Dôl mât chăm mir nkao bah năp ngih, yuh Y Doan mbơh, nchrăp rnôk rlu Lễ Quốc khánh 2/9, rnoi xơ Đăng tâm Kon Jong hŏ mra ăp nau ueh gay ma vơt năch tât. Ntơm bah rnôk tâm rngop gay ndâk ntŭk kan tâm boh nau kan tuch tăm, pâl n’aih Ngọc Réo, kônh wa hŏ blau mât răk ntŭk ntu, ƀư ueh ăp nau ơm yau kơt lah tur chĭng, njroh mprơ, hun hao tay nau n’gon ndrănh yăng, tanh njuh, ƀư ăp ndơ sa kah bah rnoi nơm...gay rhŏ ân năch. Yuh Y Doan nkoch:

            ‘Phung hên hŏ nchrăp ăp tŏng mpeh ndrănh yăng, ăp ntil ndơ sa kah bah rnoi nơm, ndơ sa, ndơ ngêt ân bu năch tât ta aơ gay ma ngêt sa. Phung hên mra kơl an năch ăp nau ueh gay ma bu năch geh rhơn m’ak ngăn ngên tâm nar rlu lễ Quốc khánh 2/9 ngăn ngên m’ak ngăn, gay jêh aơ ri rnôk sĭt ri bu năch nkah gĭt ma hên, bu năch mra lŏ tât aơ tay đŏng, jêh ri mra tât rơh tal bar, tal pe tay”.

            Rhơn vơt năch, yuh Y Hoa ndrel ăp oh nur tâm thôn hŏ nchrăp ueh tay ntŭk ndrơ tăch ân năch rnôk bu hăn pala n’aih tâm dak Đăk Lôi aơ. Ta aơ geh âk ngăn ntil ndơ OCOP bah nkuăl, kơt lah dak sŭt, ƀăng kro, cà phê...ndrel ngăn lah ndrănh yăng, du ntil ndơ ngêt kah tâm Kon Jong. Yuh Y hoa mbơh, bôk năp yuh n’gong ndăng gay ma tăch ân ƀon lan tâm nkuăl dơm. Jêh nê nar lơn ma âk nŭih nŭih ŭch rvăt bah trong mạng xã hội, jêh ri ntŭk pâl n’aih geh pơk luh, n’gon ndrănh jêng nau njêng geh prăk ân âk nŭih tâm ƀon.

Yuh Y Hoa, kruanh rmôt ƀư tâm boh nau kan n’gon ndrănh yăng Kon Jong, rhơn mbơh: ndrăng geh ƀư tă bah phe m’êt tă bah ƀon lan nơm tăm, n’gon ma ndui tă bah n’ha si tâm bri, ri ma kah ngăn ân nŭih geh ngêt:

            ‘Gay rhŏ ueh ân năch pâl n’aih, gâp n’gon ndrănh yăng tĭng ntrong nkre mât dơi nau kah ueh ơm, nkre đăp mpăn răk kloh ndơ ngêt sa, geh ntô lir, geh dŭng tala ueh đŏng. Ntơm bah nar n’on ndrăng gâp saơ mô êng leo tât nau geh văng sa, tă bah nê rgum ăp oh nur tâm thôn ndrel n’gon ndrănh đŏng. Hên hŏ pơk hvi neh tăm ba m’êt gay ma sŏk phe n’gon ndrăng yăng tăch ân bu năch tât pâl n’aih”.

            Nkuăl pâl n’aih êp dak Đăk Lôi, xã Ngọc Réo geh âk lŏ têh, bar đah kơh tơm ji jêng ngăn, ntŭk gŭ n’ik ueh tâm lôch năm. Ntŭk aơ geh n’gâng kan tâm nkuăl rgum jêng ntŭk pâl n’aih nsum. Đah nau kơl an bah ngih dak, kônh wa ndrel ndâk ntŭk tâm boh ƀư nau kan pâl n’aih Ngọc Réo, ndâk âk ntŭk nkơp jê̆ ma ăp tơm si, tơm gle, pơk njêng ăp ntŭk mpla n’hơ ăp ndơ ueh kah ngăn tâm ƀon gay ma rhŏ ân năch. Nô A Thảo, Bí thư chi bộ thôn Kon Jong, mbơh, pâl n’aih nsum mpôl dôl pơk luh trong hăn mhe đah rnoi Xơ đăng. Rnôk aơ lah Giám đốc ntŭk tâm boh nau kan tuch tăm, pâl n’aih Ngọc Réo, nô A Thảo nkoch: nau dơi têh ngăn tă bah nau kan aơ lah kơl an kônh wa rgâl nau mĭn, nau kan, ntơm bah nau rêh ăp nar tât nau kan văng sa:

            ‘ngăn lah kơt tâm thôn hên, gâp ƀư nau yơng kon ntil kao, tơm n’hâm ndrel pă ân ăp rnăk vâl gay ma khân păng sĭt tăm njok trong ƀon ndrel nau ueh ngăn bah rnăk vâl. Tâm ntŭk dak Đăk Lôi kŏ mât nau ueh ƀa ƀơ gay ma rep kloh ntŭk, tăm tơm si, ndâk nkơp ndrel đă hưl kan ba lơ kơl an prăk gay ndâk ntŭk ntu. Rnôk aơ, kônh wa tâm thôn râng nau tâm boh ƀư nau kan pâl n’aih Đăk Lôi hŏ hao tât 20 nuih kan nsum hôm”.

            Tât pâl n’aih nsum mpôl tâm êp dak Đăk Lôi tâm rnôk aơ, bu năch geh rnglăp nsum nơm đah bri gleh, pâl n’aih ơm yau, ngêt sa ơm bah rnoi Xơ đăng. Ntŭk ueh, kloh ndrel nau vay ơm ăp ntil ta aơ dôl kơl an kônh wa rnoi Xơ đăng tâm Kon Jong, Ngọc Réo, Quảng Ngãi geh nau rêh hơm răm./.