Rlau 90 năm, yơn nghệ nhân ưu tú Lò Văn Biến, rnoi Thái tâm ƀon Cang Nà, Phường Trung Tâm, nkuăl têh Nghĩa Lộ, n’gor Yên Bái ăp nar hôm gơih nti play săm ƀŭt Thái ndrel ăp nau njroh xoè ơm bah rnoi Thái ân ăp cán bọ ndrel ƀon lan tâm ntŭk. Wa nkoch, tâm rnôk rđau kan cách mạng, rđau kan ndâk njêng ndrel hun hao neh dak, Đảng nơm mro uănh khlay gay ntô̆ n’hao nau kan bah ơm yau. Rơh rƀŭn nchră nau ơm lam dak geh tâm khay 11/2021, Tổng Bí thư Nguyễn Phú Trọng âk tŏ lah rjap ‘Nau ơm yau lah nau njêng nuih n’hâm bah nau rêh, nau ơm yau hôm ri rnoi mpôl hôm, nau ơm yau roh ri rnoi mpôl roh”. Gĭt kloh nuih n’hâm nê, ndrel ma nau ŭch, nau rnơm mpeh nau ueh ơm bah rnoi nơm, wa dŏng lôch nau rêh ân nau mĭn, mbơh, ndâk ăp nau ueh ơm bah rnoi Thái. Wa Biến nkoch:

‘Hŏ lah rnoi Thái ri ăp nŭih ân gĭt rnoi nơm ri moh nau geh ueh ơm ngăn ngên. Ăp nŭih bu ranh, ăp nŭih gĭt ri ân nkoch trêng gay ma ăp nŭih bu kơt tĭng”.

Êng wa Biến, tâm xã Nghĩa Lộ, n’gor Yên Bái rnôk aơ, tâm ăp ƀon hôm âk kônh, yơ, wa, ăp nŭih gĭt nau vay ueh bah rnoi Thái, ntơm bah play săm ƀŭt tât nau njroh mprơ, ndơ goh, ndơ sa, ăp nau pâl ueh ơm...Bu dôl dŏng âk n’hâm gay ma mât, ntĭm tay ân rơh mom đah nau ŭch, ăp nau ueh nê ân geh mro mrăng.

 Tâm Sơn La-nkuăl neh geh 12 rnoi mpôl oh nô ndrel rêh, gĭt nau mĭn bah Krianh Hồ Chí Minh “Nau ơm yau ang trong ân ƀon lan hăn” ndrel nsôih ƀư tĭng trong bah Đảng ân jêng nâp, hun hao nau ơm Việt Nam, tâm nê êng săk Tổng Bí thư Nguyễn Phú Trọng ăp tŏ lah rjăp “nau ơm yau hôm ri rnoi mpôl hôm, roh nau ơm yau ri roh rnoi mpôl”... ăp năm ma aơ, gưl uỷ, n’gâng kan ndrel nŭih ƀon lan ta aơ mro uănh khlay nau mât, ƀư ueh nau khlay đah ăp nau kan, nau ƀư ngăn, n’hêl. Wa Quàng Thị Xuyến, Kruanh ban Văn hoá, Xã hội, Hội đồng nhân dân n’gor Sơn Lan, ngơi:

 ‘Tât rnôk aơ, HĐND n’gor Sơn La hŏ ntrŭnh 05 nau ntrŭnh geh tât nau kơl an mât, ƀư ueh ăp nau khlay nau ơm yau bah rnoi mpôl. Mặt êng, ăp nau kan kơl an hun hao nau ơm bah rnoi mpôl geh ƀư nsum tâm nkô̆ nau bah neh dak hun hao văng sa, rêh jêng nkuăl rnoi mpôl đê̆ ndrel gôl yôk. Rnâng kan HĐND n’gor kŏ jao ân Rnâng kan bah HĐND n’gor uănh ƀa ƀơ đah nau kan pă, ntop tơm prăk kơl an đah nau ntrŭnh geh tât nau ơm yau”.

 Rnôk hôm rêh, Tổng Bí thư Nguyễn Phú Trọng uănh khlay ngăn tât nau mât ndrel ƀư ueh nau ơm yau ăp rnoi, ăp nau khlay ơm bah ăp nkuăl, ntŭk bah ăp rnoi, tâm rgop nsum ma nau ueh ơm bah rnôk mhe ndrel nau ŭch bah ăp rmôt nŭih ƀư nau gĭt kan, văn nghệ sĩ gơih, blau, geh nau dơi ndrel ndâk ân dơi du nau ơm yau Việt Nam ueh, ăp ntil nau ơm. Tâm rnôk rƀŭn Văn hoá lam dak năm 2021, Tổng bí thư âk tŏ nkah: “Nau ơm yau lah huêng bah rnoi mpôl, nkoch tât nau ueh ơm bah rnoi mpôl. Nau ơm yau hôm ri rnoi nơm hôm”...

