Ta lŏ bum prum ta xã Dak Ndrot, nkuăl Dak Mil, n’gor Dak Nông, nău pah kan dŭt gơih nđơr. Bơi tât 30 nuĭh pah kan dôl ndăn rôk bum, nău gươm nău ngơi nkre đah nteh máy mok dŭt n’gôr. Nô Y Đắp Kbuôr, ta bôn Trắp B, xã Cư Mgar, nkuăl Cư Mgar, n’gor Đăk Lăk nkoch, nô lĕ hăn bâh ơm ôi gay ma ngăch tât rôk bum prum ta aơ.

 “Gay ma ngăch rôk bum ta mir aơ, ƀon lan hên rgum hăn bâh ơm gay ma rôk ngăch. Mpôl hên dut rhơn ngăn, geh nău kan geh prăk ta bôk năm mhe”.

Tât dŭt ơm gay ma geh dơn nău kan, wa Lê Thị Lan, ta xã Ea Drơng, ta nkuăl Cư M’gar, n’gor Đăk Lăk dŭt rhơn rnôk nar bôk năp hăn kan ma geh nuĭh tơm mir an prăk bôk năm.

 “Tâm nar bôk năp hên lĕ hăn pah kan rôk bum, mpôl hên dŭt rhơn, bôk năm geh dơn prăk lì xì đŏng, ŭch tâm năm 2025 geh âk nău kan đăp mpăn lơn”.

Wa Lại Cao Điền, tơm mir bum prum an gĭt, 7ha bum prum Nhật aơ lĕ geh bu rvăt n’hanh 2 ding lĕ tâm ton, dơn ngoăy mông nar dơn bum. Yor lĕ geh tâm ton lor jêng lah nuĭh hăn rôk bum bâh Đăk Lăk lĕ rgum hăn gay ma ngăch lôch rôk, mât đăp mpăn mông nar ndơ̆ bum an bu rvăt.

  “Aƀaơ rnoh khlăy lĕ hao oi jêng lah ndăn nar duh răm, bu rvăt rĭ lĕ ŭch n’hanh tâm ron rnoh rvăt an hên bâh tâm năm đah rnoh khlăy 12 rbăn prăk/kg ta mir n’hanh lĕ nchrăp lĕ nuih kan đŏng, tâm jă hăn pah kan. Di rơh tết năm mhe yơn mô chuêl nău kan rĭ lơ 4 mpôl hên ntơm hăn rôk bum ta rnoh neh lĕ geh di rôk gay ma ndơ̆ tăch tâm di ton”.

Ăp nar aơ lah rơh ma âk nuĭh ƀon lan kan lŏ mir ta ăp n’gor Tây Nguyên hăn ta mir tŏ cà phê, sầu riêng n’hanh âk ntil tơm tăm êng. Dôl tŏ 1 ha cà phê tâm breh đah sầu riêng, wa Vũ Văn Thắng, ta nkuăl têh Ea Tling, nkuăl Cư Jut, n’gor Đăk Nông nkoch.

“Bar pe nar mhe nơh rĭ gâp gŭ ta jay pâl rlưn, ƀon lan năm aơ dŭt rhơn ngăn, geh vơt tết ueh răm đăp mpăn. Lơ 4 tết ƀon lan kan lŏ mir hên ntơm hăn tŏ cà phê, tŏ sầu riêng, dŭt ŭch geh rnoh khlay đăp mpăn kơt aơ, dŭt năm rĭ ƀon lan rhơn ngăn”.

Wa Y Danh Niê ta buôn Knia 3, xã Ea Bar, nkuăl Buôn Đôn, n’gor Đăk Lăk lĕ dôl ntrŭp ding bec gay ma tŏ cà phê. Wa Y Danh an git le geh tŏ rơh bôk năp bâh ta năp lơ 20 khay Chạp. Aƀaơ sa tết lôch rĭ kao cà phê lĕ kro đŏng, nkre di rơh tŏ tal 2. lôch tŏ cà phê rĭ rnăk vâl hên rek ba n’hanh ta dŭt khay Giêng rĭ mbra lêh tiu.

"Lôch têt hôm aƀaơ rnăk vâl hên mbra rgum tŏ dak an cà phê, tiu. Năm aơ rnăk vâl gâp ŭch mir cà phê, tiu hun hao ueh jêng, luh dang kao âk play gay ma geh âk. Hên ŭch rnoh khlay năm aơ geh đăp mpăn đong, khlay lơn gay ma nău rêh ăp rnăk vâl geh đăp mpăn lơn đah năm ba năp”.

 Lôch ăp nar rhơn vơt năm mhe, nuĭh ƀon lan ta ăp n’gor Tây Nguyên hŏ ndăn pah kan jan sa. Tâm nău ntoh n’gôr rhơn năm mhe, ƀon lan geh knơm âk ta du năm pah kan jan sa geh âk nău dơh nơih, mih lăng prăng sơh, mbo ba mbôn săk, rnoh tăch geh khlăy.

H Xíu