VOV4.M'nông: Năm aơ,, nuh srê Covid-19 hŏ jêng suan mpet têh tât ndơ tuch tăm ta n'gor Dak Nông, play wai, ƀơ, sầu riêng...ăp tơm sa play ơm an nsĭt geh wăng sa 200 rkeh prăk/1ha let lơ, aƀaơ nsĭt geh hôm mô hŏ tât du n'gul, mô dơn nê hŭch roh âk. Ăp ntil bum biăp geh rmeh bưm khuch têh an nuĭh tuch tăm. Bol ma kơt nê̆, tâm suan mpet bah nuh srê, n'gâng kan tuch tăm hŏ buăt nthoi tăch geh nău tam, bôk năp hŏ bên di đah nô nău mhe n'hanh dôl dâk hao tay.

Hợp tác xã Tuch tăm si gle- dak si Thịnh Phát, bon R’But, xã Quảng Sơn, nkuâl Dak Glong, mhe rlău ăp nar khay dŭt jêr jŏt kơp ntơm bah rnôk njêng. Jêr jŏt ntơm bah khay 5 rnôk ăp ndơ tuch tăm tă bah hợp tác xã ƀư jêr tăch, jŭr thuk hô. Tât khay 7 n'hanh khay 8 rnôk ta nkual ƀon têh Hồ Chí Minh n'hanh ăp n'gor mpeh bah dâng geh kol khan, ri ndơ geh ƀư tuch tăm bah Thịnh Phát kơt lah rmeh bưm. Wa Nguyễn Thị Toản, giám đốc Hợp tác xã Thịnh Phát an gĭt, tâm nô nău nê, kruanh rđău kan UBND n'gor Dak Nông, nkuâl Dak Glong n'hanh Sở Nông nghiệp-Phát triển nông thôn n'gor hŏ ntrôl dăng buăt nthoi, mbrơi kơl hợp tác xã joi saơ trong tăch luh.

Bum biăp dơi tăch dơh soih; si lat, si klôn hao khlay âk rđĭl đah bah năp Covid-19 ntoh luh. Khlay lơn, kruanh rđău kan n'gor hŏ jŭr tât nkual tuch tăm gay mĭn uănh na nê̆, djăt nău dăn đă n'hanh kơl hợp tác xã lôch jêh rêng ƀư tuch tăm, bên di đah nô nău covid-19 krit nji tâm let năp tay:

Hợp tác xã hŏ dăn đă n'hanh Kruanh UBND n'gor hŏ tâm ban ŭch ntop kơl ƀư jay bil ndrel jâng gung ih gay ih kro bum si lat. Kơt aƀaơ, bum si lat hao khlay tay, dah si klôn dĭl, mô gĭt ntŭk ma kơp nđăp. Yor kơt nê̆ hợp tác xã dôl dăp rgum tay, djăt ma 2 nar tăm 5 sào, gay đăp mpăn bah kroh khar ndơ tăch tâm ban kơt mô geh rmeh bưm ndơ tăch đŏng. N'gor hŏ dăp rgum 1 nkual 26 ha gay hợp tác xã ƀư kơt nê̆.

Nău ntop kơl bah n'gâng kan ăp gưl n'hanh ăp n'gâng kan n'gor Dak Nông hôm dơi tĭng ƀư năn ngăch đah lĕ ma ăp đơn vị tât n'gor gay buăt nthoi tăch ndơ geh ƀư tuch tăm. Wa Nguyễn Thị Xuân Hương, mât công ty TNHH ƀư njêng n'hanh rhŏ dŏng ndơ tuch tăm Hương Cao Nguyên, n'gor Dak Lak an gĭt, tĭng nău lư buăt nthoi bah n'gor, Công ty Hương Cao Nguyên hŏ joi tât nkual tăm biăp têh hvi ta nkuâl Dak Song. Yơn lah, rnôk koh tăch di tâm rnôk nuh srê Covid-19 jêng dŭt jêr joi nuĭh kơl kan. Nê lah rnôk dôl ma khay mih ta n'gor, ntung trong, rdeng biăp luh bah ăp trong sop neh Bazan rhung mbĭr, lah ăp nău kol khan têh đŏng. Tâm rnôk dŭt jêr jŏt rdăp rduăl, doanh nghiệp hŏ tâm ôp đah Sở Nông nghiệp-phát triển nông thôn Dak Nông, n'hanh nău rôk, nklâm, rdeng hŏ dơi dăp rgum đăp mpăn. Nkual tăm biăp Dak Song hŏ dơi tăch năn ngăch:

