VOV4. M’nông: Ơi kônh wa ndrel băl mpôl, rơh rƀŭn tal bar, Quốc hội gưl XV hŏ geh ƀư tĭng nau kan trực tuyến bah ntŭk ntoh rup tă bah Ngih kan Quốc hội tât 62 rmôt kan ntoh măt Quốc hội ăp n’gor, nkuăl ƀon têh tâm Trung ương. Ndrel ma nau kan ndâk njêng pháp luật, rơh rƀŭn aơ, Quốc hội dŏng âk mông gay ma uănh ăp nau kan văng sa, rêh jêng, tơm prăk ngih dak, ănh ndrel ƀư ăp nau kan khlay êng. Pơh rlau aơ, rmôt kan ntoh măt Quốc hội tâm nkuăl Tây Nguyên hŏ nsôih râng ăp nkô̆ nau rƀŭn, tâm nê geh âk nau kan geh tât nau tâm nkuăl.

            Jêh rnôk djăt nau mbơh mpeh nau nchrăp nau ntrŭnh mpeh du đê̆ nau kan, nau kơl an gay hun hao bah ăp n’gor, nkuăl ƀon têh: Hải Phòng, Nghệ An, Thanh Hoá ndrel Thừa Thiên Huế ndrel nau mbơh mpeh nau nchrăp nau ntrŭnh mpeh nau kan, nau hun hao bah ăp n’gor aơ, Rmôt kan ntoh măt Quốc hội n’gor Dak Lak hŏ tâm nchră, tâm ban ăp nkô̆ nau mbơh đă. Lah nau ntrŭnh geh nchră luh mra pơk trong ân ăp nkuăl ƀư ntrŭnh nau blau kan ndrel ƀư kơt tĭng ăp nau geh dơi ơm bah nơm. Yơn lah, ân geh uănh khlay tât nau săk tam bah nau ƀư kan. Wa Y’Vinh Tơr, Kruanh rmôt kan ntoh măt Quốc hội n;gor Dak Lak, đă:

            “Nau săk tam nau ƀư tĭng ti kŏ tâm ban đah rnôk lah ntơm năm 2022 gay ma pơk trong nơih ân ăp nkuăl geh rơh hun hao. Yor aơ lah ăp nau kan rlong ƀư, du đê̆ nkô̆ nau kan geh êng du ding ngăn ri ân geh năm ƀư kan n’hêl. Tâm nau mbơh mêt uănh kŏ nkah tât lôch năm 2025 lah tâm di gay ma rnôk ntrŭnh ăp nau kan mêt uănh ƀư kan tĭng trong năm nchrăp n’hêl. Ndri ma, tât rnôk nê nơm ân geh uănh tay ăp nau kan nê ân geh săk tam ngăn, tâm ban ngăn ri nơm lŏ pơk hvi ƀư tĭng kơt tâm ăp nau kan njêng ăp nkô̆ nau nsum ân ăp n’gor gay pơk trong nơih hun hao mhe tâm rơh mhe”.

            Râng nau rgop nchră mpeh nau ƀư nau kan, nau dŏng Bảo hiểm xã hội, Rmôt kan ntoh măt Quốc hội n’gor Kon Tum đă ân geh lŏ kơl an mpeh bảo hiểm y tê ân nŭih mô dơi rvăt. Aơ lah nau kan khlay gay kơl an ƀon lan, ngăn lah nŭih rnoi mpôl đê̆ geh nau dơi ƀư dĭng ăp nau kan mât chăm n’hâm soan, n’huch oi nau mbăk jâk mpeh tơm prăk. Wa Phạm Đình Thanh, Groi Kruanh Rmôt kan ntoh măt Quốc hội n’gor Kon Tum mbơh nau, nê lah jêh rnôk Thủ tướng Chính phủ ntrŭnh nau mrô 861 mpeh nau ân dŏng rnoh moh săk bah ăp xã nkuăl III, nkuăl II, nkuăl I tâm nŭih rnoi mpôl đê̆ ndrel gôl yôk lvang năm 2021-2025, rnoh nŭih geh tơm prăk Ngih dak kơl an rgop prăk bảo hiểm y tế bah n’gor âk đŏng.

