Đah nău ŭch bah rnôk hôm e kon se, bơi 50 năm aơ nghệ nhân Kpă Huăt gơih nđơr pah kan, ndrel đah nău mĭn ƀư mhe uĕh, wa lĕ rgâl ăp rlŭt si mô khlay jêng ăp kon mut uĕh, geh âk huêng phan n’hanh nău uĕh ntĭt mpơl bah nuĭh Jarai. Nghệ nhân Kpă Huăt nkoch, gay dơi trah ăp kon mŭn bah ăp rlŭt si dăng nĕ mô di nuĭh dơi ƀư, ma yor nău ŭch nti nsơm, dŭt n’hâm n’hanh bôk rngok mĭn ƀư. Aơ lah du nău mô geh nuĭh ntĭm ma dơi ƀư yor măt ŭch uănh tĭng bơ̆ trah mon, mpang ty blău n’hanh bôk rngok bah ăp nuĭh tâm ăp rup kon mut. Nghệ nhân Kpă Huăt nkoch:

“Tâm rnôk trah kon mut, gâp mĭn luh rup gui gâp mbra ƀư. Mô geh nuĭh ntĭm gâp yơn yor nău ŭch, nău nsrôih dơi trah ăp rup si kon mut gâp ŭch. Aơ lah nău uĕh way ơm bah rnoi nuĭh he. Kăl e, kônh wa he way trah mon ăp rup aơ gay an tâm jay môch”.

Nghệ nhân Kpă Huăt lĕ tă trah dŭt âk rup kon mut jay môch. Rnôk uănh tâm ăp ndơ dơi trah mon jêr, ăp nuĭh gĭt dơi saơ nău ŭch đah nghệ thuật trah mon si way ơm bah rnoi nuĭh nơm. Mpang ty hăr blău tĭng trong n’hat măt si nuĭh bu ur ut măt nhĭm sai, nghệ nhân Kpă Huăt nkoch ăp rup kon mut aơ mpơl nău rŏng bah nuĭh hôm e rêh đah nuĭh lĕ khĭt. Nĕ lah nău rŏng uĕh, lĕ bên n’hanh hăn ndrel đah nău rêh ăp nar bah nuĭh lĕ roh rnôk hôm e rêh.

“Rơh trah mon lor rơh râng lễ hội trah mon an tâm jay môch, kon mŭn nuĭh bu ur dôl ut măt nhĭm sai roh tâm nar ntlơi môch, đah si tơm nâng. Âk rơh tâm ăp nkuăl têh gâp tă trah mon rup kon mut bu ur ut kon. Dŭt âk nuĭh ŭch rup gâp mon. Gâp mô trah rup kon mut gay tăch ma trah gay kon sau dơi saơ yor aƀaơ đêt nuĭh dơi ƀư”.

Rnôk uănh ăp rup kon mut dŭt ŭch, ăp nuĭh rnê yor nău blău bah nghệ nhân. Tâm ƀon nuĭh ŭch rup kon mut lah pơng mbra ƀư mô di lah tăch gay kônh wa ntô̆ n’hao nău uĕh bah rnoi nuĭh nơm, kon sau saơ, nti kơt gay mât ndrăy n’hanh ƀư uĕh. Gay nău kan trah mon kon mŭn dơi mât trêng, wa mô knŭng ntĭm an kon sau tâm jay, ma hôm trêng ntĭm ăp nuĭh ŭch nti. Ŭch mĭn đah nău trêng ntĭm, mât ndrăy nău kan trah mon rup kon mut, nghệ nhân Kpă Huăt rvê:

“Aƀaơ geh âk nuĭh mom tâm ƀon tĭng nti nău kan trah mon si, bah kơi aơ gâp geh sĭt đah u che ri kon sau hôm e gĭt tât nău kan bah u che gay n’glơi an. Ăp kon sau tâm ƀon êng hăn nti gâp ntĭm. Mpeh trêng ntĭm dŭt n’gâng kan ƀon lan uănh tât ntuh kơl prăk tâm di. Gâp mĭn trêng ntĭm an kon sau gĭt trah mon. Lah gâp mô ntĭm ri kon sau mbra mô dơi gĭt. Gâp knŭng an kon sau gĭt tĭng kon mŭn gay dơi ƀư”.

Ndrel đah mông nar n’hanh nău rgâl kon nuĭh, đêt nuĭh uănh tât trah mon rup kon mŭn. Gay nghệ thuât trah mon kon mut hôm e trêng mât mro an geh nău ndrel soan bah lĕ ăp nuĭh druh ndăm uănh khlay nău uĕh bah ăp rup kon mut. N’hanh ăp nghệ nhân geh mpang ty blău, nău mĭn uĕh kơt Kpă Huăt nchrăp hăn ndrel gay nău kan trah mon rup kon mut bah nuĭh Jarai hôm e mro./.