“Di rnôk nar aơ, gâp lah ueh nô Y Dao hŏ tâm mơng 3 năm; lah ueh me mbŏ hŏ tât gay ma râng nau tâm njêng oh nê bah 2 hê hên. Ntơm jêh aơ, hên mra geh nau kơl an rnăk vâl, vay ôp khâl n’hâm soan me mbŏ, ŭch me mbŏ rêh ân ueh lăng đăp mpăn’.

 3 năm bah năp nê, nô Y Dao ndrel Y Nhim tâm xã Ea Tar, nkuăl Cư M’gar, n’gor Dak Lak, tâm bên. Bah nau tâm pâl nsum, 2 nô saơ tâm ban tâm nau rêh nau kan ri ŭch tâm njêng jêng oh nô du rnăk ri ma tâm njêng oh, nô, jă nŭih bu tât ôp brah ndrel ƀon lan tât râng uănh:

 “Gâp nchră ma me mbŏ ndrel geh me mbŏ gâp ŭch đŏng. Gâp mbơh ma kônh wa ƀon kan gay ma gĭt hên lah oh nô tâm njêng. Me mbŏ rhơn yor lah geh tay du hê kon bu klô đŏng. Jêh aơ rnôk ji kuet, geh tay nŭih ôp khâl, tâm kơl”.

 Ăp nau ma nô Y Nhim nkoch lah 1 tâm âk nau vay ƀư tâm njêng oh nô, du nau ueh tâm nau rêh bah rnoi Rđe. Tĭng bu ranh Y Thôn Niê, tâm Xã Ea Tar, nkuăl Cư M’gar ri nau tâm njêng geh nau ueh ngăn:

 ‘Nau tâm njêng oh nô tĭng nau vay bah rnoi Rđe ri geh nau khlay ngăn, hŏ tâm njêng ri ntơm jêh aơ khân păng jêng oh nô mro mrăng”.

Tĭng nau vay bah rnoi Rđe, nau tâm njêng oh nô tâm nuih n’hâm ŭch êng. Nê lah nau tâm njêng đah 2 nuih tâm bên, yơn dơi njêng đah ăp ƀon lan êng êng đŏng. Jêh rnôk lôch nau tâm njêng, nau tâm boh lơn ma nâp, jăp, tâm kơl tâm nau rêh. Ngăn lah, mô êng lah nơm, ma n’ăp ma oh, kon mô lah oh nô băl mpôl bar ding kŏ tâm dăch kơt lah du rnăk vâl, njêng nau tâm rnglăp nâp.

Nau tâm njêng geh ƀư tâm ngih bah 1 mô lah 2 nŭih. Lor ma ƀư tâm njêng, tơm ngih nchrăp 10 yăng ndrănh, du mlâm sur, 2 mlâm djar, phe ndrel ndoh ndơ gâm trau. Nŭih tâm njêng hăn ơm bah 5h ôi gay ma uănh tâm ngih gŭch sur, nchrăp ndoh ndơ, kât ndrănh yăng, anh dak, sreh n’ha prit gay săp ndrănh...Ndơ mô dơi mô geh rnôk tâm njêng nê kông. Yor lah, đah rnoi Rđe Tay Nguyên, kông geh nau khlay ngăn, nkre lah nau vay nkre lah du nau vay bah du bông nau rêh. Nau dŏng kông nkre lah ndơ nkrŏ, nkre lah nau dŏng ân nau ƀư ôp brah, tâm njêng, tâm rnôk njŭn sông ur sai. Bu ranh Y’Ruk Ayun, xã Ea Tar, nkuăl Cư M’gar mbơh:

 ‘Dok kông nê gay ma gĭt lah rnăk vâl tâm dăch dơh bah nŭih geh ôp brah. Kông aơ mô dơi ƀư roh ôh. Lah ƀư roh, nŭih nê mra mâp nau mô lap, mô geh lăng săk jăn. Kông leo nuih n’hâm bah 2 nŭih tâm njêng tâm dăch. Kông aơ, lah bu hăn ngai, uănh tâm kông saơ hôm ang, kloh ri nŭih tâm rnăk vâl ueh lăng. Lah kông nê mô hôm ang, ri nơm gĭt lah tâm rnăk vâl geh nŭih mô fdăng, tâm rnăk geh nŭih mô lap”.

Rnôk ăp nŭih tât ăp, bu goh gong, nkah mbơh ma ăp nŭih ntơm ƀư, rnôk nê bu ur geh mpeh ba dâng, hôm bu klô gŭ mpeh ba lơ. Nŭih geh tâm njêng gŭ êp ntŭk bu răch brah ndrel ăp ntil ndơ bu nchrăp ôp. Nau ƀư tâm njêng nar nê ueh khlay ngăn.

Jêh rnôk ôp brah, nŭih geh tâm njêng geh ăp nŭih tâm băl mpôl, rnăk vâl tơm ngih tât leo kông. Jêh nê ăp nŭih ndrel ngêt ndrănh. Ngăn lah, jêh rnôk tâm njêng, nau mô dơi ngăn nê lah ăp nŭih tâm nê mô dơi tâm jin tâm lah. Lah nŭih ƀư tih ri geh bu kuh 2-3 mlâm sur mô lah du mô rpu, ndrôk. Tât râng tâm nar tâm njêng, Yuh H’Duôn Niê, tâm xã Ea Tar, nkuăl Cư M’gar nkoch:

‘Gâp rhơn ngăn ŭch ngăn nau vay ơm bah phung hên. Gâp ŭch lah, rơh ba kơi mra mât ân nap nau vay ueh aơ bah rnoi Rđe”.

 Nau tâm njêng oh nô bah rnoi Rđe geh ryơk, mât ndray bah ăp rơh kŏ tâm ban ma nau tâm njêng, tâm rnglăp tâm ƀon lan nar lơn geyh nâp, lah nau nsôih gay kônh wa rnoi Rđe rlet nau jêr, ndâk nau rêh ƀon lan lơn hơm răm, đăp mpăn./.