Trong tă bah xã Đăk Tơ Ve hăn xã Hà Tây, nkuăl Chư Păh, geh nkra bah tơm prăk Bôk nau kan 1719, hŏ ƀư rgâl nau hăn ro bah ƀon lan ta aơ. Bah naơ nơh, trong aơ rluh mro tâm yan mih, ƀư jêr hăn ndrel jêr rdeng ndoh ndơ. Yơn đah nau ntuh kơl nkra nâp, trong jong 10 km ndrel hvi 5,5 m hŏ geh nkra, kơl an kônh wa tâm xã jêr ngăn bah nkuăl rdeng ndoh ndơ nơh, ntrŭt dăng hun hao văng sa.

            Ndrel ma nê, Bôk nau kan 1719 tâm 3 năm rlau aơ hŏ leo tât nau mhe mpeh văng sa, rêh jêng ân nkuăl Chư Păh. Rnoh rnăk ach o bah nkual huch 3,82% rđail năm 2021 rnơm tâm nau kơl an bah ăp bôk nau kan ndrel Bôk nau kan bah neh dak. Ăp nau kan hun hao văng sa nsum mpôl kơt lah nau kan tuch tăm, mât rong hŏ kơl an âk rnăk geh âk prăk. Wa Luyện Ngọc Toàn, Kruanh Jrâu kan rnoi mpôl đê̆ nkuăl Chư Păh, mbơh:

            ‘Đah rnoh ntoh kơl 143 rmen tă bah ăp bôk nau kan, geh ăp nau kan văng sa, rêh jêng, rnă njrăng đăp mpăn chính trị. Bôk nau kan hŏ geh nau tât đah nau rêh drăp ndơ ndrel nuih n’hâm bah ƀon lan rnoi mpôl đê̆, leo tât ăp ngih ueh nâp ân ƀon lan ach o, leo nsĭt dak kloh ân nŭih ƀon lan; ntĭm nti, dak si, ntĭm nti nau kan, đăp mpăn nau rêh nar lơn geh nau kơl an”.

            Tâm ban ma nê, tâm nkuăl Phú Thiện, Bôk nau kan 1719 hŏ leo nsĭt ăp nau geh kơp dơn tâm nau rgâl ngih vâl gung trong ndrel n’hao nau rêh bah ƀon lan. N’gâng kan tâm nkuăl hŏ rgum ntuh kơl nkra trong tât xã, trong dak, pơk trong nơih ân tuch tăm ndrel trong hăn. Ngăn lah, ăp nau kan văng sa kơt tăm tơm sa play ndrel mât rong tĭng nau nâp nâl kơl an ma rhiăng rnăk ƀon lan geh prăk đăp mpăn. Rnơm nau kơl an bah ăp ntŭk, rnoh rnăk ach o tâm nkuăl hŏ huch ntơm 13% jur hôm 7,5%. Wa Nguyễn Anh Tuấn-Uỷ viên nkuăl, Groi Kruanh UBND nkuăl Phú Thiện mbơh:

            ‘UBND nkuăl Phú Thiện hŏ râng kơl nchră nau ân Rnâng kan nkuăl uỷ, ndâk nau nchrăp ntrŭnh n’hêl. Ăp ntŭk kan ndrel jrâu kan hŏ ƀư n’hêl đah ăp nau nchrăp kan geh ntrŭnh ƀư. Jêh 3 năm ntrŭnh ƀư nkuăl hŏ pă tơm prăk geh leo dŏng ah 45 rmen, geh bơi tât 50%”.

            Tâm 3 năm ntrŭnh ƀư Bôk nau kan 1719, n’gor Gia Lai hŏ geh âk nau kan geh ntoh lư. Tât rnôk aơ, n’gor hŏ ƀư jêh 12 tâm rnoh 31 nau kan, rlet mô lah geh nau nchrăp luh. Ngăn lah, nau kan gŭ âm ndrel dăp rgum đăp mpăn ƀon lan tât gŭ mhe bah dih nau nchrăp kŏ geh 97%, rlet 2% rđil nkô̆ nau. Rnoh ƀon lan geh trong ndeh têt tât nkuăl kŏ geh ƀư nâp 100%, kơl an nthoi ăp nkuăl jêr jŏt. Rlau 97% rnăk ƀon lan rnoi mpôl đê̆ geh dŏng dak kloh. Rlau 98% thôn geh ngih rƀŭn rgum, ndrel rlau 80% thôn ƀư nau rƀŭn rgum, jroh mprơ nâp ueh. Rnoh rnăk ach o tâm nkuăl rnoi mpôl đê̆ huch bơi tât 13%, n’huch 4,3% rđil năm 2021. Wa Trương Trung Tuyến-Groi Ban Dân tộc n’gor Gia Lai mbơh tâm rơh tât, ăp gưl uỷ ân lŏ ƀư ueh nau rđau kan, rđau đă nâp gay bôk nau kan leo nsĭt nau săk tam ngăn, kơl an nŭih roi mpôl đê̆ hun hao nâp nâl:

            ‘Rơh tât lah rnôk khlay, ân geh nau lăp kan bah ăp gưl uỷ n’gâng kan bah ăp gưl. Mpeh Ban Dân tộc lŏ kơl nchră nau ân UBND n’gor gay kơp ăp nkô̆ nau tâm rơh rlau aơ hôm nkol gay ma doh rklaih, nsôih rgum đah nkô̆ nau Ngih dak ndrel ƀon lan ndrel ƀư gay nau dăng bah ƀon lan rnoi mpôl đê̆ geh leo lăp dŏng săk tam"”./.