- Ơi wa nghệ nhân Alíp! Dŭt răm dơi tâm ngơi đah nghệ nhân tâm nkô̆ trăch Nău uĕh blău way ơm tâm ăp rnoi mpôl đêt Tây Nguyên nar aơ. Ơi nghệ nhân, chĭng gông geh nău khlay m’hâm tâm nău rêh bah nuĭh ƀon lan Bahnar?

- Nghệ Nhân Alíp: Bôk năp gâp dăn njuăl nău ôp ngơi, nău lah uĕh tât kônh wa djăt Radio... Chĭng gông dŭt khlay tâm nău rêh nar aơ. Nău khlay bah pơng ta trong nău dŏng tâm ăp tơh lễ têh khlay, tâm khĭt ôm, tâm lễ hội ƀư brah sreh rpu, ƀư brah rveh... dơi dŏng chĭng. N’hanh kăl e, an lah jay ndrŏng ri mư dơi dŏng an lĕ nsum mpôl, jêng dŭt khlay mpeh đah drăp ndơ n’hanh nuih n’hâm.

- Ri lah, wa dơi wât nău khlay bah chĭng, jêng lĕ tĭng đah chĭng gông bah jêt, jêng nău ŭch tâm nău rêh bah nơm?

- Nghệ Nhân Alíp: Chĭng gông lĕ tĭng gâp bah jêt tât aƀaơ, nteh chĭng way njuăl an gâp nkah tât ăp nău way ơm kơt ntlơi môch... Săk gâp ri knơm dơi nti bah u che gâp jêng mư blău dŏng chĭng, gâp way hăn tĭng khân pơng tŭr chĭng gâp hăn tĭng.

- Ndrĭ tă bah ăp lễ hội, nghệ nhân lĕ nti tŭr chĭng n’hanh lăp tâm ăp nău nteh? dăn Nghệ nhân nkoch nău ŭch aơ?

- Nghệ Nhân Alíp: Tâm rơh lễ hội, djăt chĭng ri ăp nuĭh tĭng rơh, ndrel tŭr, njroh xoang, dŭt răm, lơn lah tâm rơh ntlơi môch dŭt răm... jêng an kâp tât măng ri mư tât rơh nơm dơi tŭr. Tâm rnôk măng ri ăp nuĭh tŭr blău way tŭr lor, yor rnôk aơ ăp bu ur dôl njroh xoang, ăp bu klô ŭch tơih nău blău bah nơm jêng ŭch nti rnôk aơ ri mô dơi, an kâp măng, âk nuĭh nhŭl tŭr chĭng mô dơi tay, rnôk aơ mbra geh nuĭh ntĭm an, bah nĕ he nti mbrơi mbrơi. Tal 2 tay lah rnôk mô tŏng nuĭh ri mpôl hên dăn tŭr, dăn tŭr bah ăp ntil chĭng jêt, tŭr dơh ăp ntil chĭng têh, jêr tŭr an tât rnôk blău kơt nar aơ.

- Ơ, đah nău ŭch n’hanh gơih mĭn joi nti, rlet rlău âk năm nti, ndrĭ wa lĕ ntêm nkrem geh âk “nău blău ơm” tâm nghệ thuật chĭng gông?

- Nghệ Nhân Alíp: Săk gâp tŭr geh dŭt âk nău chĭng, n’ăp nău chĭng way ơm mô lah ăp nău chĭng mhe nar aơ. Kơt lah tâm rơh di khay, lễ ntlơi môch ri tŭr ăp nău chĭng geh nău răm, m’ak, hôm tâm ăp rơh ƀư brah kơt sa rpu, sa ndrôk, sa seh ri tŭr ăp nău chĭng êng. Sa rpu ri tŏng n’ăp chĭng n’hanh gông, hôm sa ndrôk, sa seh ri knŭng dŏng chĭng dơm. chĭng sa rpu bơi kơt tŭr chĭng lăp jay nhih mhe. Lah nsum nău chĭng way ơm dŭt âk, hôm nău mhe aƀaơ knŭng kuăl lah nău chĭng Jarai, geh nău nteh dŭt uĕh, tât âk nău.

- Ndrĭ gay ăp nău chĭng aơ mô roh rui, nghệ nhân geh trong gay ntĭm an rơh bah kơi đŏng?

- Nghệ Nhân Alíp: Gâp lĕ ntĭm chĭng geh 11, 12 năm aơ hôm. rnoh ăp mon tĭng nti, dơi an kơp dơn nghệ nhân mon tâm ƀon nklăp 40 mon. Aƀaơ ăp mon dŭch tŭch râng ăp lễ hôị, tâm nđŭr. Gâp ŭch ăp rơh bah kơi mât ndrăy ăp nău chĭng uĕh bah u che jêng gâp nsrôih ntĭm tay, knŭng an khân pơng ăp nău dŭt na nê̆ gay khân pơng gĭt, kơp n’ăp nău chĭng, đơn T’rưng mô lah đơn Ting ning.

- Ơ, dăn lah uĕh nghệ nhân ưu tú Alíp lĕ an mông tâm nchră aơ.