Kêng măng lơ 12/11, ta nkuăl ƀon têh Đà Lạt, n’gâng kan văn hóa thể thao n’hanh pâl nđaih n’hanh UBND n’gor Lâm Đồng lĕ geh ƀư rơh rƀŭn mbơh ăp nău geh tât Liên hoan phim Việt Nam tal 23 geh ƀư bâh 21 tât 25/11 tay.

Liên hoan phim Việt Nam tal 23 geh 177 phim râng tâm rlong, geh rnoh phim dŭt âk bâh ntơm tât aƀaơ. Tâm nĕ, geh 91 phim geh săch lăp ta rơh tâm rlong, n’hanh 56 phim geh săch lăp ta bôk nău phim lĕ rngôch. Rlău ma rơh ntơm pơk, nglôch lôch n’hanh pă giải, liên hoan phim hôm nha geh ƀư âk nău kan kơt: Pla n’hơ “Đà Lạt- ndâk nsơm nău rŏng điện ảnh”, ăp rơh tâm nchră mpeh “Nău mât kơl nău  tơm kan tâm hun hao công nghiệp điện ảnh”, “Du đê̆ nău tơm khlăy tâm trong rdâk njêng công nghiệp điện ảnh Việt Nam”, bôk nău tâm nđur đah nghệ sĩ điện ảnh n’hanh khán giả n’gor Lâm Đồng, pơk phim ta ăp rạp n’hanh ăp ntŭk bah dih, tât uănh ăp ntŭk ueh bâh neh bri Đà Lạt- Lâm Đồng.