Tâm 2 khay dŭt năm, n’gor Lâm Đồng mbra ƀư âk nău nkra tay jêng mông nar n’gŭr răm, wăch rgum năch pâl nđaih tâm n’hanh bah dih dak đah nău uĕh lah lễ hội chĭng gông Đông Nam Á năm 2025, Lễ hội Trà lam ntŭr neh, Lễ hội mbah rhơn năm mhe 2026... ndrel đah nĕ n’gor ntrôl dăng trong kan ntrŭt ngăch, mpla nsơ pâl nđaih tă bah nău rgâl mrô ntŭk tât, pơk hvi kan ndrel lam ntŭrneh n’hanh râng ăp nău ƀư pâl nđaih têh.

Tâm nĕ trôm nău ƀư Lễ hội Trà lam ntŭr neh-World Tea Fest 2025 têh ngăn, rơh bôk năp dơi ƀư ta Việt Nam, ƀư ta Lâm Đồng bah lơ 11/11 tât 7/12/2025, nchrăp wăch rgum nklăp 20.000 năch tâm n’hanh bah dih dak. Ta aơ, âk nău ƀư têh lam ntŭr neh mbra dơi ƀư kơt: Mpla nsơ, nkoch mbơh ndơ trà n’hanh công nghệ nkret njêng mhe; rƀŭn nchră tâm nchră mpeh trong n’hao moh êng ndơ trà Việt; Tâm nđŭr trà dăch dêh đa đại sứ n’hanh năch dak bah dih; Nar rgum trong nkual ƀon têh n’hanh văn hóa trà; Trong hăn pâl nđaih sinh thái nkual trà; ndrel ăp bôk nău ƀư nghệ thuật. Wa Nguyễn Văn Lộc, Giám đốc N’gâng kan văn hóa, Thể thao n’hanh Pâl nđaih n’gor Lâm Đồng, an gĭt:

Mpôl hên ƀư tay ăp nău têh gay wăch rgum năch pâl nđaih. Ndrel đah nĕ mpôl hên pah kan đah Hiệp hội pâl nđaih geh âk tour, trong hăn, geh bôk nău ƀư nta kơl, n’hŭch rnoh khlay khách sạn kơt ăp ntŭk rlu rlău gay wơt năch tâm rơh dŭt năm Noel, Tết dương lịch. Ăp nău ƀư văn hóa, thể thao n’hanh pâl nđaih ƀư dŭt âk, dŭt mbâl ngăn rơh dŭt năm.

Ngăn ngên mbah rhơn nkah gĭt 85 năm Nar ndâk njêng Đảng bộ n’gor Dak Lak (23/11), Nar rgum Đại hội tâm rnglăp lĕ rngoi nuĭh (18/11), nkah gĭt 20 năm Nar Drăp ndơ văn hóa Việt Nam (23/11), n’gor Dak Lak ƀư Pơh Drăp ndơ văn hóa ăp rnoi nuĭh n’gor Dak Lak năm 2025 đah bôk nău “Âm vang cồng chiêng-Hăn ndrel ntŭk gŭ rêh”, ƀư bah lơ 18/11 tât 23/11/2025, ta bảo tàng Dak Lak (phường Buôn Ma Thuột) n’hanh Bảo tàng Phú Yên (phường Tuy Hòa). Pơh Drăp ndơ văn hóa lah ăp nău ƀư geh nkô̆ jru, gay ntô̆ n’hao ăp nău khlay bah ăp drăp ndơ văn hóa ta lam n’gor Dak Lak lah nsum n’hanh drăp ndơ ntŭk ntô văn hóa chĭng gông lah êng; Rdâk ƀư tay nău ntô̆ n’hao, wât lĕ đah nău kan bah nsum mpôl tâm nău mât ndrăy n’hanh hun hao ƀư uĕh văn hóa way ơm; nkre mpla nsơ rup gui Dak Lak-nkual neh bah nău nteh têh, ntŭk rgum nău uĕh n’hanh nău ŭch hao ngai rgop ntrôl hun hao pâl nđaih văn hóa nâp nâl, pơk hvi dơi tâm nđŭr, kan ndrel n’hanh joi nău rêh an nsum mpôl ƀon lan tă bah ăp nău ƀư văn hóa-njroh mprơ-pâl nđaih uĕh. Aơ lah di rơh nkah gĭt 20 năm ntŭk ntô văn hóa chĭng gông Tây Nguyên dơi UNESCO nchih săk tâm nău nkoch trêng n’hanh Drăp ndơ văn hóa mô mpơl săk ntoh măt bah kon nuĭh.

Pơh lễ ƀư uĕh, ntoh lư lah Tâm nđŭr Văn hóa Chĭng gông n’hanh mboăt n’hôm way ơm ăp rnoi nuĭh Dak Lak, đah tât râng bah mpôl nghệ nhân ƀon lan tât bah ăp xă, phường ta lam n’gor, mpơl tay du đêt ndơ ƀư brah, ƀư rgum way ơm hăn ndrel đah drăp ndơ Chĭng gông. Nkre lah Famtrip trong hăn pâl nđaih “Boăt nthoi drăp ndơ yău-Hăn ndrel nsum mpôl”, nkoch ăp tour ƀư ngăn, joi văn hóa ta ntŭk, ăp nău ƀư ntĭt mpơl bah nsum mpôl ăp rnoi nuĭh, mĭn joi ăp ntil văn hóa way ơm ta lam n’gor.

Hôm ta n’gor Khánh Hòa, Hiệp hội Pâl nđaih rgŏ jă rơh tâm rlong Báo chí n’hanh Video clip mpeh pâl nđaih năm 2025 đah bôk nău “Pâl nđaih Khánh Hòa-Rup ndah uĕh”. Rgum nsum hành chính, ntŭk ntô pâl nđaih bah n’gor Khánh Hòa dơi pơk hvi, ƀư rup ndah pâl nđaih jêng âk dak uĕh ngăn. Rlău ăp ntŭk tât bên kơt vịnh Nha Trang-ngoăy tâm âk vịnh uĕh ngăn lam ntŭr neh, gôl dak Cam Ranh đah ntŭk rlu rlău têh, tháp Bà Ponagar, thành cổ Diên Khánh mô lah ăp show ƀư nghệ thuật, nău rgop măt bah ntŭk ntô Ninh Thuận ơm kơl rup ndah pâl nđaih Khánh Hòa geh tay âk dak nchrat ang.