VOV4.M'nông: Tâm nar 9/11, Quốc hội hŏ tâm nchră mpeh nô nău tĭng ƀư Ngân sách Ngih dak năm 2021, trong nchrăp sŏk dŏng Ngân sách Ngih dak, trong tâm pă tơm prăk ngân sách trung ương năm 2022 n'hanh trong nchrăp prăk kaih - ngân sách Ngih dak 3 năm (2022-2024). Trong nkra gay ntrŭt ntrôl hun hao wăng sa- rêh jêng kon nuĭh, lơn lah tâm pă ngân sách trung ương năm 2022 mhâm ƀư gay dŏng geh nău tam tơm ndơ ngih dak, aơ lah nkô̆ dơi âk đại biểu dăn đă tay. Du đêt nău rgop an lah, nău tĭng ƀư ăp bôk nău kan gưl neh dak hôm dŭt mbrơi. Đại biểu tâm ban ŭch nău ndơ̆ tơm prăk 16 rbăn rmen prăk bah năm 2021 tât năm 2022 gay rgum lĕ tơm prăk ngân sách Trung ương an tĭng ƀư bôk nău kan gưl neh dak tâm năm 2022 mbra lah 24 rbăn rmen prăk. Nău dja đăp mpăn tơm ndơ dŏng an ăp nău kan gưl neh dak hŏ ndơ̆ luh, tŏng đah nău ŭch kâp geh, nău ŭch rŏng bah ƀon lan lơn lah ta ăp nkual mpeh yôk yang, nkual jêr jŏt. Ăp đại biểu uănh năl, tâm pă gưl, tâm pă nău dơi kan dăng lơn lah trong nkra tam gay tâm pă tơm prăk ngăch, năn, ntơm bah nê ơm n'gluh an tơm prăk. Aơ lah nău ŭch ndơ̆ luh tâm ntrŭt ntrôl n'gluh tơm prăk ngih dak jong dah găp, gay sŏk ntuh kơl nsum leo, ntơm trong an ntuh kơl lam rêh jêng kon nuĭh./.

Nuĭh rblang: Điểu Thân