Chrôi Rum Chếk (lễ hội lah uĕh dak lêng) dơi uănh lah ngoăy tâm  ăp lễ hội way ơm ndjôt săk tơm rup uĕh văn hóa rnoi Khmer. Lễ hội geh nkô̆ hôr gay dăn an nuĭh hăn dak lêng tât to rho aơ, lơh joi geh âk tui ka n’hanh nkah gĭt dak lêng hŏ an kon nuĭh tui ka âk mpưm.  

        Lễ hội Chrôi Rum Chếk dơi ƀư ta ấp Cà Lăng A Biển, phường 2, thị xã Vĩnh Châu, n’gor Sóc Trăng. Tĭng nuĭh ƀon lan ta aơ, lễ hội hŏ geh bah dŭt ơm, nklăp 300 năm aơ. Lễ hội Chrôi Rum Chếk ƀư tâm nar 14, 15 khay 2 Âm lịch ăp năm geh nkô̆ hôr dăn an neh dak mô geh nău tâm lơh tâm su ƀon lan  đăp mpăn, mih  lăng prăng uĕh. Aơ lah rnôk gay nuĭh ƀon  lan nkah tât ăp nuĭh ntơm chŏl trong pah neh njêng ƀon, nkah gĭt trôk neh, brah yang an khân păng geh dơi nău rêh hơm răm, nkah gĭt dak lêng hŏ an khân păng âk tui ka. Wa Sơn Thol, Achar têh chùa Sêrây Cro Săng, phường 2, thị xã Vĩnh Châu, n’gor Sóc Trăng an gĭt:

Kônh wa ƀon lan ta aơ lơn âk rêh nsing tâm dak lêng lơh joi tui, ka kơt nê lah kônh wa ƀon lan he ƀư nar dăn nău đăp mpăn ăp năm gay mpơl nuih  n’hâm nkah gĭt tât dak lêng hŏ kơl khân păng geh nău rêh hơm răm. N’hanh lễ hội dơi mât ƀư mbro ăp năm an tât aƀaơ.

Ntơm bôk lễ hội lah kuăl klaih huêng dơi ƀư bah meng ăp yôk choih gay nkah gĭt n’hâm suan u che yău ye kăl e nơh, nkah gĭt dak lêng n’hanh dăn an ăp nău dŭt uĕh lăng mbra tât đah ƀon lan. Lôch nê lah lễ wơt ndah rup Phật bah chùa Sêrây Cro Săng tât nkual ƀư ôp brah lễ. Rnôk ndah rup Phật dơi wơt tât ntŭk ƀư ôp brah ăp nuĭh mbra ƀư nău way mbah Phật kỳ, lôch nê wơt ndah rup Phật tâm trôm n’hanh n’gân an uĕh. Lôch nê lah lễ tam bảo, dăn an neh dak manh uĕh ƀon lan đăp mpăn, chon mbah n’hanh thuyết pháp tă bah ăp sư mât uănh đah nău tât râng bah âk mpưm kônh wa kon chroh phật.

Lôch ăp nău way ƀư săk tơm chroh rƀŭn lah gâl pâl rlưn đah âk ndơ pâl thể thao, văn hoá njroh mprơ geh âk săk tơm rnoi nuĭh. Ăp ndơ pâl rlưn lơn âk mpơl tay ăp nău kan tơm khlay ma nuĭh ƀon lan lơh joi ka ta aơ way dŏng gay joi nău rêh. Lơn âk nchreng an uănh nău njroh mprơ tâm lễ hội dja dôl wăch rgum âk mpưm kônh wa tât râng. Nê lah lah ăp điệu múa, nău mprơ, ndơ uh goh way ơm săk ntơr êng bah ƀon lan Khmer.

Ăp năm mhe aơ, dơi geh nău mât uănh, rđău đă bah ăp gưl, ăp n’gâng kan, Lễ hội Chrôi Rum Chếk mô rlu dơi rgâl uĕh, n’hao lĕ mpeh nkô̆ nđăp ma săk uĕh, wăch rgum âk mpưm kônh wa tât râng, njêng “rse” têk nthoi lhăt nău tâm rnglăp, tâm rŏng tâm kơl nsum đah 3 rnoi nuĭh oh nô Yăn – Khmer - Hoa dôl gŭ rêh ta nkual neh dak lêng dja. Achar Sơn Thol an gĭt tay:

 Ntơm nơh ri ƀư đah rnoh jê̆ lơn, yơn lễ hội way dơi mât kơn mbro. Ăp năm aơ, geh nău tâm uănh khlay bah Đảng, Ngih dak, n’gâng kan ta ntŭk lễ hội ƀư têh hvi lơn. Aƀaơ, geh trong me, điện gay ƀư lễ hội, ndơ gay ƀư ôp brah dơh geh, uĕh lơn.

Năm aơ, lễ hội Chrôi Rum Chếk bah ƀon lan Khmer Vĩnh Châu dơi Bộ Văn hoá, Thể thao n’hanh pâl nđaih kơp dơn lah drăp ndơ ơm yău ntlơi an tay văn hoá mô mpơl săk gưl neh dak. Aơ lah nău rhơn têh, lah nău nchih nkah ăp nău nsrôih mô gŭ rlu tâm nău mât ndray n’hanh ntik n’hao rnoh khlay văn hoá way ơm bah ƀon lan Khmer ta Vĩnh Châu. Wa Sơn Wath, nuĭh kan tâm Ban Quản trị chùa Sêrây Cro Săng, nkoch tay nău rhơn:

Kon chroh phật chùa Sêrây Cro Săng, kônh wa 3 rnoi nuĭh oh nô dŭt rhơn mƀak, dŭt nđơr, dŭt rhơn tâm nuih n’hâm, lễ hội dja hŏ ơm geh bah rhiăng năm aơ hôm, jêng drăp ndơ ơm yău ntlơi an tay văn hóa mô mpơl săk lah nău rhơn têh.

Wa Trần Trí Vân, Groi kruanh UBND thị xã Vĩnh Châu, n’gor Sóc Trăng an gĭt tay:

Mpôl hên mbra n’hao dăng nkoch trêng, ntĭm nti nsum mpôl, ƀon lan kon chroh phật, kônh wa ƀon lan, lơn  lah đah rơh kơn druh ndăm mpeh ăp rnoh khlay đah lễ hội dăn lah uĕh dak lêng (Chrôi Rum Chếk) hŏ dơi bộ Văn hoá, Thể thao n’hanh Pâl nđaih kơp dơn lah văn hoá mô mpơl săk dơi gưl neh dak, mât kơn mbro n’hanh ƀư ăp nău kan ăp năm, rdâk tay n’hanh  mât ndray ăp nău way ƀư ôp brah lah yang, ăp ntil nău njroh mprơ way ơm, nkre đah lễ hội.

Lễ hội Chrôi Rum Chếk geh lịch sử têh jêng dŭt jŏ ơm, dơi mât ƀư mbro, mât ndray rlău ăp rơh kơn. Bol rlău âk njăr trong rdjuh thăng bah lịch sử, yơn tât aƀaơ lễ hội dja nha hôm geh suan ring lam, hun hao n’hanh jêng ngoăy tâm ăp lễ hội ntoh lư đŏng, uĕh êng bah n’gor Sóc Trăng, wăch rgum âk mpưm năch dăch ngai tât râng./.