VOV.M'nông- Ơi kônh wa ndrel băl mpôl. Tâm Dak Lak, nar lơn ma âk nŭih ƀon lan nchrăp nau ƀư ntrơn nau tăm mât chăm ndreih, tâm pleh mô lah ndâk tăm tay. Nau sakư tam ntoh kloh ngăn tâm nau nâp kah cà phê geh rgâl, geh rvăt ma rnoh khlay lơn rđil ntŭk êng, nkre huch nau dŏng ptăk mât chăm rnơm nau dŏng ndok nja tâm nau tuch tăm.

VOV.M'nông- Tâm ăp năm mhe aơ, tuch tăm mât rong bah n’gor Lâm Đồng hŏ geh ăp nău rgâl dăng. Lâm Đồng aƀaơ dôl hao jêng ntŭk rgum kan tuch tăm công nghệ mhe bah lam dak. Nău dơi nê lah nơm geh nău ndrel hăn lhăt đah nuĭh ƀon lan, nuĭh mât bôk kan, nuĭh khoa học n’hanh ăp doanh nghiệp.

VOV.M'nông- Ơi kônh wa ƀon lan kan lŏ mir. Tâm rnôk nau ntrơn rgala mih nar lơn ma khuch ngăn tât nau kan tuch tăm, nau joi ntrong tăm ân nâp nâl jêng nau tơm ndal. Tâm Dak Lak, nau kan “Mât n’hâm soan tơm tăm rgum” tâm tơm cà phê dôl geh ƀư âk, hŏ mpơl saơ nau tam nkre n’hao prêh nau dơi, nkre mât ntŭk ntu ndrel rdâng ma nau tât bah trôk nar.

VOV.M'nông- Rnoh khlay ca cao bar năm rlơ̆ aơ đăp mpăn n’hanh mât ta rnoh khlay, âk nuĭh rnâng kan năl aơ lah rnôk gay ndơ tăch ca cao Việt Nam dâk jêng tay n’hanh hun hao dăng. Đah n’gor Dak Lak, trong dơh mpơl kloh rnôk n’gor mhe rƀah ngăch ntŭk tăch, nkre ntrôl dăng tâm ntêng lêng kan nsum n’hanh dŏng rêng mât chăm wăch jêng tay nâp dăng, tâm di đah trong rƀŏng hun hao tuch tăm mhe.

VOV.Mnông: N’gor Đăk Lăk geh rlău 214 rbăn ha cà phê, geh rlău 30% rnoh neh tăm cà phê ta lam dak. Tâm rnôk aơ, ta âk ntŭk, cà phê lĕ dŭm n’hanh ƀon lan ntơm lăp yan pĕ lêh. Yơn lah, mih n’hach jŏ jong n’hanh khuch tât bâh ăp rơh phŭt sial tâm ăp nar ba năp ƀư an nău ih pâr, mât prăp geh âk nău jêr.

VOV.M’nông - Phŭt mbrô 13 ntô̆ rlău Dak Lak lơh khuch khat rlău 2.000 rmen prăk, pe nuĭh khĭt, hang rbăn ntŭk ntô geh lơh khuch khat, trong rse điện – nhih nti geh hăch rlâm. Tâm nô nău jăch ndăn, trong ntĭt leo n’gâng kan bar gưl lor bôk năp ât rdâng đah ntul rlong trôk nar lơh têh. Bah nău ntrŭnh đă ntrơn du ngăch tât rdâk tay điện, nhih nti tâm 72 mông, Dak Lak an saơ geh nău dâk kan ăp kôp, ta năp măt n’hanh grêt dăch ƀon lan – du nău rlong uănh saơ nău dơi mât bôk kan tâm nuĭh kan mhe.

VOV.Mnông: Lah nkual  tuch tăm tơm bâh lam dak, Tây Nguyên dôl an saơ soan dăng mhe bâh ăp trong kan ntrŭt nsôr tuch tăm ueh mhe, an tâm di đah nău rgâl rnoh mbrô tâm nău pah kan jan sa, ntop n’hao ueh nău geh n’hanh nău khlăy ăp ntil tơm tăm tơm kơt cà phê, tiu, sầu riêng. Ba kơi aơ lah nău ngăn ueh ta n’gor Đăk Lăk.

VOV.M'nông- Tă geh mpŏng lah “grăp khlay ngăn tâm ăp ntil grăp”, tơm Mắc ca hŏ geh tăm âk tâm nkuăl neh Tây Nguyên ndrel Tây Bắc. Mắc ca kŏ mpơl saơ nau khlay văng sa, rgop nau n’hao nau geh dơi ân ƀon lan ndrel nkŭm n’hâm neh tăm. Yơn lah, bah kơi ăp yan geh klih play nê hôm âk nau jêr đŏng, ntơm bah kon ntil, nau rgum tât nau ê nkra ndrel ntŭk tăch. PV Quang Sáng geh nau nchih.

VOV.Mnông:Tâm rnôk nău pah kan tuch tăm geh âk nău tât bâh rgâl trôk nar mih sial, pah kan nâp nâl tĭng trong kloh ueh dôl jêng trong kan khlăy. Đah tơm cà phê, nău rgâl bâh way tăm dŏng âk dak si hóa học jêng mât uănh njrăng bu tuh ma trong kan sinh học mô dơn kơl n’hao nău khlăy ndơ geh ƀư, ma hôm nha geh mât ueh neh, rnoh dak n’hanh săk soan bâh nuĭh tăm. Ta Đăk Lăk, âk rnăk ƀon lan kan lŏ mir lĕ n’hanh dôl geh dŏng ăp trong kan kloh ueh, njêng geh ăp mir cà phê mô dŏng dak si ueh jêng.

VOV.M'nông- Nău râng ăp ntŭk pla n’hơ dak bah dih kơt IFFE mô dơn gay nkơnh n’hơ rup gui n’gor Dak Lak ma hôm pơk hvi trong tâm boh ntuh kơl, ndu ndơ geh tuch tăm ntĭt êng bah n’gor hăn lot ngai lơn ta ntŭk tăch rgâl dak bah dih.