VOV4.M’nông: Pơh rlau aơ, hŏ geh rơh rƀŭn ndal bah Quốc hội gưl 15 tĭng nau ƀư trực tuyến tât 62 ntŭk ƀoh rup tâm ăp n’gor, nkuăl ƀon têh. Rơh rƀŭn gay năn uănh, ntrŭnh du đê̆ nau kan têh, khlay, ndal bah nau kan văng sa rêh jêng, tơm prăk gay ma kơl an năn ân Bôk nau kan njrăng, rdâng srê Covid-19 ndrel Bôk nau kan ndâk ndrel hun hao văng sa rêh jêng.

            Nkô̆ nau bôk năp geh ăp ntoh măt Quốc hội rgum nchră tâm rơh rƀŭn ndal bah Quốc hội gưl 15 nê lah: Uănh nchră ndâk ndrel hun hao văng sa rêh jêng. Nau ntrŭnh aơ geh nau khlay gay ma rdâng đah srê Covid-19, rklaih nau khuch, ndâk ndrel hun hao nâp nau kan văng sa rêh jêng, ndâk ntŭk ƀư nau pah kan, kơl rklaih nau rêh, kơl an ƀon lan. Aơ lah nkô̆ nau geh cử tri lam dak uănh khlay. Cử tri Nguyễn Văn Huy, tâm nkuăl ƀon têh Yên Bái, n’gor Yên Bái, mbơh nau:

            ‘Gâp rhơn ngăn rnôk geh gĭt rơh rƀŭn rơh aơ Quốc hội nchră âk nkô̆ nau khlay, ngăn lah nkô̆ nau geh tât srê Covid-19. Lah du hê cử tri nkuăl yôk, gâp saơ nau rđau tâm di, năn bah Quốc hội, Chính phủ tâm nau njrăng rdâng srê, ngăn lah nau kan ntĭm nau njrăng, rdâng srê jêng ân geh tâm ban nau dơi rdâng, nkân njrăng ân săk nâp srê Covid-19. Gâp ŭch rơh tât Quốc hội, Chính phủ geh nau kan mêt uănh ân ueh lơn tay gay ntrŭnh ăp nau ntrŭnh, bôk nau rklaih ăp nau khuch, ndâk tay nau hun hao văng sa rêh jêng, rklaih nau đăp mpăn, rêh jêng”.

            Mpeh nau kan ndal bah rơh rƀŭn aơ, Tổng thư ký, Kruanh Văn phòng Quốc hội Bùi Văn Cường mbơh: Gay dơi ndâk, hun hao văng sa rêh jêng, rơh rƀŭn ndal geh gay ma rklaih nau kan ân năn mpeh tơm prăk gay ma kơl an nrŭnh ƀư nau ndâk ndrel hun hao văng sa, rêh jêng, rklaih ăp nau nkol mpeh pháp lý ân nau ntuh kơl hun hao:

            ‘Rơh aơ ngăn lah ndal ngăn yor nơm ân geh du nau ntrŭnh geh tât nau ndâk ndrel ma hun hao văng sa. Ndri ma tơm prăk lah nau kan geh tât nau khlay ngăn gay ma ndâk hun hao văng sa. Lah dơi geh nchră luh tâm bôk năm 2022 ri ntrŭt dăng nau hun hao năm 2022-2023 ndrel lôch năm kan. nê lah nau kan khlay, ndal. Lah gay tât rơh rƀŭn khay 5 ri mbrơi ngăn 5 khay mơ geh ntrŭnh ƀư”.

             Ta rơh rƀŭn aơ, Quốc hội kŏ uănh, nchră 8 nau nchrăp luật, geh: Luật rgâl mhe, ntop tay du đê̆ điều bah Luật ntuh kơl nsum, Luật ntuh kơl tĭng nau kan êng, nsum, Luật Ntuh kơl, Luật đấu thầu, Luật Điện lực, Luật ƀư kan tăch rgâl, Luật soay dŏng ndơ ndrel Luật thi hành án dan sự. Râng nchră rơh rƀŭn aơ, rmôt kan Quốc hội bah Dak Lak tâm ban nau rgâl nkra, ntop tay du đê̆ điều bah 8 luật mra ƀư ngăn bah ăp nau ntrŭnh, ntrong kan bah Đảng ndrle năn rklaih nau jer, kol tâm nau kan ngăn. Rgop nau mpeh Luật ntuh kơl nsum, wa Y Vinh Tơr, Kruanh rmôt kan ntoh măt Quốc hội Dak Lak tâm ban mpeh 3 nkô̆ nau ân rgâl, yơn păng đă ân uănh khlay lơn tay tât nau pă nau kan, nau dơi đah ăp nau kan geh prăk ODA:

            ‘Nkô̆ nau geh tât nau tâm ton bah lam ntur neh đah ngih dak ndrel chính phủ Việt Nam đah ăp ding kí ton lah ăp dak ba dih, ăp nkô̆ nau geh tât nau ƀư nkô̆ nau aơ. Lah mô geh nchră kloh dơi ăp nau kan bah aơ n’gâng kan, ntŭk kan, nkuăl ri tâm rnôk ƀư geh ăp nau tih, ngăn lah, geh tât nau kan, nau nâp mra geh nau khuch ngăn tât nau rnơm bah Việt Nam tâm rnôk tâm rnglăp”.

            Geh tât Luật Thi hành án dân sự, wa Nguyễn ThịThu Nguyệt mbơh, Luật ân geh uănh kloh ăp nau kan ân geh ndơn:

            ‘Tâm điều 55 ri ntrŭh mpeh luật rgâl tay điều luật lah “uỷ thác thi hành án ndrel uỷ thác mpeh nau ân dơi rklaih mhal mpeh drăp ndơ”, tâm aơ kŏ ê geh kloh lĕ dơi mpeh nau rklaih mhal nau tih rnôk geh mhal dôih đah nau kan dơi geh ndơn kơl rklaih mpeh drăp ndơ êng êng mpeh moh nau? Ndri đă Chính phủ ân geh ƀư kloh lơn tay mpeh nau kan ân ndơn aơ gay ma rklaih drăp ndơ mhâm geh ân kloh”.

            Du nkô̆ nau khlay êng geh Quốc hội uănh, nchră rơh aơ lah nau ntrŭnh mpeh nau ntuh kơl Bôk nau kan  nkra trong cao tốc Bắc Nam mpeh ba dâng lvang năm 2021-2025. Kruanh Quốc hội Vương Đình Huệ lah rjăp, trong hăn lah ntrong tơm khlay bah jâng văng sa, rgop nau leo nau ƀư nau kan, ntrŭt dăng hun hao văng sa, rêh jêng, đăp mpăn neh dak, hun hao gung trong lah nau kan khlay ngăn. Tâm rnôk aơ, nau ƀư ân ơm jêh bah bôk nau kan lợn ma geh nau khlay, ntrŭt dăng nau pă tơm prăk ntuh kơl nsum, rgop nau ndâk ndrel hun hao văng sa./.

            Nŭih rblang: H’Thi