VOV4.Sêdang - Maluâ trâm hên xahpá, xua pơreăng COVID-19 a hên kong pơlê, hneăng tâ phĭu rah xo kăn Kuô̆k hô̆i hneăng 15 ƀă khu kăn Hô̆i đong hnê ngăn kuăn pơlê rêm râ hneăng 2021-2026 hiăng châ ƀlêi chiâng tơniăn lĕm ƀă kơxô̆ kuăn pơlê ki lo lăm tâ phĭu ai lối 99%, ing mê, mơhno tối tơdroăng ki lĕm tro tung hiâm mơno kuăn pơlê lâp tơnêi têa ‘na hneăng tâ phĭu ki rak vế tro luât, pôu râng hnoăng cheăng ƀă ki rơkê tơtro. Ing mê, ki lâi cho ƀai mơhriâm ki tơtro dêi hneăng tâ phĭu mê? Lại Hoa, ngế chêh hlá tơbeăng cheăng tung Rơ’jíu Việt Nam ai chêh tối nhên ‘na tơdroăng kố.

Vêh ngăn hneăng tâ phĭu rah xo kăn Kuô̆k hô̆i ƀă Hô̆i đong hnê ngăn kuăn pơlê măng tĭng hdrối nah, pôa Vương Đình Huệ, Kăn xiâm hnê ngăn Hô̆i đong pôk kăn xiâm dêi tơnêi têa mơnhên tối, hneăng tâ phĭu roh kố tro luât, kơdĭng liăn ngân, tơniăn ƀă păng ‘nâng cho “Hâi ki leh kân dêi lâp kuăn pơlê”.

“Kong pơlê ki ai kơxô̆ mơngế lăm pôk ki vâ iâ hlái ai 98%. Kơxô̆ mơngế ki lăm pôk mê cho hiăng tro luât, xua pin hiăng pôk tŭm 500 ngế kăn cheăng tung Kuô̆k hô̆i. Xuân ai mâu kong pơlê, môi tiah Bắc Giang cho athế tơkŭm po tơ’nôm lối 4 rơpâu 300 kơthung phĭu ki hbrâ rơnáu vâ kum ăm kuăn pơlê ki tro thế klâ ối hơngế dêi a hngêi krê, lơ klâ ối tung mâu kơpong ki tơdjoâm”.

Tung pơla dế ai pơreăng xông tâ tú ó tiah dế nôkố, ai lối 99% pơ’leăng mâ mơngế lăm pôk, tơdroăng kố thăm rế mơnhên hiâm mơno tơrŭm dêi hdroâng kuăn ngo, thăm rế pá puât, pơloăng mơnúa thăm rế hlo ivá ki ó rơdêi dêi kuăn pơlê. Xua ti mê, ƀai mơhriâm ki apoăng ing hneăng tâ phĭu pôk kăn Kuô̆k hô̆i hneăng 15 ƀă khu kăn Hô̆i đong hnê ngăn kuăn pơlê rêm râ hneăng 2021-2026 cho ing tơdroăng ki loi tơngah, vâ môi tuăn ƀă pôu râng hnoăng cheăng dêi tơrêm ngế kuăn pơlê.

Maluâ tung roh ki ai pơreăng COVID-19 dế xông tâ tú ó tiah kố, la tơdroăng ki nếo dêi hneăng tâ phĭu pôk xo kăn mê mâu ngế ki vâ pro kăn Kuô̆k hô̆i ƀă khu kăn cheăng tung Hô̆i đong hnê ngăn kuăn pơlê rêm râ hiăng hơ’lêh túa ki mơhnhôk kuăn pơlê lăm tâ phĭu. Hdrối nah, khu kăn athế lăm troh, po hneăng hôp a pơlê cheăm, la nôkố, mâu kăn hiăng ai po roh trâm mâ ƀă kuăn pơlê, la xuân ai tơdroăng ki po roh trâm mâ tung um tiô troăng hyôh internet, hnối  kơdroh kơxô̆ mơngế lăm trâm mâ, tơpui tơno tơdrêng ƀă kuăn pơlê tâng vâ pơchông ngăn ƀă tơdroăng pơkâ hdrối.

