Rgâl nău ngơi nkoch mbơh nău mhe Tĭng N'gâng kan Công Thương Dak Lak, tâm 9 khay rlau aơ, rnoh geh tăch luh bah n'gor nchrăp geh 2.3 rmen USD, hao rlau 6% rđil rơh aơ năm e. Êng sầu riêng geh rlau 262 rkeh USD, hao rlau 61 rkeh USD rđil đah lĕ năm 2025. Ta bôk nau kan, ntŭk kan tăch rgâl nkoch nau jêr tâm nau pă rnoh mrô ntŭk tăm ndrel nau rvăt mô geh nâp nâl đah nau ŭch ƀoi tĭng tu tơm. Wa Huỳnh Văn Kiều, Giám đốc công ty Tăch ngluh đah dak bah dih ndơ tuch tăm Hoa Kiều, mbơh:  "Nuĭh ƀon lan aƀaơ hôm e mâp jêr jŏt tâm nău ƀư mã mbrô nkual tăm tâm rnôk rvăt sầu riêng đah ăp nuĭh geh mã nkual tăm n'hanh ăp nuĭh mô hŏ geh mã nkual tăm kŏ mô geh tâm pit mpeh rnoh khlay đŏng. Yor kơt nê̆ mbra mô tâm ban tâm nău tăch n'gluh, yor mã nkual tăm geh tât ntŭk tăch, tu tơm play sầu riêng".

Rlău ma wăk kol mpeh mã nkual tăm, ntŭk ntô mât prăp ndơ an nđik, mât prăp n'hanh nkret njêng ta Dak Lak hôm e đêt. Tâm rgop đah nkual tăm, hợp tác xã, ntŭk tâl dŭng n'hanh doanh nghiệp tăch n'gluh mô hŏ lhăt jăp; sầu riêng lơn âk tăch n'gluh tĭng play rêh. Gay droh rklaih jêr jŏt, đại biểu dăn đă rdâk nâp tay tâm rgop rêng kan, n'hao săk rnglăy mât uănh mã mbrô nkual tăm n'hanh mât kân uĕh kah; n'hao boăt nthoi na nê̆ đah nuĭh rvăt n'glăp gay tĭng kơn âk ntil ntŭk tăch.

 Râng bôk nău kan cà phê doanh nhân, wa Đỗ Hữu Huy, Kruanh UBND n'gor Dak Lak dăn đă ăp n'gâng kan, nău kan djăt nău dăn đă, ntop kơl doanh nghiệp hun hao n'gâng kan sầu riêng nâp nâl.  "N'gor dŭt n'hâm uănh khlay tât nkô̆ nău nkret njêng jru. Năm aơ n'gor lĕ ký mbơh ƀư ăp ntŭk nkret njêng, chợ bôk tơm ta ăp nkual công nghiệp. Tâm let năp tay an geh nău ndrel hăn bah Hiệp hội sầu riêng tâm nkô̆ nău rgum sầu riêng, nkret njêng mô lah pĕ lêh tăch n'gluh mô lah nkret njêng ăp ndơ jru lơn, yơn he kanŭng tăm lôch nĕ tăch n'gluh kơt nĕ ri mô geh rnoh khlay hao âk"./.