VOV4.Sêdang - Lối 10 hơnăm pro kăn thôn, pôa A Bưn, hdroâng kuăn ngo Bơhnéa, a pơlê Kon Tum Kơpơ̆ng, bêng Thắng Lợi, pơlê kong kơdrâm Kon Tum, kong pơlê Kon Tum đi đo kơhnâ khât tung mơhnhôk vâi krâ-nhŏng o mơjiâng tơdroăng rêh ối nếo a kơpong pơlê cheăm, veăng kum ‘mâi mơnhông tơdroăng tơrŭm lâp kuăn pơlê. Pôa xuân cho ngế ki kơhnâ rơkê khât tung pêi chiâk deăng, pêi cheăng kâ.

A Blưn, thôn trương tơmiât bu ai mơ-eăm tâi ivá tơná tung pêi kâ nếo kum  tơdroăng cheăng kâ mơnhông mơdêk. Vâ pêi châ tiah mê, pôa thế đi đo hriâm, xó vế túa ki rơkê tơtro ƀă ki malối cho hơ’leh troăng tơmiât pêi kâ, ‘nâi rak ngăn loăng plâi, pêt tơvât, hơ’leh hdrê pêt tơtro tiô rơnó.

Hơnăm 2019, drêng yă kía to kơnâ, pôa khên tơnôu hơ’leh 6 sao pôm loăng mê pêt kía. Klêi 8 khế pêt, rak ngăn, rơpŏng pôa châ liăn vâ chê 200 rơtuh liăn ing tê kía drêh. Tung pơla tơkôm krí 5 ha kơphế, 3 ha loăng ‘mốu, pôa pêt tơ’nôm pôm loăng, priât ƀă báu vâ pêi lo liăn đi đo, tơniăn. Ing kơxô̆ liăn châ kơdĭng, pêi lo liăn rêm hơnăm dêi rơpŏng châ sap ing 250 – 300 rơtuh liăn. Pôa A Bưn tối: “Drêng lâi xuân thế prôk hdrối, ing pêi chiâk deăng troh kum dêi pó. Á đi đo mơhnhôk vâi krâ, nhŏng o, á thế prôk hdrối, nhŏng o vâi krâ tiô kơ’nâi vâ rak krá tơniăn rŭm môi tuăn ƀă dêi pó, kum dêi pó vâ xăm kơklêa, kơdroh kơtiê’’.

A Bưn a môi hneăng hôp tơbleăng ‘na mơngế pêi cheăng kâ rơkê

Ing um méa djâ troăng ahdrối dêi pôa A Bưn, krâ pơlê pêi cheăng kâ rơkê,  tơdroăng tơ’noăng pêi cheăng, pêi kâ a pơlê Kon Tum Kơ Pŏng thăm châ po rơdâ. Pơlê ai 365 rơpŏng, lối 1.500 pơ’leăng mâ mơngế ƀă dâng 80% vâi krâ hdroâng kuăn ngo rêh ối. Tơdroăng mơ-eăm mơnhông cheăng kâ dêi rêm rơpŏng kuăn pơlê hiăng kum pêi lo liăn rêm pơ’leăng mâ mơngế tung pơlê châ lối 27 rơtuh liăn/hơnăm.

Cheăng kâ chôa ‘lâng xông tơtêk, tơniăn, vâi krâ thăm rŭm môi tuăn, achê, kum dêi pó, tơdjuôm ivá mơjiâng tơdroăng rêh ối mơhno túa lĕm tro kơpong kuăn pơlê rêh ối.

Pôa Nguyễn Văn Hùng, Kăn hnê ngăn Vi ƀan bêng Thắng Lợi, pơlê kong kơdrâm Kon Tum, kong pơlê Kon Tum tối ăm ‘nâi tơ’nôm: “A Bưn cho kăn pơkuâ thôn Kon Tum Kơ Pơng lối 10 hơnăm kố. Hơnăm nah, kuăn pơlê xuân loi tơngah vêh rah xo pôa to pro kăn pơkuâ thôn hneăng hơnăm 2020 – 2022. Tung pơla pêi cheăng, A Bưn pêi tâi ivá tơná, mơ-eăm hên, ki rơhêng vâ tối cho  tơdroăng pơtâng tối, mơhnhôk kuăn pơlê rêh ối mơnhông mơdêk, pêi pro  tơdroăng mơjiâng pro troăng ƀê tông. A Bưn xuân cho 1 tung mâu ngế djâ troăng ahdrối vâ vâi krâ tiô ƀối.

Kơhnâ tung pêi cheăng, ƀeăn ƀĕng tung pêi kâ hiăng kum pôa A Bưn, thôn trương a pơlê kong kơdrâm Kon Tum ai hngêi trăng kân rơdâ, tơdroăng rêh ối hơniâp lĕm. Ƀă troăng tơmiât rơkê ƀă mâu tơdroăng veăng kum ăm pơlê pơla, thôn trương A Bưn cho um méa bâ eăng ‘na tơ’noăng pâ nhuô̆m tơnêi têa vâi krâ kuăn pơlê hriâm tâp, tiô ƀối.

Hlá tơbeăng Kon Tum

A Sa Ly tơplôu ƀă tơbleăng