VOV4.M’nông: Rơh rƀŭn tal 2, Quốc hội gưl 15 hŏ lôch jêh rlau 16 nar n’gul pah kan njăch ndăn, khoa học, ƀon lan ƀư tơm ndrel ƀư kan prêh. Du rơh rƀŭn rgum geh nau uănh njrăng bah âk mpưm nŭih ƀon lan, cử tri lam dak, rnôk ma Quốc hội hŏ geh nau ƀư ân ueh, mhe, blau mhe tâm rơh rƀŭn ân tâm ban đah nau rdâng đah ăp nau dơi, nau rêh. Đah âk nau kan geh nchră, Quốc hội dôl nar lơn ma ntoh nuih n’hâm nchrăp, rgâl mhe ndrel geh nau ueh bah năp ma ntrŭnh âk nau kan khlay bah neh dak.

            Rlau n’gul khay ma aơ, ăp rơh rƀŭn nchră bah Quốc hội khuh n’gôr đah ăp nau kan “duh mhe” mpeh nau njrăng rdâng srê Covid-19, nau ndâk tay bah jâng ăng sa, rêh jêng ndrel ma nau ndâk njêng, ƀư jêh nau kan. Đah nuih n’hâm “Quốc hội pah kan, nthoi nau vay ơm ŭch rgâl mhe ndrel ƀư kan” kơt tâm ăp nau ntoh bah rơh rƀŭn bah Quốc hội dôl geh nau nchrăp, rgâl mhe ndrel geh nau dơi gay nar lơn ma tŏng dơi nau ŭch, nau đă bah ƀon lan.

            Geh tâm rnôk srê Covid-19 hôm tât jêr, rgâl ma nau tâm nchră sŏng, tâm rơh rƀŭn aơ, ăp rơh rƀŭn nchră trực tuyến geh âk lơn đah nau tâm nkhah bah ntŭk gŭ kŏ mô ƀư bah nau khuh n’gôr, nau kan bah ăp ntoh măt Quốc hội tâm nar tâm nchră ta n’gor. Wa Trịnh Thị Tú Anh, rmôt kan ntoh măt tă bah n’gor Lâm Đồng mbơh:

            ‘Rơh rƀŭn aơ geh âk nau dơi. Tâm rnôk geh srê nuh hôm geh nau tât khuch jêr, phung he hŏ ƀư geh nau dơi rơh rƀŭn nâp kloh, nơm hŏ ƀư dơi rơh rƀŭn  trực tuyến kŏ geh dơi tâm âk ntrong. Tal bôk năp lah săm ƀŭt nchrăp uănh, njoăl tâm di rnôk gay ma ntoh măt râng rƀŭn. Tal bar, kơl an nau nkoch mbơh nau, trong nkoch mbơh nau đăp mpăn n’ho ro. Tal pe lah nau kan dak si gay đăp mpăn ân ntoh măt, kơl an nau ƀư geh ntrŭnh ân ueh”.

            Nau khlay ngăn tâm rơh rƀŭn aơ lah nau tâm nchră tâm rmôt ndrel ngih rƀŭn mpeh văng sa rêh jêng ndrel tơm prăk, ăp nau ntoh ngơi ndrel tâm nchră geh hăn jru, joi luh nkô̆ gay ma rklaih nau khuch bah srê Covid-19 đah n’hâm soan, nau rêh bah ƀon lan ndrel ăp nau jêr bah jâng văng sa dôl geh nau khuch ngăn bah srê ji. Tâm rnôk n’hâm bah jâng văng sa mô nâp, nau dŏng, sŏk tơm prăk ngih dak hôm mâp âk nau jêr, ntop tay, pă ntuh kơl nsum hôm ê nâp ê geh dơi rklaih ngăn, bôk nau kan ndâk tay nau kan văng sa hôm mbrơi...ri nau khlay ngăn rnôk aơ lah ndal ndâk ndrel ƀư ăp nau ntrŭnh ngăn bah Bôk nau kan ndâk, hun hao văng sa, rêh jêng đah ăp nau kan, nau kan mhe, geh tơm, geh nkô̆, geh nau dơi. Tâm rnôk jêr nê, Quốc hội hôm mât rnoh geh mpeh nau hun hao ndoh ndơ tâm dak (GDP) nklăp 6-6,5% nau nê ntoh nau nsôih ngăn bah Chính phủ, nkre đăp mpăn nau tâm ban, nau ueh tâm nau ƀư nkô̆ nau năm 2022. Yơn lah, gay dơi geh nau kơt nê kŏ ân geh nsôih âk lơn tay. Wa Phạm văn Hoà, rmôt kan ntoh măt bah n’gor Đồng Tháp, ân lah:

