Pơh Văn hoá- Pâl nđaih Gia Lai 2023 ƀư ntơm bah nar 11 tât 18/11/2023. Tâm bah ri aơ, pah kan nchrăp an nar dja dôl dŭt ndăn ngăch. Pơh lễ văn hoá pâl nđaih bah n’gor năm aơ dơi ƀư têh kuâng lơn, đah ăp nău kan văn hóa, thể thao ntĭt êng săk tơm văn hoá, thể thao ntĭt êng văn hoá ƀon tơm ta dor yôk prêh Gia Lai, ton mbra wăch rgum âk mpưm năch tât pâl uănh.

Bol dôl tâm n’gul khay kăch rek, yơn ăp măng, Pleiku Roh, phường Yên Đỗ, nkual ƀon têh Pleiku khuh n’gôr nău nteh chĭng gong n’hanh nău nteh gơm ngơi ta jay rot đŏng. Yor aơ lah rnôk bơi 50 nuĭh tâm  ăp rmôt chĭng gong, chĭng gong druh ndăm n’hanh chĭng gong hŏ dâk druh ndăm tâm ƀon nđơr tiăr nti ăp nău njroh mprơ râng Festival Văn hóa chĭng gong Gia Lai 2023 ƀư tâm 11/11 n’hanh 12/11. Nô Siu Thưm- rmôt chĭng gong druh ndăm an gĭt, mpôl mpât mprơ bah ƀon mbra nchreng an 4 nău njroh mprơ rdâk rêh tay nău way nsĭt ba n’hao rhe, mpât mprơ, tŭr goh chĭng gong n’hanh uh goh ndơ rnoi mpôl đê̆:

“Khay kăch rek hôm, yơn ăp bu mprơ nha hôm nđơr rhơn nti  ăp nău mpât mprơ ơm đŏng yơn trong yơk n’hŭn jâng ti mhe gay bôk nău kan njroh mprơ uĕh, gay rhŏ dŏng an năch  djăt uănh.”

 Ta nkuâl Krông Pa, pah kan nchrăp khuh n’gôr tâm ban kơt nê đŏng. Wa Ngô Đức Mạo- Giám đốc Trung tâm Văn hóa-Thông tin n’hanh Thể thao nkuâl an gĭt: Năm aơ, nkuâl đă 50 bu mprơ tât râng tâm du bông ƀư Pơh Văn hoá Pâl nđaih bah n’gor. Tĭng nê, ăp nău tŭr goh chĭng gong mbra dơi mpơl an saơ tâm festival; ăp nuĭh hăr blău mpơl rêh tay ăp nău kan way ơm kơt tanh dông sah, trah mon rup si, rui brai tâm lễ hội trong nkual ƀon têh. Gay njêng luh du ntŭk văn hoá ƀon tơm ta ntŭk, mpôl hôm gâm gŭch ăp ndơ sa ntĭt êng ta n’gor đŏng kơt mƀêt prung djăr gŭch, puăch ndrôk du nar ih gay nkoch n’hơ tât năch:

“Tâm ăp măng, lôch du nar ƀư mir jan ba, ăp bu mprơ rgum sĭt ta jay rot gay tiăr nti. Đah ăp nuĭh hăr blău trah mon ndah rup si, cheh tanh rui brai, tanh sah dông, chraih chĭng gong ri nchrăp gay hăn tât Pleiku lah lôch jêh, nkoch  n’hơ an năch. Ăp măng ăp bu mprơ tiăr nti nău way ơm ôp brah đŏng kơt ƀư ôp lăp jay mhe, răch sreh rpu gay nsĭt tay du ntŭk săk tơm bah nuĭh Jrai ta Krông Pa".

Pơh Văn hóa-Pâl nđaih Gia Lai năm 2023 mbra ƀư ntơm bah nar 11/11 tât 18/11 đah nău tât râng bah nklăp 1.000 bu mprơ tâm n’hanh bah dih n’gor. Pơh lễ mbra dơi ntơm pơk ma Festival ntŭk Văn hóa tŭr goh chĭng gong Gia Lai 2023 rgum mpôl gĭt blău mpât mprơ bah 17 nkuâl, thị xã, nkual ƀon têh lam n’gor n’hanh ăp n’gor Tây Nguyên. Lôch nê lah ăp lễ hội săk ntơr êng kơt lễ hội kao tăng – yôk ŭnh Chư Đang Ya (nkuâl Chư Păh); rơh tâm rlong duk si lôk ta dak me Pô Cô (nkuâl Ia Grai).

Nkhêp geh rnôk dja, Gia Lai ƀư  ăp lễ hội trong nkual ƀon têh; rdâk tay sinh hoạt văn hóa chĭng gong, nău way ƀư brah lah yang way ơm ƀon lan; pla n’hơ, ndơ uh goh Tây Nguyên, rup nghệ thuật mpeh văn hóa Gia Lai, nkoch mpeh ntŭk têl ơm yău gưl neh dak mha êng n’hanh drăp ndơ mpêt khlay gưl neh dak bah n’gor Gia Lai,... wa Nguyễn Xuân Hà- Kruanh jrô kan Văn hoá- Thông tin nkual ƀon têh Pleiku, ntŭk ƀư dŭt âk nău kan njroh mprơ tâm pơh lễ an gĭt:

“Aƀaơ, ăp xã phường, ăp nhih pah đơn vị bah nkual ƀon têh Pleiku dôl nsrôih nchrăp ƀư jăp pah kan nkoch trêng, nkoch n’hơ, nkơnh rup gui Gia Lai lah nsum, rup gui kon nuĭh nkual ƀon têh dor yôk Pleiku lah êng tât đah năch tâm n’hanh bah dih dak. Aƀaơ ăp bu mprơ ta ăp ƀon lan rnoi mpôl đê̆ dôl nsrôih tiăr nti ăp nău mpât mprơ tŭr goh chĭng gong, trah mon rup si, tât cheh tanh rui brai, khăt tanh sah dông gay nchrăp an ăp nău kan tâm trôm Pơh Văn hóa Pâl nđaih n’gor Gia Lai.”

Pơh Văn hóa- Pâl nđaih Gia Lai năm 2023 gay mbơh nkoch, nkơnh n’hơ ăp rnoh khlay văn hóa uĕh êng, rnoh khlay ntoh lư mpeh ndơ mpêt khlay pâl nđaih bah n’gor Gia Lai, lơn lah ntŭk tŭr chĭng goh gong Tây Nguyên gŭ tâm bôk nău kan dâk jêng tay, mât ndray n’hanh ntik n’hao rnoh khlay bah drăp ndơ ơm yău ntlơi an tay văn hóa mô mpơl săk ntơh măt an ntil kon nuĭh. Kruanh UBND n’gor Gia Lai Trương Hải Long dăn đă ăp nhih pah kan dơi kan n’hao nuih n’hâm dơn kan, lor nchrăp kan nsum ƀư ăp rêng kan geh rup uĕh mhe, wăch rgum nuĭh ƀon lan, năch pâl nđaih, ăp nuĭh ntuh kơl, rgop ntrŭt ntrôl wăng sa, văn hóa n’hanh pâl nđaih ta n’gor. Ăp jay ngêt sa, khách sạn mô dơi n’hao rnoh khlay tâm rnôk dja, nuĭh ƀon lan nkual ƀon têh Pleiku an ƀư tay trong ntĭt leo lor jay ăch chrach “Uĕh tâm ban kơt gŭ ta jay nơm”…gay njêng luh rup gui dêh bên, đăp mpăn rêng kan geh nău dơi, đăp mpăn, geh nkô̆ hôr khlay./.  

Nguyễn Thảo