VOV4.M’nông: Nau ƀư têk bu ân tâm ban ma nơm mpeh rnoh kơl an ân ăp rnoi mpôl tâm ăp nkuăl rnoi mpôl đê̆ ƀư jêng nau hun hao mô tâm ban. Tâm rnôk nau ngăn, rnoh jêr ri êng êng, nau geh ndơn gĭt ri kŏ êng êng, nau mơng ơm ndrel nau kan tuch tăm kŏ êng êng. Ndri ma nau ntuh kơl jêr ngăn leo tât nau săk geh văng sa kơt ma nau ŭch. Ndri ma, moh ntrong kan gay ân hun hao văng sa rêh jêng nkuăl rnoi mpôl đê̆ ndrel gôl yôk nê lah nau ma ăp n’gâng kan mĭn rvê mpeh rnoi mpôl rgum ƀư tâm rơh rlau aơ.

            Nau ngăn geh kơp dơn tâm du đê̆ nkuăl nŭih rnoi mpôl đê̆, du rnăk nŭih rnoi mpôl đê̆ geh ndơn ndơ kơl an bah 4 nau kan êng êng, yơn nau tơm bah ji ngot ach o lah neh mô geh ndrel nau blau ƀư kan tuch tăm ri kônh wa geh ê geh ndơn. Bah nau kơp uănh nkuăl rnoi mpôl đê̆ ân saơ: Rnoh rnăk ach o  ăp năm rlau aơ n’huch ngăch, yơn ê geh nâp nâl, nau mra plơ̆ tay ach o hôm âk, âk rnăk mô tŏng neh tuch tăm, neh gŭ, ê geh dŏng dak kloh ueh. Tâm du đê̆ ntŭk, nau kan hôm tâm rkăng, mô blau nau kơl an lor ntŭk ntrong rgum.

            Lơ 14/10/2021, Thủ tướng Chính phủ ntrŭnh Bôk nau kan nkô̆ nau bah neh dak hun ghao văng sa rêh jêng nkuăl rnoi mpôl đê̆ ndrel gôl yôk lvang năm 2021-2030. Lvang ngoai ntơm năm 2021 tât năm 2025 mra ntrŭnh tâm 10 nau kan rklaih mpeh neh gŭ, neh tuch tăm, dak dŏng,  rgum, pă ân đăp mpăn ntŭk gŭm, hun hao nau kan tuch tăm bri ân nâp nâl, ntoh kơl ngih vâl gung trong ueh nâp, hun hao nau kan ntĭm nti, n’hao nau tơm ân nau kan mât ndray, hun hao nau ueh khlay ơm, nau vay ơm geh nsum ma nau hun hao pâl n’aih, mât chăm n’hâm soan ân nŭih rnoi mpôl đê̆, ƀư ueh nau tâm ban bu ur bru klô, ntuh kơl hun hao rmôt rnoi mpôl đê̆ nŭih ndrel rmôt rnoi mpôl hôm mâp nau jêr, mât uănh, njrăng ƀư, nchră nau kan ƀư tĭng bôk nau kan.

            Tĭng wa Bùi Sỹ Lợi, Groi Kruanh Uỷ ban mpeh ăp nau rêh jêng kon nŭih bah Quốc hội, bôk nau kan bah neh dak hun hao văng sa, rêh jêng nkuăl ƀon an rnoi mpôl đê̆ ndrel gôl yôk lvang năm 2021-2030 ndơ̆ luh tâm rnôk nơm dôl kol tâm 2 bôk nau kan bah neh dak. Nê lah bôk nau kan nkô̆ nau bah neh dak ndâk njêng ƀon lan mhe, ndrel bôk nau kan bah neh dak n’huch ach o nâp nâl. Ndri ma, ân geh nchră lôch 2 bôk nau kan gay ƀư ân kloh ăp nkô̆ nau ntuh kơl ân nkuăl rnoi mpôl đê̆ ndrel gôl yôk ntŭk tât. Hôm e lah ăp nau kan tơm ma nau kan ê dơi geh rklaih ri Bôk nau kan bah neh dak hun hao văng sa, rêh jêng nkuăl nroi mpôl đê̆ ndrel gôl yôk ân geh rklaih ngăn. Tĭng nuih n’hâm nau ntrŭnh mrô 88 bah Quốc hội lah ntuh kơl gay ma njêng nau dơi geh ân ƀon lan rnoi mpôl đê̆ ndrel gôl yôk đah nkô̆ nau n’hao nau geh, rgâl nau rêh ndrel n’huch oi nai tâm ƀah đah gôl yôk ndrel nkuăl rđŭng. Wa Bùi Sỹ Lợi lah rjăp:

