N’gor Lâm Đồng dôl ndăn ƀư wat jêh pah kan nchrăp an măng “Rlai lăp nău nteh chĭng gong Đông Nam Á 2025”, ƀư ntơm bah nar 19–21/12/2025 ta Quảng trường Lâm Viên – Đà Lạt.

Đah nkô̆ “N’gloh nteh chĭng gong Tây Nguyên – Đông Nam Á wăch rgum”, măng ƀư wăch rgum 12 mpôl hăr blău goh tât bah Gia Lai, Dak Lak, Lâm Đồng, du đêt n’gor mpeh Bắc ndrel ăp mpôl njroh mprơ Thái Lan, Lào n’hanh Malaysia. Măng ƀư gay mpư rnê ntŭk văn hóa chĭng gong Tây Nguyên – drăp ndơ ơm yău ntlơi an tay văn hóa mô mpơl săk ntơh măt an ntil kon nuĭh, nkre nkơnh n’hơ săk tơm văn hóa n’hanh săk geh pâl nđaih bah n’gor Lâm Đồng.

Tĭng wa Đinh Văn Tuấn – Groi kruanh UBND n’gor Lâm Đồng, ăp nău kan mbra dơi ƀư du rơh 3 nkual ntĭt êng: “Rbăn kao” Đà Lạt, “Dak lêng ư̆r” Bình Thuận n’hanh “bri neh têh hvi” Dak Nông. Măng ƀư rƀŏng tât nău jêng Festival chĭng gong tât leh 2 năm du tơ̆, rgop mât ndray drăp ndơ ơm yău ntlơi an tay, ntrŭt ntrôl tâm nđŭr goh nteh nău mprơ Đông Nam Á n’hanh năl saơ Lâm Đồng – nkual neh wăch rgum, rêng lam rnoh khlay văn hóa Tây Nguyên luh tât lam ntŭr neh.