Lôch rlău 1 năm n’gor Đăk Lăk mbơh tơih nău mbơh mpeh nkual tăm cà phê, gay ma tâm di đah năuntrŭnh njrăng roh sêng bri bâh rmôt kan ndrel ăp dak châu âu EU, lĕ geh rlău 25 rbăn ƀon lan kan lŏ mir ta 8 nkuăl, nkuăl ƀon têh tât râng, geh Krông Năng, Cư Mgar, Buôn Đôn, Ea H Leo, Krông Ana, Cư Kuin, nkuăl têh Buôn Hồ n’hanh nkuăl ƀon têh Buôn Ma Thuột. lĕ rnoh neh lĕ geh tŏng nău mbơh n’hanh geh kơp dơn klâp ma 27 rbăn ha, rnoh geh bơi tât 90 rbăn tấn. Khay 4/2024, Simexco Đăk Lăk lah doanh nghiệp bôk năp ta lam ntur neh geh pă 2 nău kơp dơn ngăn 4C-REDR, tâm di đah nău ntrŭnh mhe bâh EU. Tĭng nău mbơh bâh wa Lê Đức Huy, Tổng giám đốc Simexco Đăk Lăk, nău ơm tâm di ăp nău mpŏng bâh EU lah du nău dơi geh bâh cà phê Đăk Lăk ta ntuk tăch rgâl.

 “Đah nău nchrăp mbra kan bâh ƀon lan kan lo mir Việt Nam tâm ban kơt ăp nău tâm rgop nâp nâl bâh Việt Nam rĭ tât aƀaơ bol ma ê hŏ geh dŏng yơn du đê̆ ntŭk vâr kĭn cà phê khân păng hôm nha ŭch rvăt đah rnoh nkhôm gay ma n’hao nuih n’hâm ăp rmôt kan ndrel aơ gay ma tâm rgop kan gay ma hun hao n’hanh mât njrăng na nê̆ lơn tĭng nău mpŏng mô geh ƀư roh bri bâh châu Âu”.

Nău ntrŭnh mô an roh bri n’hanh sêng bri- EUDR geh nău tam ta khay 1/2026. Nău ntruđnh aơ geh song dăng tât n’gâng kan cà phê- ngoăy tâm ăp ntil ndơ tăch an dak bah dih tơm, geh klâp ma 40% tât 50% lĕ rnoh tăch ndơ an dak bah dih bâh Việt Nam ta ntŭk tăch rgâl EU. Tĭng nău mbơh bâh wa trịnh Đức Minh, kruanh Hiệp hội cà phê Buôn Ma Thuột, đah Đăk Lăk, n’gor tơm mpeh tăm cà phê bâh lam dak đah rlău 200 rbăn ha, nău mbơh tơih ơm nău tâm di đah nău ntrŭnh aơ, an saơ nău ngăch ngăr bâh n’gâng kan n’gor Đăk Lăk n’hanh ăp doanh nghiệp tâm n’gâng kan, kơl an n’gâng kan cà phê, n’gâng kan tăch ndơ an dak bah dih tơm bâh n’gor n’hao nău knơm, rnoh khlăy n’hanh nău dơi ta ntŭk tăch rgâl lam ntur neh.

 “Tâm di đah nău mpŏng kan geh EUDR mbra n’hao dơi nău khlăy, geh run in ntuk tăch rgâl ta châu Âu. Tal 2 rgâl mhe rup ueh n’gâng kan cà phê Việt Nam. Nău ŭch bâh EU lah dŭt jêr ma he lĕ dơi ƀư, tăch an dak bah dih đah rnoh dŭt âk tât ntuk tăch rgâl EU rĭ rup bâh he mbra lah dŭt ueh ngăn”.

Tĭng nău mbơh bâh wa Nguyễn Hoài Dương, Giám đốc ntuk kan tuch tăm mât rong n’hanh hun hao ƀon lan n’gor Đăk Lăk, ngoăy tâm âk trong kan tơm bâh Đăk Lăk gay ma ƀư tĭng EUDR lah nău rdâk njêng du trong kan mât kơp rnoh bri n’hanh nkual tăm cà phê tŏng ăp, tâm di n’hanh kloh rjăp. Đăk Lăk dôl lah n’gor hăn bôk năp ta lam dak tâm nău ƀư tĭng nău ntrŭnh bâh EUDR n’hanh aƀaơ lĕ geh klâp ma 50% rnoh neh bri. N’gor geh nău nchrăp tât khay 1/2026, geh dŭt đê̆ 70% rnoh neh cà phê geh mbơh rnoh tu tơm. Gay ma dơi geh nkô̆ mpŏng aơ, Đăk Lăk rdâk njêng trong kan rnoh mbrô n’hanh mbơh na nê̆ tu tơm, dŏng công nghệ rnoh mbrô n’hanh uănh năl ntŭk nkual neh, ntĭm nti n’hanh tâm kơl nsum- êng...mpŏng tât rdâk njêng du rnoh tâm kơl ueh nđir, lĕ rngôch an n’gâng kan cà phê Đăk Lăk lah êng n’hanh Việt Nam lah nsum. Wa Nguyễn Hoài Dương uănh năl.

 “ N’gâng kan tuch tăm mât rong n’hanh hun hao ƀon lan mbra geh uănh năl tay nău geh ƀư tĭng luật EUDR, bâh nĕ ngluh mbơh ăp trong kan ƀư tĭng geh săk rnglăy tâm ban kơt hun hao n’gâng kan cà phê nâp nâl. Bol ma rmôt kan âk dak châu âu kan ndrel ntoch tay 1 năm tay mơ geh dŏng yơn hôm nha geh âk nău an geh ƀư, an geh nău leo kan hăn lor bôk năp, hăn bôk năp gay ma njêng nău mhe tâm nău tăch ndơ an dak bah dih cà phê tât âk ntŭk tăch rgâl châu âu”.

Đah nău leo kan lor, nsrôih geh dŏng ăp trong kan tuch tăm nâp nâl, n’hao nău tâm kơl, tâm rgop rnoh kơl kan n’hanh tâm mbơh nău tă blău kan đah rmôt kan nsum n’hanh kan êng, Đăk Lăk lĕ n’hanh dôl mpơl na nê̆ nău dơi hăn lor bôk năp tâm nău pah kan ƀư cà phê nâp nâl tĭng nău mbơh bâh EU. Aơ mô dơn lah bôk nău kan khlăy gay ma ntrôl an hun hao wăng sa ueh nđir ma hôm nha geh tâm rgop mât ueh ndơ dak si gle n’hanh ntŭk gŭ rêh, ngăn lah tâm rnôk EU mbơh tơih ăp nău ntrŭnh lam ntur neh mpeh hun hao nâp nâl. Nău dơi bâh Đăk Lăk mbra njêng nău nsrôih gay ma ăp nkual nkra ƀư cà phê êng bâh Việt Nam geh mpŏng tât nău kan tuch tăm nâp nâl.