            ‘Nkô̆ nau GDP ntơm 6-6,5% lah nau khlay, lah nau ân geh nsôih ngăn. Ăp ntoh măt Quốc hội dôl ma rvê mpeh nkô̆ nau aơ. Yơn lah, aơ lah nkô̆ nau ân nsôih ma lah nsôih ngăn ngên bah năm. Nơm ân geh uănh năl nau rêh nsum đah srê Covid-19, plơ̆ tay nau kan rêh ueh mhe, đah nkô̆ nau aơ mra nsôih ngăn, rgum ngăn ri mơ geh nau dơi. Knŭng nơm ƀư mô nâp, mô geh rgum, mô geh tŏng nau kan, nau kơl an ri mra pơk trong ân nau dơi bah ntŭk ƀư nau kan tăch rgâl, ngăn lah ăp ntŭk ƀư kan tăch rgâl geh FDI lah ăp ntŭk ƀư nau kan geh ntrong kan. Khân păng mô hôm pah kan dơi ri gâp mĭn lan GDP ntơm 6-6,5% mra lah nau jêr geh ngăn”.

            Đah nuih n’hâm ƀon lan ƀư tơm ndrel geh nau rjăp, rơh rƀŭn tal 2 hŏ jêh bôk nau nchrăp luh. Nua ntoh ngăn bah rơh rƀŭn aơ lah nau kan ndâk njêng luật đah nau nchră 02 nau nchrăp luật, geh nau rgop bah 05 nau nchrăp luật, ntrŭnh 12 nau ntrŭnh. Nau ngăn lah, tâm rơh aơ, rơh bôk năp Quốc hội dŏng mông nar âk gay tâm nchră mpeh nau kan ƀư nau ntrŭnh, nau dŏng bảo hiểm xã hội, mât ndrel dŏng tơm prăk bảo hiểm xã hội ndrel nau ntrŭt dăng nau kan kơl an bảo hiểm xã hội ndrel ntrŭt dăng nau ƀư nau kan pháp luật mpeh bảo hiểm y tế, rƀŏng tât bảo hiểm y tế lam ƀon lan. 4 nau ntrŭnh mpeh ntrong kan, nau kơl an ân geh hun hao nkuăl ƀon têh Hải Phòng ndrel ăp n’gor Thanh hoá, Nghệ An, Thừa Thiên Huế kŏ dơi geh nchră luh đŏng. Nau kan rgâl mhe bah 4 n’gor mra lah nau ntrôl ân nau rêng lam geh nau ueh kơl an ăp nkuăl văng sa nsum bah lam dak.

            Nthoi ăp năm kan bah năp, nau kan ôp, mbơh nau lŏ geh rgâl mhe. Ăp nau kan duh bah nau rêh, ăp nau mĭn, nau ŭch bah cử tri geh leo tât ngih rƀŭn tâm rơh ôp nchră nau bôk năp bah năm kan gưl 15. Âk ntoh măt rơh bôk năp râng Quốc hội yơn ntoh nau mĭn, nau blau bah năp ăp nau kan duh dôl ma geh tât. 4 N’gâng kan geh: N’gâng kan dak si, N’gâng kan Lao động, Thương binh ndrel Xã hội, N’gâng kan ntĭm nti, N’gâng kan nchrăp kan ndrel ntuh kơl hŏ mbơh sŏng, mô der, kơp n’ăp ma ăp nau ôp jêr. Nau aơ ân saơ, nŭih dâk bôk ăp nau kan geh nau mĭn njrăng ngăn tât nau kan rđau ndrel nau rđau rlet rlau rnôk mâp nau jêr ma ê hŏ tă geh bah năp nê, ăp nhoat doh rklaih ăp nau jêr, nau ê dơi. Yơn lah, mô di ăp nau ôp kŏ leo tât nau ueh, yơn kŏ geh ăp nau dơi ƀư, uănh ndơn ăp nau kol gay ma geh ăp nau rklaih, nau rgâl năn lơn. Wa Vũ Trọng Kim, rmôt kan ntoh măt Quốc hội n’gor Nam Định, kơp dơn:

            ‘Kruanh n’gâng kan nchrăp kan ndrel ntuh kơl hŏ ơh nau mpeh ăp nau kan tơm. Yơn nau kan ma gâp ndơ̆ luh ri ê geh ơh. Gâp mĭn lah, tât aơ tă ân geh ơh nau, mô dơi ân lôch rơh rƀŭn aơ jêh ri tât rơh rƀŭn êng mô geh nau ơh nau lah mô dơi ôh. Kruanh n’gâng kan ân geh tâm rgop nsum ma ăp n’gâng kan êng, tâm nau dơi bah Chính phủ rđau đă gay ma ƀư ueh lơn nau mât mpeh neh ntu, đăp mpăn rnă njrăng neh dak tâm nau kan ma nơm geh mât”.

