Ôi lơ 4 Tết Ất Tỵ, ta ăp ntŭk tăm bum ta xã Dak Ndrot, nkuăl Dak Mil, n’gor Dak Nông, nău pah kan bôk nău dŭt nđơr. Bơi tât 30 nuĭh pah kan dôl ndăn rôk bum, nău gươm ngơi dŭt n’gôr nkre ma nteh máy mok. Nô Y Đắp Kbuôr, ta buôn Trắp B, xã Cư M’gar, nkuăl Cư M’gar n’gor Đăk Lăk nkoch, nô lĕ hăn bâh ơm ôi gay ma năn rôk bum prŭm ta aơ. Wa Lại Cao Điền, tơm lo bim an gĭt, 7ha bum prŭm Nhật lĕ geh bu dăn rvăt n’hanh 2 ding lĕ tâm ton, dơn ngoăy mông nar dơn bum. Yor le geh tâm ton lor jêng di nar 4 tết, rnoh nuĭh rôk bum bâh Đăk Lăk lĕ rgum ndeh tât gay ma rôk ngăch, mât đăp mpăn mông nar ndơ̆ ndơ an nuĭh tăch.

Nar 4 Tết lah rnôk âk ƀon lan ăp n’gor Tây Nguyên hăn tŏ cà phê, sầu riêng n’hanh âk ntil tơm tăm êng. Wa Y Danh Niê, ta ƀon Knia 3, xă Ea Bar, nkuăl Buôn Đôn, n’gor Dak Lak dôl nglăp dĭng gay tŏ cà phê. Wa Y Danh an gĭt lĕ tŏ rơh bôk năp bah năp lơ 20 khay chạp. Aƀaơ jêh sa tết nkao cà phê lĕ hoănh, nkre di rơh tŏ tal 2. Tŏ cà phê jêh rnăk wâl mbra rek ba n’hanh dŭt khay 1 hăn pĕ tiêu tay. Ta nkuăl Đăk Hà, nkual têh cà phê bah n’gor Kon Tum, nar 4 Tết, nteh măy tŏ dak n’gôr ăp mir cà phê. Wa Nguyễn Văn Phượng ta thôn 4, xă Đăk Mar, nkuăl Đăk Hà an gĭt, rnăk wâl geh 1 ha cà phê tăm tay năm tal 2, wa n’hanh I ur dô̆t dĭng ndơ̆ dak nđik tât tĭng tơm cà phê. Tâm mông nar năm mhe, kônh wa mpŏng du năm tuch tăm dơh, mih lăng prăng uĕh, bôh ba tơm tăm săk geh đăp mpăn.