            ‘Tâm 10 bôk nau kan nê rnôk aơ dôl kơp uănh đah du nau kan ơm tâm nau ntuh kơl lah 50 rbăn rmen ân nau ntuh kơl hun hao ndrel 54 rbăn rmen ân bôk nau kan trok tâm ƀa ƀơ, ri uănh nau kan aơ ngăn lah nơm ê geh nau uănh khlay tât nau ntuh kơl hun hao, ma dôl lah rƀŏng tât ân nau kan, ri ma nơm ân geh kơp uănh, mhâm ƀư ân geh tât njêng nkô̆ nau njêngt nau kan, pơk nau ueh ƀư nau rgâl nau mĭn ân kônh wa rnoi mpôl đê̆ ndrel gôl yôk, geh nau dơi gay ma bu râng tâm nau kan hun hao tuch tăm gay ma njêng nau geh jêng”.

            Nau kơp dơn tâm rơh bah năp nơh geh âk nau kan geh tât nau kan aơ, yơn rnôk ăp nau kan mô geh nsĭt nau geh tâm ban, mô lah păng hôm tâm rkăng, wa Đỗ Văn Sinh, Uỷ viên  rnâng kan Uỷ ban văng sa bah Quốc hội lah rjăp tât nau ntrŭnh rmô 88 bah Quốc hội ân ƀư Bôk nau kan rgum hun hao văng sa rêh jêng nkuăl rnoi mpôl đê̆ ndrel gôl yôk lvang năm 2021-2030 leo nsĭt nau ăp ntil ngăn hŏ geh rklaih nau kan aơ. Ndrel kơt lah ƀư bôk nau kan bah neh dak hun hao văng sa, rêh jêng nkuăl rnoi mpôl dê̆ ndrel gôl yôk lvang năm 2021-2030 tĭng nuih n’hâm nau ntrŭnh mrô 88 bah Quốc hội ri mra geh ăp nau kan ân tâm di ndrel nau dơi gay ma rgum rklaih ăp nau kan ndŏ luh tâm nau kan aơ. Wa Đõ Văn Sinh lah:

            ‘Rơh rlâuơ hŏ geh ăp nau kan bôk nau kan bah Trung ương mô lah ta ưbah Trung ương hôm âk n’gâng kan êng êng, tâm dâng nkuăl hôm geh âk ntŭk kan êng êng. Tĭng gâp mĭn ân geh rgum tâm di trong, tâm Trung ương geh dơi jao ân N’gâng kan, tâm dâng n’gor geh jao ân du ntŭk tơm gay ma nơm ân geh tâm ban mpeh nau kan, mhâm ƀư ân nê nơm saơ nơm rgum tu tơm ân tâm di nau kan, nŭih geh kơl, mô geh tâm nkhah, tâm rkăng, mô geh nchlơi êng. Aơ lah nau kan khlay”.

            Rnôk aơ, ăp nkuăl ntơm ƀư nau kan kơl an rnoi mpôl tâm nkuăl, đăp mpăn “nau kan kơl an tât ƀon lan” geh ngăch ngăn ndrel tam ngăn, ndâk njêng nau nchrăp ntop ƀư ân nau ntuh kơl nau kan kơl an đah ăp nkuăl geh ƀư nau kan bah nkô̆ nau kan bah neh dak. Wa Dương Văn Hào, Groi kruanh UBND nkuăl Võ Nhai, n’gor Thái Nguyên, ngơi:

            ‘Bah nau kan kơl an nê hŏ pơk tỏng tam ngăn tât nau rêh bah nŭih ƀon lan. Ngăn lah ndơn gĭt bah kônh wa geh nau n’hao prêh, êp nê nau kan hun hao văng sa kŏ geh âk nau rgâl, nau kan tâm n’ur leo tăch ndơ bah ăp nkuăl kŏ geh nau ueh lơn”.

            Tâm nau kan srê nuh bah Covid-19 geh ƀư tâm nau jêr, têh jong ndrel tơm prăk bah ngih dak ê geh âk, Chính phủ kơl an ƀư ăp nkô̆ nau kan, nkô̆ nau khlay, rgum tâm ăp nkuăl văng sa ngăn ngên geh nau jêr ndrel rklaih ăp nau kan ndal ngăn bah rnoi mpôl./.

            Nŭih rblang: H’Thi