Kơt công ty gâp ri bôk năp gâp hŏ manh du đơn vị geh tŏng ăp si ƀŭt kơp dơn gay ƀư an he nău kan koh, nklâm, yơn mô jêng âk. Lôch nê, gâp tâm ôp đah Sở Nông nghiệp Dak Nông buăt nthoi gâp đah ăp hợp tác xã n'hanh bar pe ntŭk tăm têh hvi geh nsing nơm n'hanh suan ring tam ta ăp nkuâl rgum tơm mpeh ăp ndơ gâp ŭch geh. Ri 1 khay rlău aơ, ri rnoh âk ndơ tăch 1 nar tât 100 tấn, hŏ nkra dơi dŭt âk nkô̆ nău trong tăch luh an ndơ tuch tăm.       

Đah nău ndrel kan bah n'gâng kan ăp gưl- nuĭh ƀon lan n'hanh doanh nghiệp, tuch tăm Dak Nông hŏ  bah ir tât khuch khat. Tât aƀaơ, ăp n'gor, nkual ƀon têh lam dak hŏ ntơm plơ̆ tay kơt ơm mhe, ăp trong kan tăch rgâl n'hanh dơh soih lơn, kơl tuch tăm hŭch bah rmoh rman.

Wa Phạm Tuấn Anh, giám đốc Sở Nông nghiệp Dak Nông an gĭt, gay tuch tăm bên di đah nău rêh mhe, nkre đăp mpăn tuch tăm, nkre geh nău tam njrăng n'gang nuh srê Covid-19, n'gor mbra ndrel hăn n'hao âk buăt nthoi trong tăch, yơn khlay lơn lah rdâk njêng ăp nkual tuch tăm tâm rgop, krêp jĭr tơm lăp n'hanh trong tăch luh:

Ntop kơl tuch tăm n'hanh tăch ndơ tuch tăm ri Sở nông nghiệp hŏ njêng 3 rmôt gŭ kan ta ntŭk n'hanh 1 rmôt nkra nău lư. Rnôk nuĭh tuch tăm, ăp đơn vị tăch rgâl geh ntil nău mpeh tăch rvăt, rnoh khlay mô lah mpeh nchuăn rdeng, tơm nuĭh kan ri ăp rmôt gŭ kan tâm dâng nkra, buăt nthoi đah ăp ntŭk tăch rvăt. Mpeh jŏ jong, kơt ntrŭt ntrôl ngăch buăt nthoi đah ăp ntŭk tăch têh hvi, ăp hợp tác xã n'hanh ăp ntŭk tăch rgâl, nkre njêng gay jêng ăp ntŭk tơm pă an ndơ tăch, buăt nthoi đah nkre njêng- rvăt dŏng, rdâk njêng bôk  nthoi tâm boh jŏ jong.

Nuh srê Covid-19 dôl hôm tât krit nji. Yơn đah nău nchrăp lor bên di, Dak Nông hŏ mô hôm rhĭch rhâl. Ăp ntŭk buăt nthoi tăch ndơ tuch tăm hôm dơi pơk luh tâm ban n'hanh nău kan đăp mpăn đŏng, tĭng kơn sŏk tay jâng nsan hao an n'gâng kan tuch tăm lah êng, wăng sa bah n'gor lah nsum./.

Nuĭh rblang: Điểu Thân