Di rŭt năm mhe rlău, ƀon lan nuĭh Pa Cô ta nkual prêh A Lưới rgum sĭt ƀon Văn hóa way ơm ăp rnoi nuĭh nkuăl A Lưới, ta nklang xă Hồng Thượng, n’gŭr răm ƀư tay lễ hôi Aza Koonh. Aơ lah nar Tết way ơm, dăn nău hơm răm, uĕh lăng ngăn bah nuĭh Pa Cô n’hanh ƀon lan rêh ta njok Trường Sơn. Lor rnôk ƀư, ăp bu ranh tâm rnoi mpôl mbra tât tĭng rnăk gay mbah rhơn săk soan an ăp nuĭh tâm rnăk wâl. Jêh rnôk ƀư ăp nău way ƀư ta jay, ăp rnăk n’hanh rnoi mpôl tâm ƀon ndơ̆ ndơ ƀư brah tât Jay jông gay ndrel ƀư brah nsum bah ƀon. Nău ƀư tâm lễ Aza Koonh bah nuĭh Pa Cô geh ăp gưl: ƀư jut rao, ƀư nchrăp, ƀư jă huêng ba, ƀư brah ăp ntil tơm tăm, ƀư brah ăp nuĭh lĕ roh, ƀư sa piăng ba mhe, ƀư jao dông piăng... Bu ranh ƀon Lê Tuấn Mỏ, ta thôn Ky Rẻ, xă Hồng Thượng, nkuăl A Lưới an gĭt:

Way lah lôch năm, tâm nchră, tâm ban ŭch lĕ rngôch ăp ndơ nchrăp ƀư brah an lễ hội Aza Koonh. Jêng lah ƀư rnăk wâl dơi ƀư đŏng, rnăk wâl ri ntĭt nsa djăr mô lah sŭr, jêh nĕ djôt ta ntŭk nsum ta jay Nhih aơ gay dăn bah ƀon n’hanh jă lĕ rngôch ăp rnăk wâl, kon sau rgum gay ƀư lễ hội aơ.

Đah nuĭh ƀon lan nkual prêh A Lưới, lễ hội Aza lah Tết way ơm, geh nău uĕh văn hóa way ơm bah nuĭh rnoi mpôl đêt dơi ƀư ăp năm, di lôch năm, way lah tâm khay 12 âm lịch, jêh rnôk kônh wa kăch rek mir ba lôch. Tâm rnôk nĕ, ăp ƀon mbra săch du nar uĕh ngăn gay ƀư lễ hội Aza. Ăp rnăk n’hanh rnoi mpôl tâm ƀon nsơr an âk ndơ kơt: djăr, ka, phe m’êt koănh, mbo, bum... aơ lah ăp tơm tăm mpa rong ma nuĭh ƀon lan dơi ƀư êng. Bu ranh ƀon Hồ Văn Hạnh, nuĭh ƀon lan Pa Cô an gĭt, lễ Aza lah mpŏng dăn nău hơm răm, uĕh lăng, năm mhe ƀư sa geh lơn.

Tâm rnôk pah kan jan sa ŏk r’ah tâm năm, dŭt năm ƀư lễ hội Aza nsum bah lĕ rnoi mpôl tâm ƀon. Bah tâm rnăk wâl tât nsum mpôl gay dăn ăp brah yang, lah uĕh ăp brah yang tâm năm mhe rlău n’hanh dăn brah yang kơl an tât năm bah kơi trôk nar mih lăng prăng uĕh, mbô, ba bah kônh wa dơi jêng lơn, an âk phe ba lơn.

Lễ hội Aza mô knŭng lah ƀư dăn dơi geh bôh ba ma hôm geh âk nkô̆ nău êng kơt dăn brah yang an ƀon lan dơi rêh đăp mpăn, mô kop ji, nuh srê. Lễ hội Aza Koonh ntŭk rgum dŭt tŏng ăp âk ntil văn hóa nghệ thuật kơt nău mpât mprơ... treh mon... geh âk nău way ơm, nău uĕh ơm bah rnoi nuĭh Pa Cô. Wa Lê Thị Thêm, Kruanh Jrô kan Văn hóa thông tin nkuăl A Lưới, n’gor Thừa Thiên Huế an gĭt: lễ hội aơ dơi mât ndray nâm ơm mpeh naư khlay, đah têh hvi tâm ntŭk gŭ rêh.

Tâm rnôk mât ndrăy ăp nău ƀư lễ hội, ăp nuih ma tât râng nău ƀư lễ hội aơ lah ăp nuĭh ơm wât mpeh nău way ơm bah rnoi mpôl đêt. Ăp nuĭh ma kăl e lĕ tă ƀư ăp nău ƀư lễ hội gay ƀư, ndâk nkra tay ăp nău ƀư lễ hội ta ntŭk bah nkuăl.

Nar tết Aza hôm dơi kuăl lah lễ hội nkah gĭt tơm ba. Yor tơm ba lah ntoh măt an lĕ rngôch ăp ntil tơm tăm êng lĕ an kônh wa hơm răm. Wa Nguyễn Văn Hải, Groi kruanh UBND nkuăl A Lưới an gĭt:

Aƀaơ geh 2 nău ƀư, ngoăy lah nău ƀư A Za Kăn n’hanh 2 lah nău ƀư Aza Koonh. A Za Kăn ri ăp năm ƀư yơn ăp nău ƀư ri đêt lơn. A Za Koonh ri ƀư ăp năm, 5 năm mô lah 10 năm du tơ̆, rnôk kônh wa geh ăp năm săk play lăy mbôn, nău rêh ah ƀon lan dơi tŏng hom, uĕh lăng, săk soan ri rnôk nĕ ƀon lan ăp rnoi mpôl đêt kơt ăp ƀon, ƀư brah an huêng ba kơt ăp brah huêng an khân pơng nău rêh hơm răm.

Lễ Aza bah ƀon lan nkual yôk A Lưới geh nău ƀư brah n’hanh gưl hội. Lĕ rngôch nsĭt ăp nkô̆ nău văn hóa huêng phan n’hanh nău nsum mpôl uĕh ntŭk bri dak Trường Sơn.