VOV4.Sêdang - Kơxo lơ 2/6, a Hà Nội, Hô̆i đong Mơgêi pri Hlá tơbeăng Tơnêi têa rôh má 15 hơnăm 2020 pơxiâm po rôh châ̆m má mơ’nui mâu hlá tơbeăng. Veăng a rôh tơ’noăng kố ai 114 tíu pêi cheăng khu râ ƀă 190 mâu ngế ki veăng kum cheăng, tiô tối kô ai 11 to pri tiô pơkâ. Ƀă 1 rơpâu 823 to ƀai ai tŭm tơdroăng ki vâ veăng tơ’noăng.

Kố cho hơnăm ki ai kơxô̆ hlá tơbleăng veăng tơ’noăng hên má môi sap nah troh nôkố. Tung 2 hâi lơ 2 ƀă lơ 3/6, Hô̆i đong châ̆m hlá tơbleăng Tơnêi têa kô rah xo sap ing 151 ƀai ki rơkê má môi vâ diâp pri. Tiô pôa Thuận Hữu, Kăn hnê ngăn Khu ki chêh hlá tơbeăng Việt Nam, ki kal dêi mâu hlá tơbeăng ki veăng tơ’noăng hơnăm kố hiăng chêh tiô tơdroăng pơkâ ki kân, tơdroăng kal kí, mơhno túa lĕm tro.

Malối, tối tơbleăng mâu tơdroăng cheăng ki kal dêi Hneăng hôp Đảng rêm râ, Hneăng hôp kân 13 dêi Đảng, hnoăng cheăng hbrâ mơdât ‘no hrê liăn ngân, mâu tơdroăng ki châ tối tiô túa ki trâu hngế, teăm tơdrêng. Hên hlá tơbeăng ai tơdroăng ki châ ‘nâi, tơbleăng tối mâu tơdroăng ki ôh tá tro, hlo tơƀrê, ai ivá tơdjâk châ kơ koan ki ai tơdjâk tơmâng, séa ngăn, pơkâ tơleăng.

Katarina Nga tơplôu ƀă tơbleăng