôm ta n’gor Lâm Đồng, ăp nar dja, ăp ntŭk têl ơm yău kơt: Đền thờ Pô Nit ta xã Bắc Bình, đền thờ Pô Klaong Mơ-nai ta xã Lương Sơn, Kho pơk Hoàng tộc Chăm ta xã Hồng Thái, ƀon lan hŏ dơi mpôih kuaih srăch uĕh n’hanh yông cờ ta rnăk wâl. Lơn lah, ta tháp Pô Sah Inư ta phường Phú Thuỷ, n’gor Lâm Đồng mbra geh nău tât râng bah 9 xã geh âk ƀon lan Chăm đah âk nău kan văn hoá dơi ƀư, lah: nchreng an uănh mbuăt Saranai, tâm rlong peh phe, tâm rlong rduăl dak chuat rlău ndơ nking kol, ndơ pâl put măt mbang glah uk n’hanh nchreng an uănh ƀư mon uk way ơm, cheh tanh bok Chăm, lơn lah nkual pla n’hơ ndơ sa Chăm.

  Wa Trần Đức Dũng, Kruanh Ban mât uănh ntŭk têl ơm yău tháp Pô Sah Inư an gĭt:

“Pah kan nchrăp aƀaơ hŏ dơi an ƀư sĭt tât tâm dâng đŏng. Năm 2025 lah năm lor bôk năp ma lễ hội Katê dơi ƀư lôch rnôk n’gor Lâm Đồng mhe dơi njêng. Ăp nău kan êng ƀa ƀă bah lễ hội nha hôm tĭng nău way ơm n’hanh chroh rƀŭn bah ƀon lan nuĭh Chăm đŏng, hŏ dơi rdâk tay n’hanh ƀư tâm bah ri aơ ta ntŭk têl ơm yău tháp Pô Sah Inư. Bah meng nê, mpôl hên ƀư du đêt nău kan mha êng lơn lah gâl pâl rlưn gay rhŏ dŏng năch rnôk hăn tât uănh pâl, rlong uănh saơ”.

 Katê lah lễ hội way ơm ăp năm bah ƀon lan Chăm. Aơ mô dơn lah rnôk gay nuĭh Chăm mpơl nuih n’hâm nkah gĭt u che yău ye, mpư n’hao ăp brah yang huêng khlay, ma hôm lah nău ntĭt uĕh bah nău rêh văn hóa, tĭng nău way n’hanh  nuih n’hâm tâm rnglăp lam ƀon lan. Bah ăp khay lễ hội, ăp rnoh khlay văn hóa Chăm săk ntơr êng dơi mât ndray tay, rêng lam, rgop ƀư jêng âk mpưm tay păng rup văn hóa âk săk ntơr n’gor Khánh Hòa n’hanh Lâm Đồng. aơ lah rnôk gay nkơnh n’hơ văn hóa Chăm tât đah năch tâm n’hanh bah dih dak, rgop hun hao n’gâng kan pâl nđaih bah ăp ntŭk nâp dăng./.