Rơh kuăl brah vơt khay iang lah nău way lah ueh trôk nar, lah ueh ăp huêng brah neh ntu n’hanh ăp nuĭh hăn lor lĕ an mih lăng prăng sơh, ngih dak đăp mpăn, mbo ba mbôn lăy. Ta rơh kuăl brah aơ yor mpôl kan tế Nam quan ƀư tĭng nău way kăl e an ndơ kuăl brah n’hanh mpoh su nhang kah gĭt ăp nuĭh kăl e. Ăp đại biểu n’hanh ƀon lan lĕ geh tât su nhang, mpơl nău lah ueh, dăn an mih lăng prăng sơh, mih sial tọôk nar ueh aih, nău rêh đăp mpăn, têh dăng. Tĭng nău mbơh bâh wa Võ Thị Phượng, Giám đốc Bảo tàng Đăk Lăk, nău kan aơ mô dơn gay ma mât rbăy, n’hao ăp nău khlăy văn hóa way ơm, ma hôm nha geh mbơh tơih, mbơh n’hơ ntil ndơ di tích lịch sử, ndrel đah hun hao pâl nđaih văn hóa nău mĭn khlay ta ntŭk.