Mâu kong pơlê, pơlê kong kân hiăng thăm mơdêk tơdroăng ki xuá kŏng ngê̆, thăm po rơdâ tơdroăng ki mơ’no tung um tơvi, rơ’jíu, hlá tơbeăng, loa ki mơ’no tối pơtâng a tơrêm pơlê cheăm. Tung tíu ki hiăng tâ tú pơreăng, 2 kong pơlê Bắc Giang ƀă Bắc Ninh ki tro tơdjâk ó dêi pơreăng la xuân hiăng ai túa cheăng ki tơtro, veăng kum kal khât ăm tơdroăng vâ khoh châ chiâng pêi pro tiô tơdroăng ki ƀlê trâng dêi hneăng tâ phĭu pôk khu kăn xiâm. Bắc Giang ai lối 4 rơpâu kơthung phĭu ki hbrâ, mê kơthung phĭu ki kal ki hên má môi tung lâp tơnêi têa, mâu tôh ki ngăn ‘na tâ phĭu pôk khu kăn hiăng “lăm tơrêm hơlâ, tơgôu péa tơrêm hngêi” vâ mâu kuăn pơlê ôh tá êa lăm troh a hngêi ki tâ phĭu la xuân chiâng vâ tâ phĭu.

Pôa Lê Ánh Dương, Kăn hnê ngăn Vi ƀan kong pơlê Bắc  Giang vêh mơnhên: Ƀai mơhriâm ki tơtro păng ‘nâng ing tơdroăng pơkuâ ngăn dêi Đảng, Tơnêi têa, Kuô̆k hô̆i cho tơdroăng ki xiâm, ki kal má môi vâ kring vế tơniăn ăm hneăng ƀlê trâng dêi hneăng tâ phĭu ki dế trâm pá, pơloăng mơnúa môi tiah hneăng tâ phĭu pơla hdrối kố nah:

 “Tơdroăng ki lo lăm tâ phĭu rah xo khu kăn ngin xuân hiăng tơmiât troh túa ki ăm kuăn pơlê ôh tá khoh prôk lăm, lơ klâ ối krê, kơtăn hơngế dêi pó tung pơlê pơla, kơpong ki mơdât prôk lăm ƀă ăm mâu kuăn pơlê ối tung hngêi kân ki klâ kơtăn pá kong. Pakĭng mâu kơthung tâ phĭu ki xiâm a tiú ăm kuăn pơlê troh tâ phĭu mê mâu ngế tung tôh ngăn ‘na tâ phĭu athế pin râng kơthung djâ troh a tíu ki kuăn pơlê ôh tá khoh châ lo pá kong ing tíu ăm klâ ối krê, vâi ki tro mơdât prôk lăm mê xuân châ tâ phĭu, pêi dêi hnoăng cheăng tơná”.

Ki vâ mơnhên tối ‘na tơdroăng ki hiăng hôp, hiăng rah xo mâu ngế vâ to pro kăn hdrối mê, kal athế tơmâng xo rơkong veăng tơpui tối dêi kuăn pơlê, vâ kơ châ rah xo tơtro, tơxâng ƀă tơdroăng rah xo mâu ngế ki ai tuăn hiâm mơno tơdrăng lĕm, pêi cheăng rơkê kơhnâ ăm hneăng tâ phĭu roh kố. Tiô pôa Ngô Sách Thực, Kăn phŏ hnê ngăn Vi ƀan Măt trâ̆n tơnêi têa Việt Nam ai tối tiah kố: Ing mâu tơdroăng ki ai tơdjâk troh mơngế to pro kăn pơrá hiăng châ tối pơtâng tơbleăng, kum ăm kuăn pơlê ki lăm tâ phĭu mê pôk tŭm 500 ngế kăn Kuô̆k hô̆i:

“Mâu ngế ki vâ lo pro kăn mê châ rah xo tiô kơ tơdroăng hiăng pơkâ dêi Luât tâ phĭu rah xo kăn, Luât tơkŭm po mơjiâng Kuô̆k hô̆i ƀă ing troăng hơlâ hnê dêi Khu xiâm hnê ngăn Đảng kơxô̆ 36, Tơdroăng pơkâ 45 dêi Khu xiâm ngăn cheăng kal kí ai tơdjâk troh tơdroăng lăm tâ phĭu. Tung mê, pakĭng 5 tơdroăng pơkâ tiô luât, môi tiah: Pơkâ ‘na mơngế ki môi tuăn ƀă Tơnêi têa, pơlê pơla, Luât xiâm; mâu tơdroăng ‘na hiâm tuăn rơkê, pêi cheăng kơhnâ, ‘na tuăn mơno, tuăn tơmiât, ivá, túa tơpui kâ, tuá pêi cheăng, tơdroăng ki hmâ achê ƀă kuăn pơlê ƀă hên hĭn mâu tơdroăng ki ê xuân hiăng mơnhên tối, mâu ngế ki vâ to pro kăn mê athế ai hiâm mơno kâi chân, khên tơpui, khêi pêi pro, djâ troăng ahdrối tung rak vế, pêi pro tiô troăng pơkâ, mơ’no cheăng dêi luât”.