Ndơn saơ nau nê, nô Thạch Sroh, tâm xã Đôn Châu, nkuăl Duy Hải, n’gor Trà Vinh, lah Hội viên bah Hội Văn học Nghệ thuật n’gor mbơh, ăp nŭih văn nghệ sĩ Khmer rơh rlau aơ geh âk nau rgop tâm nau mât ndrel ƀư ueh nau ơm bah rnoi mpôl. Êng săk nô nơm, rơh tât mra lŏ ƀư ueh lơn nau kan mpeh nau ơm. Mpeh nau roh bah đồng chí Tổng Bí thư Nguyễn Phú Trọng, nô Thạch Sroh ntoh nau rngot ngăn:

‘Tổng Bí thư Nguyễn Phú Trọng dŭt n’hâm geh nau blau, wa blau uănh kơl an mpeh nau ơm yau bah rnoi mpôl Việt nam lah snum, ngăn ngên uănh khlay, bonh đă, kơl an ăp rnoi mpôl mât ndrel ƀư ân ueh nau vay ơm bah rnoi nơm. Rnôk aơ, rnôk tăng lah Tổng Bí thư roh, gâp ndrel kônh wa rnoi Khmer rngot ngăn, dăn nkah mro nau kan, ăp nuih n’hâm ueh bah păng đah rnoi mpôl nơm”.

Nghệ nhân ưu tú Lâm Xuân, tâm xã Tân Mỹ, nkuăl Trà Ôn, n’gor Vĩnh Long ân lah, wa ŭch ngăn nau rêh, nau kan bah Tổng Bí thư Nguyễn Phú Trọng, nsôih ƀư ăp nau kan yơn lah dŭt tâm dăch dơh. Ngăn lah, Tổng Bí thư Nguyễn Phú Trọng uănh khlay mpeh nau ơm, ndâk, mât ăp nau ueh ơm bah kon nŭih Việt Nam. Tổng Bí thư roh, lah neh dak roh nŭih blau, Đảng roh du hê đảng viên, du hê cán bộ lôch n’hâm, yor neh dak, yor ƀon lan. Nghệ nhân ưu tú Lâm Xuân, mbơh tay:

 ‘Tổng Bí thư geh nuih n’hâm mleh, ŭch rŏng bah ăp rnoi mpôl đê̆, tâm nê geh rnoi Khmer. Wa uănh, kơl an nau mât ndrel ƀư ueh nau vay ơm bah rnoi mpôl, mô ân geh roh rui. Săk gâp dŭt n’hâm nsôih ndrel nkah ngăn nau kơl an bah Tổng Bí thư”.

Hôm wa Thạch Si Phone, Kruanh rmôt kan Nghệ thuật tổng hợp Khmer Bạc Liêu mbơh, lah nŭih ƀư nau kan nghệ thuật, gâp gŭt n’hâm ryơk, nkah ăp nau mĭn, nsôih bah Tổng Bí thư Nguyễn Phú Trọng đah nau ơm bah rnoi mpôl, pơk trong ân ăp nŭih gĭt nau blau mhe, rgop âk lơn ân nghệ thuật neh dak nơm. Wa Thạch Si Phone, ngơi:

 ‘Tổng Bí thư Nguyễn Phú Trọng lah nŭih ân geh ryơk prêh. Wa hŏ nsôih lôch n’hâm yor Đảng, ƀon lan, tâm nê geh ăp rnoi mpôl đê̆ ndrel vay ntoh tâm ăp rơh rƀŭn bah Đảng tâm nau ƀư nau ntrŭnh mpeh nau ơm yau. Rnôk aơ wa mô hôm, săk gâp nkhah klâng ngăn. Đah nau ƀư lah du hê văn nghệ sĩ gâp nsôih ƀư tĭng ăp nau ŭch bah wa rnôk hôm rêh, lah kơl an ndrle nsôih ngăn ân nau ndâk ndrel hun hao nau ơm bah rnoi Khmerr’.

 Nau tĭng drâu phan bah Tổng Bí thư Nguyễn Phú Trọng lah du nau roh hoach têh đah Đảng, Ngih dak, ƀon lan he, ăp nŭih ƀư nau kan njroh mprơ bah lam dak lah nsum, ăp nŭih ƀư njroh mprơ bah rnoi khmer lah êng. Yơn lah, ăp ntil ndơ khlay ndrel nau nsôih bah Tổng Bí thư đah nau ơm yau bah rnoi mpôl hôm tâm nê, ăp dĭng lĕ he ân geh nau kan ndrel ndâk njêng ân dơi du jâng kan ơm yau Việt Nam geh nau ueh, ăp ntil nau ơm yau bah rnoi mpôl kơt tĭng nau mpŏng ŭch bah đồng chí Tổng Bí thư./.