VOV4.Sêdang - Tung pơla tơdroăng COVID-19 xông tâ tú ó a hên kong pơlê tung lâp tơnêi têa, vâ tơdroăng mơhá liăn tơniăn tŭm, teăm tơdrêng, tơniăn ăm mơngế châ kâ liăn khế hiăng pơtê cheăng xua hơnăm hiăng krâ, tŏng kum Ƀaoh hiêm pơlê pơla, Ƀaoh hiêm pơlê pơla Việt Nam pơkâ thế Kŏng ti xiâm Tíu pơtroh kơthô Việt Nam ƀă Ƀaoh hiêm pơlê pơla mâu kong pơlê, pơlê kong kơdrâm mơhá liăn khế ăm mơngế hiăng pơtê cheăng xua hơnăm hiăng krâ, tŏng kum Ƀaoh hiêm pơlê pơla khế 9 ƀă khế 10 hơnăm 2021 rơtế môi hneăng ki mơhá.

Pơtối mê, Ƀaoh hiêm pơlê pơla mâu kong pơlê mơjiâng troăng tơkŭm po mơhá liăn ăm mơngế ki châ kâ liăn ƀă liăn a ngâ tơniăn hbrâ mơdât. Tơdroăng tơkŭm po mơhá liăn, ví tơkŭm kơdrâm mơngế; tơkŭm po tơbleăng ăm mơngế ki châ ‘nâi mâu tơdroăng xiâm ki pơ’lêh ‘na troăng mơhá, hâi khế mơhá, tíu mơhá vâ pêi pro tŭm.

Kố cho roh má 4 tung hơnăm kố, Ƀaoh hiêm pơlê pơla Việt Nam hnê mơhno Ƀaoh hiêm pơlê pơla mâu kong pơlê, pơlê kong kơdrâm tơrŭm rơtế kơvâ Tíu pơtroh kơthô tơkŭm po mơhá liăn ăm mơngế pơtê cheăng xua hơnăm hiăng krâ, tŏng kum Ƀaoh hiêm pơlê pơla tung 2 khế a môi hneăng mơhá vâ tơniăn hnoăng ki pơxúa ăm mơngế châ kâ tŭm, teăm tơdrêng, tơdrêng amê veăng kum tơniăn tơdroăng hbrâ mơdât pơreăng.

A Sa Ly tơplôu ƀă tơbleăng