VOV4.Sêdang - Châ tơdroăng ki ăm phep dêi Hô̆i đong Tâ phĭu Tơnêi têa, hâi lơ 4/5, Vi ƀan Tâ phĭu kong pơlê Bà Rịa-Vũng Tàu hiăng tơkŭm po rôh tâ phĭu pôk kăn Kuô̆k hô̆i hneăng má 15 ƀă kăn Hô̆i đong hnê ngăn rêm râ hơnăm 2021 – 2026 ăm kăn ƀô̆, lêng, mâu ngế pêi cheăng dêi mâu tíu pêi cheăng kring vế tơniăn mê cho khu lêng têa kơxĭ, Kan sat têa kơxĭ, khu ki rak ngăn kuăn pơlê ki tơnăng ká xi xŏng, mâu kế tơmeăm ki pong hrik têa châu têa kơxăng ƀă kuăn pơlê ki pêi cheăng, tơdroăng cheăng ton hâi a têa kơxĭ.

Tiô Vi ƀan Tâ phĭu kong pơlê Bà Rịa – Vũng Tàu, lâp kong pơlê ai dâng 3.122 ngế kuăn pơlê tâ phĭu rĕng cho kăn ƀô̆, lêng gak têa kơxĭ, kan sat têa kơxĭ, khu ki rak ngăn kuăn pơlê a têa kơxĭ ƀă mâu ngế cheăng dế pêi cheăng ton hâi a têa kơxĭ ối tung hnoăng pơkuâ dêi Việt Nam, ki ôh tá ƀĕng vêh vâ tâ phĭu tro hâi lơ 23/5 la ngiâ.

Katarina Nga tơplôu ƀă tơbleăng