            Ngăn lah, nau rđau ăp rơh ôp nau bah Kruanh Quốc hội Vương Đình Huệ geh nau ueh ngăn, khoa học, rƀŏng kloh, pơk ntrong “leo ueh” gay ma pơk luh nau nkhuh n’gôr ndrel nuih n’hâm ƀư nau kan bah năp ăp nau kan têh bah neh dak. Nŭih tơm bah nau tâm nchră hŏ leo ntrong, pơk trong tât nau rklaih ân ueh ăp nau kan ma cử tri ndrel ƀon lan uănh njrăng, đă nŭih ôp ân gleh, tâm ban, tâm di ma rmôt ăp nau kan geh săch lu ôp. Nau rđau kan ân ueh mhe bah tơm rđau kan, nau ŭch rŏng bah ăp ntoh măt Quốc hội, nau ƀư kan jru bah ăp rđau kan bôk năp hŏ njêng nau ôp ueh, sŏng, tŏng nau ŭch bah cử tri. Wa Nguyễn Thị Mai Hoa, Groi Kruanh uỷ ban Văn hoá, ntĭm nti bah Quốc hội ân lah:

            ‘Kruanh Quốc hội uănh khlay ngăn nau bonh đă bah ăp ntoh măt ndơ luh ăp nau kan mô lah ăp nau ôp geh hăn sŏng tâm ăp rmôt nau kan ma Quốc hội hŏ săch luh, gay ma ndơ̆ luh ân ăp Kruanh n’gâng kan. Gâp ân lah tă bah nau blau rđau kan bah Kruanh Quốc hội hŏ lah du nau kan ueh ngăn geh tât nau dơi bah rơh rƀŭn tâm rơh aơ”.

            Lôch nar rƀŭn, du nau ntrŭnh leo khlay mpeh nau ôp ndrel ơh ăp nau ôp geh nchră luh. Quốc hội ntrŭnh ƀư bah năp lơ 1/1/2022 ân geh ntrŭnh nau kan ân ăp mpeh nau njrăng, rdâng srê Covid-19 đah ăp nau kan, nau ƀư ân ngăn, ngăn, tâm dăch ma nau kan, mô ân vĭ vĕ, kol, ndrât, Nsôih bôk năm 2022 ân ƀư jêh nkô̆ nau chuh n’gang vắc xin tâm rnoh nŭih rlau 18 năm geh 100%, kơl an chuh vắc xin ân nŭih rlau 50 năm. Năm 2022, ntop ndrel pă tơm prăk ngih dak geh 100% nau nchrăp Quốc hội jao. Kŏ rnơm nau njrăng rjăp, Quốc hội ntruch tay nar ƀư rgâl mhe bah prăk khay, nkre lŏ ƀư tĭng anu ntrŭnh mpeh tơm prăk khay gay ma têm nau dơi ƀư tơm ân geh rgâl mhe nau kan bah prăk khay tâm rnôk ân tâm di.

            Cử tri ndrel ƀon lan lam dak dôl kâp rnơm tâm nau blau ndrel nau janh kan bah Quốc hội rnôk bư ân kloh, khoa học nkô̆ nau bah ăp nau kan bah nau rêh văng sa, rêh jêng, kŏ kơt lah nau kan ƀư ân rjăp janh uănh tâm nau ê dơi mpeh nau nchrăp mbơh ndrel mât nau kan bah ăp ntŭk n’gâng kan. Yơn nau tơm ngăn ndrel prêh lơn ma ăp nŭih bu kŏ ŭch gĭt nê lah nau ton ndrel nau ƀư bah Chính phủ, kŏ kơt lah ăp nŭih kan Chính phủ tâm nau ton ƀư ân săk tam ăp nau kan nchrăp luh, gay ndŏ leo neh dak rlet rlau nau jêr, hun hao ân đăp mpăn./.

            Nŭih rblang: H’Thi