Môi ƀai mơhrriâm ki kơnía châ hlo nhên ing hneăng tâ phĭu rah xo khu kăn roh kố nah, cho tơdroăng ki tơrŭm cheăng pơla Hô̆i đong ngăn ‘na tâ phĭu dêi tơnêi têa, mâu Vi ƀan ngăn ‘na tâ phĭu dêi kong pơlê,  pơlê kong kân ƀă mâu kơ koan thŏng tâ̆n, hlá tơbeăng tung plâ môi hơnăm hdrối kố nah. Mê cho tơdroăng ki vâ kring vế ki tơdrăng, tôí tơbleăng, nhên khât, tro tiô tuăn hiâm kuăn pơlê pói rơhêng vâ, tơdâng, tơ’mô tung tơrêm tơdroăng cheăng hbrâ vâ lăm tâ phĭu rah xo khu kăn.

Pơtối mơnhông mơdêk hnoăng cheăng dêi Măt trâ̆n tơnêi têa rêm râ ƀă mâu khu pơkuâ ngăn ‘na hnê tối, mơhnhôk kuăn pơlê, mê kuăn pơlê tung lâp tơnêi têa hiăng veăng châ lăm tâ phĭu, pêi pro tiô hnoăng cheăng ki tơnêi têa hiăng pơkâ hnê. Ing mê, mơjiâng chiâng ai hiâm mơno loi tơngah, phiu ro ƀă hneăng tâ phĭu, thăm mơdêk tuăn mơno, pôu râng hnoăng cheăng kal kí dêi kuăn pơlê ki veăng kum mơjiâng khu râ kăn pơkuâ tơnêi têa, khu kăn kong pơlê, pơlê kong kân, tơring, cheăm.

Pôa Buì Văn Cường, Kăn xiâm chêh tôm xo rơkong Kuô̆k hô̆i, Ngế pơkuâ Ƀơrô Kuô̆k hô̆i, Kăn Ƀơrô Hô̆i đong ngăn hneăng tâ phĭu dêi Kuô̆k hô̆i vêh mơnhên:

“Hnoăng cheăng hnê mơhno mê hiăng ai hên i hơ’lêh ki nếo ƀă pêi pro châ tơƀrê nhên khât, khu râ hnê mơhno mê hiăng hbrâ rơnáu tŭm mâu tơdroăng ahdrối. Tuá ki hnê mơhno xuân hiăng châ hbrâ rơnáu ƀă tơdroăng ki hnê mê xuân tro ‘ló tơdroăng, tro tuá ga. Tơdroăng ki mê, hiăng mơjiâng chiâng roh ki hơniâp ro, hâk tơngăm ăm kuăn pơlê ƀă kuăn pơlê tung lâp tơnêi têa. Akố, pin hlo nhên mâu kăn xiâm pơkuâ hnê ngăn Đảng Tơnêi têa drêng pêi pro dêi hnoăng cheăng tơná pơrá châ mâu kơ koan hnê mơhno teăm tơdrêng, mơhno tối ki lĕm rơkê ƀă hiâm mơno ki châ chiâng po môi hneăng tâ phĭu ƀlê chiâng”.

 Ki ƀlêi chiâng dêi hneăng tâ phĭu rah xo khu kăn Kuô̆k hô̆i hneăng 15 ƀă Khu kăn Hô̆i đong hnê ngăn kuăn pơlê rêm râ hneăng 2021-2026 hiăng ăm hlo, hiâm mơno dêi hdroâng mơngế, tơdroăng pêi cheăng kơhnâ, krâu khât, pá pêng pá kơdâm hiăng môi hiâm mơno ƀă tâi tâng khu râ kăn pơkuâ đi đo djâ troăng ki tơtro khât, bâ eăng maluâ tung pơla rêm tơdroăng dế trâm pơreăng pơrâu, pá puât. Hiâm mơno ki môi tuăn ƀă pôu râng hnoăng cheăng dêi vâ chê 70 rơtuh ngế kuăn pơlê xuân cho tơdroăng ki kal xiâm veăng kum khoh châ ƀlê chiâng dêi hneăng tâ phĭu pôk xo khu kăn ki tơtro, xua ga, “pá to lâi la chât rơpâu hdroh la ai kuăn pơlê veăng pêi pro, tơdroăng ki klâi xuân ƀlê chiâng”.

Lại Hoa - VOV1 chêh

Nhat Lisa tơplôu ƀă tơbleăng