VOV4.Sêdang - Vâ veăng tŏng kum ƀă kuăn pơlê ki xơpá xua tơdjâk ing pơreăng kân COVID-19, Khu ngăn mâu khu mơdró kâ hơnăm ối nếo kong pơlê Dak Nông tơkŭm po “ATM phái 0 liăn” hbru ăm lối chât tâ̆n phái tê kơtê tŏng kum vâi krâ nhŏng o. ATM kố dế pơtối châ po rơdâ a mâu tơring, cheăm ki tro tơdjâk xua pơreăng COVID-19 a kong pơlê. Ƀă túa pơkâ kơbố ki lâi troh mê ăm, kơbố ki lâi xơpá mê xo “ATM phái 0 liăn” xua Khu ngăn mâu khu mơdró kâ hơnăm ối nếo kong pơlê Dak Nông tơkŭm po klêi kơ’nâi 4 hâi hiăng hbru lối 6 tâ̆n phái ăm lối 2 rơpâu ngế kuăn pơlê ki ai tơdroăng rêh ối xơpá a pơlê kong kơdrâm Gia Nghĩa.

Rêm ngế đi đo pêi tiô pơkâ hbrâ mơdât pơreăng COVID-19 drêng troh xo phái

Tiô ngoh Nguyễn Ngọc Chính, kăn hnê ngăn Khu mơdró kâ hơnăm ối nếo kong pơlê Dak Nông, pa kĭng phái a pơlê kong kơdrâm Gia Nghĩa, ATM phái 0 liăn kô tơkŭm hbru tê kơtê ăm vâi krâ nhŏng o ki xơpá a mâu tơring Dak Rlâp, Tuy Đức ƀă Dak Glong.

Katarina Nga tơplôu ƀă tơbleăng