Ăp nar bôk năm mhe aơ, nkuăl pâl n’aih ơm ueh ƀon lan Ko Tam, nkuăl ƀon têh Buôn Ma Thuột, n’gor Dak Lak jêng ueh, âk năch tât. Yuh H’Drim Ayun, nŭih pah kan ta aơ nkoch:

            ‘Tâm ngih jong aơ geh nau ƀư tâm n’ur njroh xoang, ngêt ndrănh yăng geh ntơm lơ 1 tât 5. Tâm ăp ntŭk kŏ geh nau kan ân bu năch tât uănh pâl. Tâm ăp rnôk aơ lah rnôk nơm mbơh nau ueh ơm bah rnoi mpôl nơm lah rnoi Rđe tât ăp nŭih ndrel ăp bôk nau kan aơ bu năch ŭch ngăn, ndrel mô di lah ăp rnôk kŏ geh nau pâl kơt lah nau ơm bah rnoi Rđe bah nkuăl ri ma nơm rhơn ngăn rnok vơt ăp nŭih năch tât tâm rnôk Tết aơ”.

            Lah ngoai tâm ăp bu năch săch Dak Lak lah ntŭk tât pâl n’aih tâm ăp nar bôk năm mhe, nô Nguyễn Thiên Đăng, tă bah Đồng Nai nkoch: ăp nar rlau aơ, mô êng geh râng uănh ăp nau ueh n’ih, ndrih bah bri trôk, si gle ma hôm geh nau râng ăp nau kan pâl n’aih ơm ueh bah ƀon lan âk ngăn. Ngăn lah rnôk rơh bôk năp geh rnglăp nơm tâm nau nteh chĭng gong, rlong râng njroh xoang mô lah ngêt ndrănh yăng êp ŭnh năk:

            ‘Ntơm bah ndơh kŏ hăn jŭm dŭk aơ hôm, geh uănh bu tur chĭng, geh ngêt ndrănh yăng, geh ngêt sa ndơ bu gŭch ta aơ ueh ndrel kah ngăn ndrel gâp ŭch ngăn lah njroh xoang”.

            Đah yuh Huỳnh Thị Thuỷ, bol ma rêh ndrel pah kan tâm Dak Lak âk năm, yơn năm aơ yuh kŏ săch Ƀon Akŏ Dhông-ƀon tâm nkuăl ƀon têh gay ma hăn pâl. Tĭng yuh, aơ lah nau ueh ngăn gay ma kon se gĭt n’hao nau ryơk nau ơm. Ăp nau ngăn kơt lah uănh bu tur chĭng, râng nau ƀư ôp brah, râng hăn ngêt sa ndơ sa kah bah ntŭk aơ mra kơl an ăp kon yuh gĭt lơn mpeh nau ueh bah nkuăl:

            ‘Tết năm aơ gâp leo rnăk vâl hăn pâl n’aih aơ gay râng nau ueh khuh răm rnôk Tết ta aơ. Ntŭk aơ geh âk ngăn nau kan nkre lah nau vay ơm nkre geh nau mhe đŏng. Geh chĭng gong, geh nau ueh mpeh nau ơm ndrănh yăng. Gâp ŭch lĕ ma rnăk gâp ndrel hăn ta aơ gay ma uănh nau ơm ueh nê. Gâp gŭ ta aơ ri ma nơm na gĭt ndrel ăp kon gâp kŏ gĭt đŏng, ri mơ Tết lah rnôk geh nau ueh ngăn”.

            Yan năm mhe tâm Dak Lak mô knŭng leo tât nau ueh êng mpeh bri neh, nau ơm ma hôm lah ntŭk ma ăp nŭih nthoi ăp nau ueh ơm ueh ngăn. Nŭih ƀon lan ndrel bu năch kŏ geh nau ueh gay ma gŭ pâl tâm du năm mhe geh nau ueh, ntŭk ma nau ơm ndrel nau ueh bah bri, neh, dak gay lơi ân ba kơi ăp nau nkah ueh ngăn./.