Wa  Nguyễn Thái Tường Vân, Giám đốc N’gâng kan Văn hóa, Thể thao n’hanh pâl nđaih n’gor Lâm Đồng jă râng mpôl hăn uănh ăp ntŭk pâl nđaih, ntŭk ơm yău kăl e-Văn hóa, ndơ ngêt sa, nău rhŏ pâl rlưn... ntoh lư ta 3 nkual: Múi Né, Đà Lạt n’hanh Gia Nghĩa. Na nê̆, rmôt lĕ hăn uănh ntŭk ngih dak Bàu Trắng, Bảo tàng Nước Mắm n’hanh uănh bôk nău ƀư Fishierman Show (Mũi Né) Delight Park Đà Lạt, XQ Sứ quán; ntŭk pâl nđaih Lang Biang Land n’hanh bôk nău ƀư nghệ thuật “Bừng sáng vùng đất hùng vĩ” (Đà Lạt); Nkual pâl nđaih Tà Đùng, Làng sinh thái Eva Vilage, Jay mpla nsơ chĭng gông (Gia Nghĩa),... Đah wa Vân, ăp ntŭk aơ nsĭt tay âk nău ƀư ngăn tŏng ăp:

Mpeh Phan Thiết (ơm), gâp saơ bôk nău ƀư Fisherman Show dŭt uĕh ma nuĭh ƀon lan Việt Nam mô hŏ gĭt tât. Mpôl hên tât Đà Lạt ri geh ăp ntŭk mhe, nkre ndâk ƀư n’hanh jêh tâm ăp khay mhe rlău. Gâp dŭt ŭch ăp bôk nău ƀư aơ mbra nsĭt tay an năch pâl nđaih âk nău uĕh, Săk gâp lĕ ƀư tâm nău kan pâl nđaih 29 năm uĕh ngăn đah ăp bôk nău kan mhe rlău.

Hôm wa Hoàng Công Định, Giám đốc Công ty Dima-tour mĭn lah, n’gor Lâm Đồng mư lah ntŭk pâl nđaih, rgum tŏng ăp nkô̆ nău kơt yôk bri, n’glău têh, dak lêng pŭt n’hanh gôl dak uĕh. Yor rĭ, nău moh êng pâl nđaih mbra pơk têh hvi lơn. Ta năp nău geh nĕ, ăp doanh nghiệp mbra ndâk ƀư ndơ ăp nkual ndơn yor tăch tour trong jêt chrai. Na nê̆ lah ƀư ăp ndơ pâl nđaih kơt dak lêng pŭt, yôk nor prêh n’hanh hăn uănh ăp tour nsum mpôl ta Dak Nông (ơm). Bôl geh âk nău dơh, yơn tĭng wa Định, Nău ntung trong dôl lah ntŭk kol an nău tâm rgop nkual đah Mũi Né, Đà Lạt n’hanh Gia Nghĩa.

Bah rnôk nglăp nsum, mpôl hên lĕ ƀư your Mũi Né n’hanh Đà Lạt ƀa ƀơ, yơn dôl in tât nău ndơ̆ Dak Nông (ơm) yor gung trong n’hanh năch pâl nđaih mô hŏ ŭch nău hăn bah Mũi Né hao Dak Nông lĕ 10 mông. He dơi ƀư jêng trong n’gleh lơn, mô lah bah kơi aơ rnôk Mũi Né hun hao geh tach ndeh păr mbra ndơ̆ năch bah Mũi Né hăn Đà Lạt, n’hanh Đà Lạt jŭr Dak Nông mbra ngăch lơn.

