VOV4.Sêdang - Pôa Nay Phi La, Kăn pơkuâ Khu ngăn pơkeăng ƀă khăm pơlât Dak Lak ăm ‘nâi, troh kơxê lơ 4/6, 2 ngế ki tâ COVID-19 ai inâi kơxô̆ 3237 ƀă 3334 a kong pơlê klêi kơ’nâi séa ngăn rôh má 3 pơrá âm tĭnh ƀă virus SARS-CoV-2. Tiah mê, 2 ngế cho kơxô̆ 3237 ƀă 3334 cho 2 ngế châ ‘nâi a hâi lơ 8 ƀă lơ 9/5. Tá 2 ngế ki kố pơrá ối a hơlâ 189/1 troăng Mai Hắc Đế, bêng Tân Thành, pơlê kong kơdrâm Ƀuôn Ma Thuột. Kố cho 2 ngế ki ai tơdjâk troh ngế ki tâ pơreăng a Đà Nẵng. Péa ngế ki kố dế châ pơlât a Hngêi pơkeăng pơlât êi xôu, kơ-o lo mơheăm kong pơlê Dak Lak.

Kơpong hngêi pơkeăng pơlât mơngế tâ pơreăng COVID-19

Klêi kơ’nâi 27 hâi  pơlât, ivá 2 ngế ki kố hiăng tơniăn ƀă 3 hdroh séa ngăn achê kố pơrá âm tĭnh ƀă SARS-CoV-2.  Tiô tối hdrối, 2 ngế ki kố kô châ lo ing hngêi pơkeăng tung măng tĭng la ngiâ.

Katarina Nga tơplôu ƀă tơbleăng