Năm 2025 êp lôch, tết 2026 êp tât, wa Nguyễn Trí Kiên ta phường Sông Cầu, n’gor Dak Lak ndăn tâl bao choih nking rbông, srih kloh puh rao, nchrăp m’ơk ka mhe. Wa Kiên an gĭt, phŭt mrô 13 n’hanh rơh mih dak lip jêh nĕ lĕ băl 3 ntu mât, klôn rdu 28.000 mlâm ka mú sa poăch, khuch khlay nklăp 2 rmen prăk. Ndrel đah nău bât kơh-nkra ntu, wa hăn manh prăk nuĭh ƀon lan, ƀư samƀŭt manh tay prăk gay nkra njêng.

Aƀaơ gâp dôl manh bu tâl tâm bao choih, bât tay kơh, koaih an jru n’hanh nkra kơh bât nâp nâl, puh rao, an tâm ban PH jêh hôm gâp mư rwăt ntil m’ơk tay. Rnăk wâl dôl mât tay 28.000 ka mú, du n’glău 7.000 mlâm. Ta năp măt, jêh m’ơk ri hăn kan bu sŏk prăk rwăt lâk an ka sa, yor mât tât 10 khay; hôm prăk rwăt ntil ri mô tŏng, gâp manh 2-3 rhiăng rkeh prăk ta ngân hàng.

Ndrel đah nău ăp rnăk mât ka mper kơh, bơi 1.200 rnăk mât tui hùm ta Vịnh Xuân Đài, dôl rdâk tay nău kan mât ka bơi kơt lĕ geh dak lip-phŭt jŭt jăng lĕ. Nô Lê Văn Tú ta phường Sông Cầu an gĭt, phŭt mrô 13 lĕ lơh chrai âk nkĭ mât, klôn rdu dŭt âk rnoh tui hùm têh nchrăp tăch bôk khay 12 luh dak lêng, tâm nĕ rlău 70 nkĭ mô dơi joi. Jêh nĕ tay, rơh dak lip têh ƀư 26.000 tui ntil geh rhăt dak n’hah khĭt lĕ rngôch, dĭng lĕ khuch khat nklăp 4,5 rmen prăk. Rnăk wâl dôl hăn manh gay rdâk tay nkra njêng.

Rnăk wâl gâp hôm dôl rnon ngân hàng 1,2 rmen prăk yơn mhe aơ khân pơng hôm e an manh tay 200 rkeh prăk gay gâp geh prăk ntuh kơl tay, nkra nâp nkĭ mât. Rnăk wâl lĕ rwăt 4.000 tui hùm pŭt ntil gay m’ơk tâm 8 nkĭ n’hanh mât yan mhe. Rnăk wâl rĭ rgŏ jă tây prăk gay pơk hvi nkĭ mât geh prăk trok rnon.

Tĭng rnoh kơp bah N’gâng kan tuch tăm mât rong n’hanh ntŭk ntô gŭ âm n’gor Dak Lak, phŭt mrô 13 ndrel rơh dak lip têh khay 11 lĕ ƀư khuch khat hô an nkual mât rong tui ka têh bah n’gor. Êng nkual têh Sông Cầu (n’gor Phú Yên ơm), nklăp 100.000 nkĭ mât bah rlău 1.500 rnăk geh khuch djơh, kơp êng khuch khat bơi 1.900 rmen prăk. Wa Nguyễn Án Phú, Groi Giám đốc N’gâng kan Tuch tăm mât rong n’hanh Ntŭk ntô gŭ âm n’gor Dak Lak an gĭt, ƀon lan dôl ndâk njêng nău kơl ntop kơl tâm di, nta an nuĭh mât ơm ndâk nkra tay.

 Mpôl hên lĕ rgum lĕ khuch khat n’hanh dôl ndâk njêng nghị quyết mbơh ƀư Nghị định mrô 9 năm 2025 gay an ntop kơl an ăp rnăk mât tui ka geh khuch khat yor phŭt mrô 13 n’hanh dak lip. Rnoh ntop kơl lah 30 rkeh prăk an du 100m3 rnoh neh mât. Nkre, N’gâng kan ndâk ƀư ăp samƀŭt tâm ôp tâm nchră tât UBND n’gor Dak Lak ntĭm rđău ăp ngân hàng ƀư tĭng nchoang rnon, n’hŭch prăk kon n’hanh an manh tay prăk, nta an nuĭh ƀon lan ơm nkra njêng tay.

Wa Nguyễn Kim Cương, Giám đốc Ngân hàng Ngih dak nkual 11 (mât uănh ta n’gor Gia Lai n’hanh Dak Lak mhe) an gĭt, phŭt mrô 13 n’hanh rơh dak lip têh mhe rlău lĕ ƀư rlău 27.700 năch ta lam n’gor Dak Lak geh khuch khat. Tâm rnoh aơ geh hang rbăn năch pah kan tâm nău mât rong tui ka, ơm nsĭt geh prăk âk. Ƀư tĭng ntĭm rđău bah UBND n’gor Dak Lak n’hanh Ngân Hàng Ngih dak Việt Nam, Ngân hàng Ngih dak nkual 11 dôl ndăn mbơh ƀư ăp trong ntop kơl, nta an năch ơm nkra njêng tay, tăch rgâl.

Băng: Ngân hàng Ngih dak nkual 11 đă ăp rmôt kan an manh ƀư tĭng dăp rgâl tay năm rnon an năch manh prăk geh khuch khat yor phŭt-dak lip. Ƀư tĭng n’hŭch prăk kon an năch dôl manh prăk geh khuch yor mih dak lip tĭng nău đă bah Ngân hàng Ngih dak Việt Nam nklăp bah 0,5-2%/năm an njông năm n’hŭch bah 3 tât 6 khay. Jê̆ nĕ, ăp ngân hàng uănh mĭn tay an manh mhe gay năch nkra njêng tăch rgâl tay.

Đah nău nsrôih êng bah nuĭh mât rong tui ka ndrel nău hăn nsum ngăch bah n’gâng kan ƀon lan n’hanh ăp rmôt kan an manh, nkual mât rong tui ka têh bah n’gor Dak Lak dôl ntơm rêh tay jêh khuch khat. Ăp nkĭ nkân dơi nkra tay, ăp n’glău trâp ntơm bêng tui, ka lah nău răm plơ̆ tay ta muh măt nuĭh ƀon lan mper dak lêng. Nchrăp lăp năm mhe 2026, du yan mhe dôl pơk luh, djôt tay nău mpŏng kâp mpeh nău đăp mpăn, hơm răm n’hanh du yan săk rnglăy mpeh bah năp.