Đah nău geh ơm, drăp ndơ âk, n’gor Lâm Đồng dôl mĭn lah jâng nsan ntŭk tât geh âk êng. Yơn lah, gay hăn ndrel đah ăp ndơ, nău rhŏ, ntŭk tât pâl nđaih ta ăp ntŭk jêng ndơ pâl nđaih uĕh nâp, geh nău tâm rlong âk lah nău n’gluh an nuĭh mât uănh n’hanh ăp nuĭh ƀư pâl nđaih. PGS.TS Phạm Thị Huyền-Đại học kinh tế Quốc dân Hà Nội ntĭt nsa: “Lâm Đồng aƀaơ mô knŭng geh 1 mô lah 2 yan, ma geh tât 4 yan”. M’hâm ƀư gay joi du ntŭk têh, ntŭk nsum, gay rnôk năch pâl nđaih tât  đah Lâm Đồng geh nău ƀư ngăn tŏng ăp.

Nău ma Lâm Đồng (mhe) mbra ƀư nĕ lah rgum nsum geh lĕ rngôch ăp ndơ he geh tâm du nău mbơh gay nkoch tay tât năch pâl nđaih. Êng gâp an lah tung trong aƀaơ bah Lâm Đồng mô hŏ boăt nthoi du trong rjăp ndrel, ƀư dơi boăt nthoi pâl nđaih đah 3 ntŭk ơm hôm dŭt đêt. An m’hâm ƀư gay geh du Lâm Đồng ngoăy dơm, ndơn yor geh 3 Lâm Đồng kơt aƀaơ.

Gay mkra nău ntung trong boăt nthoi ăp nkual pâl nđaih ta ntŭk, Lâm Đồng dôl dăn đă Trung ương ndơ̆ tâm dăp rgum trong têh hăn ngăch Đông-Tây boăt nthoi Phan Thiết-Bảo Lộc-Gia Nghĩa. wa Phạm Văn Mạnh, Groi Giám đốc N’gâng kan Xây dựng n’gor an gĭt:

Aƀaơ, N’gâng kan Xây dựng dŭt kơl nău aơ. Êng đah nkra trong boăt nthoi bah Gia Nghĩa hăn Di Linh n’hanh Quốc lộ 28B, ri aƀaơ Quốc lộ 28B dôl dơi ntuh kơl nkra uĕh; trong bah Di Linh sĭt Gia Nghĩa dôl dăn đă Trung ương ndơ̆ prăk jŏ jong gay nkra tay. Ta năp măt, mpôl hên đă n’gor pă an prăk nkra an dơh hăn, dơh an năch pâl nđaih.

Ndrel đah nău ntuh kơl ndâk ƀư ntung trong, nău kan pâl nđaih Lâm Đồng dôl ndâk ƀư trong hăn du trong têh pâl nđaih lĕ rngôch, nâp nâl n’hanh mhe. Wa Nguyễn Văn Lộc, Giám đốc N’gâng kan văn hóa, Pâl nđaih n’gor Lâm Đồng an gĭt, nău kan pâl nđaih lĕ geh trong nchrăp mbơh ƀư nău geh n’hanh ăp nău dơh nkôp đah bah n’gor lâm Đồng ta rup ndah pâl nđaih bah lam dak.

Mpôl hên mbra ƀư âk nău ƀư ngăn, du ntŭk tât 3 nkual ta ntŭk Lâm Đồng. Nkre ndâk ƀư tour, trong hăn pâl nđaih mhe gay boăt nthoi đah 3 nkual; tâm ôp tâm nchră an UBND n’gor, Ban Thường vụ n’gor ủy an nghị quyết mpeh hun hao pâl nđaih lvang 2025-2030 n’hanh uănh tât 2045.

Ăp trong hăn uĕh tâm dăp rgum ntung trong, boăt nthoi nkual n’hanh trong hăn hun hao ndơ pâl nđaih geh êng, an saơ nsrôih hao têh dăng bah nău kan pâl nđaih n’gor Lâm Đồng. Tă bah nĕ mĭn lah ntŭk gŭ bah ăp ntŭk tât geh âk ndơ n’hanh ngăn ngên êng tâm ăp trong ƀư ngăn bah năch pâl nđaih.