            Bah nau kơp ngăn bah rmôt kan ntoh măt Quốc hội N’gor Kon Tum ân saơ, lah ăp nŭih mô hôm geh Ngih dak kơl an bảo hiểm y tế, geh âk nŭih mâp nau rêh jêr, mô geh dơi rvăt bảo hiểm y tế ân nŭih ndrel rnăk vâl. Ngăn lah, ăp nŭih aơ ngăn lah nŭih rnoi mpôl đê̆. Tâm rnoh rlau 51.800 nŭih ƀon lan bah n’gor Kon Tum mô hôm geh Ngih dak kơl an bảo hiểm y tế geh tât rlau 49.300 nŭih lah nŭih rnoi mpôl đê̆, geh rnoh rlau 95%. Bah năp nau nê, wa Phạm Đình Thanh, đă:

            ‘Chính phủ, Thủ tướng Chính phủ ân geh rđau ăp N’gâng kan, ntŭk kan geh tât ơm kơp uănh ân tâm di nau kan gay ma năn ntrŭnh ăp nau kan ân tâm di gay lŏ geh kơl an mpeh bảo hiểm y tế ân ăp nŭih ƀon lan hôm mâp âk nau jêr tâm nau rêh mô geh nau dơi rvăt bảo hiểm y tế, gay kơl an nŭih ƀon lan, ngăn lah nŭih rnoi mpôl đê̆ geh nau dơi dŏng nau mât chăm n’hâm soan, n’huch oi mbăk jâk mpeh tơm prăk bah khân păng ndrel kŏ lah rgop nau n’hao  rnoh nŭih rnoi mpôl đê̆ râng bảo hiểm y tế, gay tâm năm 2025 geh 98% nŭih rnoi mpôl đê̆ geh rvăt bảo hiểm y tế tĭng nkô̆ nau bah nau ntrŭnh 88, Quốc hội gưl XIV hŏ nchrăp luh”.

            Rmôt kan ntoh măt Quốc hội n’gor Dak Lak ân lah, nau rgâl nkra Luật ƀư tăch dŏng bảo hiểm lah nau khlay gay mât nau dơi ndrel nau tâm di pháp luật bah rmôt kan, nŭih rvăt dŏng, ntrŭt dăng nau kan tăch dŏng bảo hiểm,  rgop nau ntrŭt dăng ndrel mât nau hun hao nâp nâl bah jâng văng sa rêh jêng, đăp mpăn nau rêh ƀon lan, n’hao nau tam tâm nau mât ngih dak đah nau dŏng tăch bảo hiểm. Yơn lah, âk nau kan tăch dŏng bảo hiểm ân geh nau ntrŭnh ngăn, kloh lơn. Nau ngăn lah, mpeh nau dŏng bảo hiểm: ăp nau ntrŭnh bah nau nchră kơt lah nkêng mpeh nau mât nau dơi bah ntŭk tăch lah nau tơm, kơt tâm khoản 1, Điều 14 geh mbơh ăp ding geh nau nchrăp mpeh nkô̆ dŏng, ngăn lah nkô̆ nau aơ hôm geh nau mô tâm di. Wa Lê Thị Thanh Xuân, Groi rmôt kan ntoh măt Quốc hội n’gor Dak Lak, đă:

            ‘Âk ngăn ăp nau dŏng geh ntŭk kan bảo hiểm nkra lor. Đah nŭih geh nau  dơi nau blau ri geh răk ndrel gĭt ăp nau nchrăp nê geh nau dơi mô lah mô dơi ueh ân nơm. Yơn đah nŭih lah nŭih rnoi mpôl đê̆, nŭih mô lăng dơi êng ri nau răk ân ăp tŏng ndrel gĭt kloh ăp nau nchâp tâm hợp đồng lah nau mô geh âk. Ndri ma ân geh nau đăp mpăn nâp đah rvăt ndrel đah tăch. Phung hên đă ân geh uănh ngăn tât hợp đồng bảo hiểm gay mhâm ƀư mpeh nau nchih, nau nchâp tâm hợp đồng ân geh kloh nơih gĭt. Ăp nŭih mô gĭt mra geh dơi. Ngăn lah tâm nau mât ân kon nŭih”.

            Kŏ tâm nar nchră, ăp ntoh măt Quốc hội n’gor Dak Lak hŏ geh ăp nau rgop geh tât: nau trong prăk hợp đồng bảo hiểm, rklaih ăp nau tâm pit mpeh bảo hiểm, nau dơi mât ngih dak đah ăp rmôt ƀư nau kan tăch dŏng bảo hiểm tâm nkuăl, ƀư n’hao nau ntĭm mbơh, nti, n’hao nau blau, nau kơp dơn ân nau kan tăch dŏng bảo hiểm gay ma mât ăp nau kan n’huch oi ăp nau phong lah./.

                                    Nŭih rblang: H’Thi