VOV4.Sêdang - Sap ing khế 4 – 6/2020 troh nôkố, tơdroăng djâ mơngế lăm pêi cheăng a kong têa ê xuân cho môi tung kơvâ ki tơdjâk ó má môi xua pơreăng kân COVID 19, bu kơ’nâi kơvâ tơƀai, hngêi ăm tơmối ối pơtê, ôm hyô. Tiô Kơ koan xiâm pơkuâ mơngế pêi cheăng a kong têa ê (ối tung Khu xiâm pơkuâ cheăng pêi, mô đô̆i rong ƀă pơlê pơla), tiô tơbleăng ing mâu khu tê mơdró tối ăm ‘nâi: Tung 4 khế hiăng hluâ, tâi tâng mơngế Việt Nam lăm pêi cheăng a kong têa ê tâk vâ chê 35 rơpâu ngế pêi cheăng, châ 38,79% tiô pơkâ tung hơnăm.

Kong têa Nhuk pơtối tơdah hên ngế pêi cheăng Việt Nam má môi ƀă vâ chê 18 rơpâu 400 ngế pêi cheăng; pơtối mê cho Đài Loan (kong têa Sinuâ) lối 15 rơpâu ngế pêi cheăng, Hàn Quốc lối 280 ngế, Hungary lôí 200 ngế pêi cheăng ƀă mâu kong têa ki ê. Krê khế 4, tâi tâng kơxô̆ mơngế pêi cheăng a kong têa ê cho lối 5 rơpâu 300 ngế pêi cheăng. Tiô tối hdrối, tơdroăng djâ mơngế lăm pêi cheăng a kong têa ê pơtối trâm pá xua pơreăng COVID 19.

A Sa Ly tơplôu ƀă tơbleăng