Tĭng hoạ sỹ, giám tuyển Lê Thiết Cương, boh geh nau khlay ngăn ma 11 ntil mpa êng ri mô geh. Rup Bih ueh ngăn ma Phật giáo, nau vay ôp brah bih lah du nau vay tă bah ơm bah rnoi Việt Nam đah bar nau khlay nê lah mpa khlay ndrel brah dak. Mô êng lah nau ơm, ma ăp hoạ sỹ hôm ân lah ntil mpa aơ geh tât nau khlay êng đŏng:

            ‘Ất Tỵ 2025, năm kon bih lah nau ntoh mhô, lah mpa geh nau ueh kơt nê, khay 1 lah khay yau, khay bar lah khay eo, khay 3 lah khay kir ndrel khay puăn lah khay Bih. Kơt lah, tâm 8 nau geh sŏk uănh mât rdâng nê, ăp nau geh ntoh mhô gay uănh ti nau geh mpơl uănh bôk năp lah Trôk, lah khay 4, khay bih. Trôk ta aơ nâm ân gĭt lah ntil ang kơt nê, blau kơt nê, păng đŏng lah du ntoh mhô, du nau ŭch, du nau rhơn đah ăp nŭih nghệ sĩ lah năm Tỵ tât hôm, ân geh kơt tĭng ăp nau ŭch bah trôk, neh, nau blau bah nau mhe gay geh ăp nau ueh lơn, geh nau rgâl êng đŏng”.

            Ntoh nau ăp rup nkoch âk ntil mpeh bih, ăp hoạ sĩ dŏng ăp ntil ndơ êng êng kơt bột màu, nkhêp n’ha rđaih, trah si, acrylic, sơn dầu, sơn mài, ăp nau rup mom ma uk, ma loih...Lah kơt hoạ sĩ Lê Thiết Cương vẽ rup tâm neh uk đah rup bah 2 mlâm bih tâm ƀar ri nau dăch dŭt bah Kinh Bát Nhã ri hoạ sĩ Nguyễn Hồng Quang kŏ ntoh rup bih dăng ueh đah rup uk Hương Canh.

            Đah nau uănh ueh mhe, ăp hoạ sĩ mô êng knŭng vẽ ueh bah ntil mpa aơ ma hôm njoăl ăp nau ueh ngăn mpeh nau rêh. Hoạ sĩ Hoàng Phương Liên mbơh:

            ‘Ăp hoạ sĩ tâm mpla n’hơ rup bah nơm, geh ntoh nuih n’hâm đah sơn dầu, geh ăp nŭih nkra bah rup sơn mài yơn ăp nê ntoh luh âk nau ueh bah du mlâm bih mlah ndrel ueh uănh. Rup gâp lah đah rup n’ha rđaih nkhêk, du ntil rup mhe ngăn. Gâp ŭch nkah tât ăp nŭih rup geh nkra ueh, rup rnăk vâl bih gâp geh Me mbŏ ndrel pe mlâm bih. Gâp ŭch ntoh bih ueh, rnăk ueh, gay ăp nŭih uănh mô klach ma bih”.

            Đah ăp nau nkoch nkah ueh mpeh bih, tâm nau mpla n’hơ “tết Tỵ 2025” ntil aơ jêng rbăn, mleh ndrel tâm dăch ma nŭih. Hoa hậu, nŭih nkra nau Ngọc Hân, mbơh:

‘Bah năp nơh, ăp nŭih klach ngăn ma bih kơt nê, ri ma ăp hoạ sĩ lah nsum kŏ mô ŭch ôh ƀư nau tât kon bih. Yơn đah mpla n’hơ Tết Tỵ 2025 aơ, phung he mra dơi saơ âk rup ueh, ăp nau ueh êng êng bah kon bih ndrel tâm nê nơm saơ ăp nau ueh mleh, ăp rup geh ak màu, âk nau mhe ngăn. Săk Ngọc Hân nơm kŏ lah hoạ sỹ mỹ thuật, lah du nŭih ê nkra ri rhơn ngăn rnôk geh dŏng rup bah hoạ sĩ Lê Thiết Cương gay ma njêng luh ao jong’.

            Đạo diễn điện ảnh Vương Đức, nkoch:

            ‘Nơm ân geh saơ nê kơt lah du ntoh mhô, mpeh rnôk dôl ma hăn, âk ngăn ntŭk tât chùa kŏ geh bu ôp brah bih, nơm ân rƀŏng tât ăp nau lap tâm nê. Gâp mĭn ăp hoạ sĩ năm aơ ŭch ntoh nau ŭch bah nơm bah năp rnôk dôl hăn, rup “Trong rêh jêng” vẽ bar mlâm bih tâm ƀar jêng rup vuông, rup rvăl, êp nê lah n’ha si, ngăn lah n’ha lah măt dăng, păng nkoch tât nau mô geh khĭt tâm nau rêh, nau geh dơi mro bah nau rêh”.

            Mô êng knŭng geh ăp rup bih, mpla n’hơ rnôk aơ hôm geh tât du jrâu rup ueh âk ntil ăp ntil nau ueh bah ăp rup êng êng đŏng. Ntơm bah ƀon tơm bah hoạ sĩ Nguyễn Thanh Quang, ăp rup mpa, kao ueh bah hoạ sĩ Bình Nhi, nŭih uănh mra geh lăp tâm ăp ntil kao mai, kao mận nkuăl prêh bah hạ sĩ Vương Linh, rhơn hăn pâl năm mhe ndrel hoạ sĩ Việt Anh ndrel Hoàng Phương Liên...njêng ăp nau ueh tâm ăp nar bôk năm 2025./.