Ôi ơm tâm ƀon Tuor, mô tăng nau sĭk bah ndeh hăn tâm êp trong Quốc lộ 14, trong tŏ chai hăn tâm ƀon êp ngih jong, ăp mir cà phê, sầu riêng, kao êr, kao nglang tâm êp n’gâng n’gar tâm êp trong. “Ngih Kathy” jêng lơn ma ueh ma ngih kđar, ntung gung ndrel ma nglang kao. Nau ƀô kah ntơm ndơ gâm tă bah ngih ŭnh lơn ma âk nau ueh.

Ngih jêh nkra ntơm năm 2023, 2 năm rlau, tâm ăp năm “Ngih Kathy” vơt nklăp 2000 năch, 80% rnoh nê lah năch dak ba dih, âk ngăn tă bah dak Pháp, Mỹ, Anh, Thuỵ Điển...bu năch veh ndrel gŭ tâm ngih homstay “Ngih Kathy” mra geh nau rêh ueh bah kônh wa rnoi rđe ta aơ, ndrel gâm sa, hăn luh mir, ndrel tanh njuh, ngêt ndrănh yăng êp ŭnh năk...Yuh H’Belly rhơn nkoch:

‘Bu năch rhơn ngăn rnôk geh ncho klơ ndreh công nông hăn uănh tâm ƀon lan, uănh pâl ăp ntil ndơ goh nteh kơt lah chĭng gong, dĭng dĭt rla, nah ao tanh ndrel hyơt. Hên ƀư nau kan ndrel bu năch trok prăk ân hên, leo nau geh prăk tay gay kônh wa tâm ƀon ntop tay tâm nau rêh. Gâp ŭch ngăn yor mô knŭng geh prăk ma hôm mât nau ơm ndrel rêng nau vay ơm bah rnoi nơm”.

Du hê bu năch tât tă bah Indonesia tât khâl ƀon Tuor ndrel homstay bah yuh Belly nkoch mbơh nau rhơn:

“Ơ, aơ lah rơh bôk năp gâp tât khâl Việt Nam. Nau ma gâp ŭch ngăn mô êng lah mih, sial, ma hôm lah nau ma nŭih ƀon lan ta aơ rêh ueh ma păng. Nau rêh ueh ndrel geh nau rhơn tâm săk jăn lơn. Ăp ndơ sa ta aơ ri uănh ueh, nau mbơh nkoch tât rnoi rđe, ân tât du kêng măng tur chĭng goh gong ueh, âk nau ngăn”.

  Bu năch kŏ tât nau rhơn ân ngih yuh Belly ndrel nŭih ƀon lan tâm ƀon. Nê lah nau nkoch ntĭm nti ân kon nơm ngai ma điện thoại bah nŭih me nŭih Pháp; lah nau tâm nkoch mbơh ăp nar bah bu năch Anh...Hŏ blau nau ngơi Pháp, yuh Belly mô hôm rvê ntĭ tay âk nau ngơi êng, tă bah nau Anh, Anh Mỹ, nau Thuỵ Điển gay ma dơi leo trong pâl n’aih tĭng nau ŭch bah năch, nkoch mbơh đah bu năch âk lơn tât nau ơm yau bah rnoi mpôl. Đah ƀon lan nơm, yuh Belly nkoch nau ân kônh wa gĭt tay ăp nau ueh đah ăp nau vay ơm:

‘Gâp bonh đă kônh wa tanh njuh, n’gon ndrănh yăng, tur chĭng. Gâp mra lah nŭih rvăt ăp ntil nê gay ma sĭt rhŏ dŏng ân bu năch, rnôk geh bu năch tât, gâp mra ndrel ma kônh wa rhŏ an. Nau saơ bu năch tă bah Pháp, Mỹ tât khâl hŏ bonh đă kônh wa tâm ƀon âk ngăn. Rnôk saơ bu năch tă bah dak Pháp, ăp dak Châu Âu tât, rvăt ndơ tanh, bum byăp play, ndơ nkah, kônh wa hŏ rhơn ma ăp nau gâp nkoch nê lah nau ngăn. Ntơm bah nê, kônh wa gĭt dơi ăp nau nơm ƀư lah ăp ntil ndơ nkah ân nau ơm vay”.

Ăp bu năch tât nar lơn ma âk, geh nsum ma nau ŭch joi gĭt ndrel ryơk ăp nau ơm ueh ăp ntil, n’hao nau rnơm bah kônh wa rnoi rđe tâm ƀon Tuor. Ntop tay ăp ngih jong geh ndâk, nkra năp tâm nau kan ƀư pâl n’aih; ăp măng lơn ma âk nar rƀŭn rgum nkoch mbơh nau ueh bah bu năch ndrel kônh wa. Wa H’Drian Niê, 80 năm, rhơn đah ăp nau rgâl bah ƀon nơm, nkoch:

‘Gâp rhơn ngăn rnôk saơ nar lơn ma âk bu năch, n’ăp ma tâm ndrel bah dih dak, tât ta Buôn Tuor. Khân păng mô êng ŭch đah nau rêh ueh ăng tâm ƀon lan ma hôm ngăn ngên ŭch ma ăp ndơ sa ndrel bum play kloh geh pĕ tă bah mir, n’gar nơm tăm. Gay ƀon Tuor nar lơn ma hun hao ndrel rgum tay âk năch, nau kan tâm ngơi ma nau Anh, nau Pháp nê lah nau khlay. Gâp ŭch ăp băl mom mra geh n’hao tay nau blau nau ngơi dak ba dih bah nơm. Nau aơ mra kơl an nơm nthoi ueh lơn đah bu năch dak ba dih, leo ƀon Tuôr jêng du ntŭk tât ueh lơn”./.