VOV4.M'nông: Măng nơh (6/8), ta nâm nău ƀư tơm bah kruanh Quốc hội Vương Đình Huệ, Ủy ban Thường vụ Quốc hội hop ndal gay râng nău rgop mpeh trong nchrăp Nghị quyết bah Chính phủ mpeh tĭng ƀư ăp trong nkra jăch ndăn njrăng, n'gang nuh srê Covid-19 tĭng Nghị quyết mbrô 30 bah Quốc hội dơi an dŏng ta Rơh hop bôk năp, Quốc hội khóa XV.

Na nê̆, an ăp Bộ Y tế, Quốc phòng, Công an, UBND ăp n'gor n'glêh an njêng ntŭk dơn mât, săm nuĭh ntưp Covid-19 nkre lah si ƀŭt an kan n'hanh dăn đă kơi ntop n'glĕ nar tam dŏng nkô̆ dja, tât lĕ năm 2022 n'hanh dơn dŏng tâm rnôk jăch ndăn njrăng, n'gang nuh srê Covid-19 tĭng trong tor lor rdâng lơh nuh srê n'hanh nău ngăn geh ta ăp n'gor dơm. Lah ta rơh hop, Kruanh Quốc hội Vương Đình Huệ mĭn lah, nău an dŏng nghị quyết dja dŭt n'hâm khlay, jăch ndăn tâm rnôk nuh srê nar lơn ma tât krit nji, jêr năl lor, ntưp rêng tât âk n'gor, nkual ƀon têh mpeh Trung ương, lơn lah ăp n'gor mpeh bah dâng./.

Nuĭh rblang: Điểu Thân