VOV4.Sêdang - Tung pơla kố nah, kơnôm tơdroăng ki hbrâ, thăm veăng dêi mâu khu râ, mâu kơvâ ƀă khu râ kăn pơkuâ a kong pơlê, kơxô̆ hok tro, sinh viên veăng rôe ƀaoh hiêm khăm pơlât dế chôa ‘lâng tâk. Hơnăm hriâm 2020 – 2021, kơxô̆ hok tro, sinh viên veăng rôe ƀaoh hiêm khăm pơlât ai lối 18 rơtuh (tâk 1,6% tâng pơchông hơnăm hriâm 2019 – 2020), ai 3  rơtuh 500 rơpâu ngế hok tro, sinh viên hiăng veăng rôe. Tung hơnăm hriâm 2021 – 2022, kơvâ ngăn ‘na Ƀaoh hiêm pơlê pơla thế mơ-eăm tâi tâng hok tro, sinh viên veăng châ rôe ƀaoh hiêm khăm pơlât, kum rơxông la ngiâ châ rôe, châ xúa mâu tơdroăng ki tŏng kum pơlê pơla.

Mâu hơnăm achê pơla kố, kơnôm hbrâ rơnáu hdrối, mơ-eăm pro khât dêi rêm râ, kơvâ cheăng ƀă mâu kăn kong pơlê kơxô̆ mâu hok tro, sinh viên veăng rôe Ƀaoh hiêm khăm pơlât tâk hên a rêm hơnăm. Hơnăm hriâm 2020-2021, cho hơnăm ki mơhé tơdjâk xua pơreăng COVID-19 la tơdroăng tơbleăng pêi tiô pơkâ tŏng kum tê ƀaoh hiêm khăm pơlât ăm hok tro, sinh viên xuân pơtối xúa tơ-ƀrê ƀă lối 18 rơtuh ngế hok tro, sinh viên tung lâp tơnêi têa veăng rôe ƀaoh hiêm khăm pơlât.

O Nguyễn Thị Kim Hường, hok tro lâm 12 B1, hngêi trung râ má pái phôh thong Dương Đông, pơlê kong kơdrâm Phú Quốc, kong pơlê Kiên Giang ăm ‘nâi, theh ƀaoh hiêm khăm pơlât pro pơxuá hên ăm hok tro tung mâu hơnăm hriâm:

“Drêng ai theh ƀaoh hiêm khăm pơlât mê ngin tâ hmiân tuăn, malối ƀă mâu rơpŏng hngêi ki pá puât ‘na tơdroăng cheăng kâ rêh ối thăm rế hmiân tuăn tâ. Luât pơkâ tŏng kum dêi tơnêi têa pro ăm theh ƀaoh hiêm khăm pơlât, mê drêng pin pơlât châi tamo hiăng ai theh ƀao hiêm khăm pơlât pin ôh tá tô tuăn ‘na kơxô̆ liăn nâp drêng khăm pơlât a hngêi pơkeăng”.

Ƀaoh hiêm khăm pơlât hok tro, sinh viên –Hnoăng pêi ki kal tung rôe ƀaoh hiêm khăm pơlât ăm tâi tâng kuăn pơlê

Drêng ai pơreăng COVID-19 tâ tú rơ-iô, vâ ai tiô pơkâ tâi tâng kơxô̆ ngế hok tro, sinh viên veăng rôe ƀaoh hiêm khăm pơlât tung hơnăm 2021-2022, Ƀao hiêm pơlê pơla Việt Nam hiăng thế Ƀaoh hiêm pơlê pơla dêi 63 to kong pơlê, pơlê kong kân, pơlê kong kơdrâm mơdêk hnê tối ‘na troăng rơhlâ ƀaoh hiêm khăm pơlât ƀă hên tơdroăng pêi pro, tơtro; kum ahdrối ‘na liăn tŏng kum tơ’nôm kơlo nâp ƀaoh hiêm khăm pơlât ăm hok tro, sinh viên, malối mâu ngế ki kơtiê xơpá, mâu hdroâng kuăn ngo...

Pakĭng mê, pơtối tơrŭm ƀă kơvâ ngăn ‘na Hnê hriâm ƀă hnê mơjiâng tuăn ngôa rơkê hnê tối tơbleăng tơdroăng  ‘na ƀaoh hiêm khăm pơlât hok tro sinh viên, pơcháu kơxô̆ pơkâ ăm tơrêm khu xiâm ngăn hnê hriâm. Klêi tối tơbleăng tơdroăng pơkâ cho pơkâ tối ki tơ’noăng, khĕn kơdeăn dêi mâu hngêi trung. Pôa Nguyễn Hoàng Hà, Ngế pơkuâ Ƀơrô Cheăng kal kí ƀă rak ngăn sinh viên, Hngêi trung Đại học Kinh tế quốc dân ăm ‘nâi, tơdroăng hnê tối ‘na rôe xúa ƀaoh hiêm khăm pơlât hok tro, sinh viên châ hngêi trung tơkŭm pêi tơtro, mơ-eăm tâi tâng mâu sinh viên hngêi trung veăng rôe ƀaoh hiêm khăm pơlât:

“Tung măng tĭng pêi cheăng apoăng hơnăm hriâm, tá  pơla hneăng ƀă mơ’nui hơnăm, ngin xuân ai tơdroăng hnê tối nhên  ‘na pơkâ luât ăm hok tro sinh viên. Pakĭng mê, hnê tối ‘na ƀaoh hiêm khăm pơlât, tâi tâng hok tro, sinh viên veăng rôe ƀaoh hiêm khăm pơlât cho kơxô̆ ki hên, la vâ châ ai môi tiah mê xuân pá puât há. Xua mê, ƀă mâu vâi o hok tro, sinh viên ki pá puât, ôh tá rôe ƀaoh hiêm khăm pơlât mê ngin kô tăng troăng pơkâ kơdroh xơpá ăm vâi o’’.

Tiô jâ Đinh Mai Hạnh, Kăn phŏ pơkuâ chêh xo kơxô̆ liăn nâp, Ƀaoh hiêm pơlê pơla Việt Nam tối, ƀaoh hiêm khăm pơlât hok tro,  sinh viên châ hngêi rak liăn Tơnêi têa tŏng kum 30%. Mâu hok tro,  sinh viên ki xơpá, mâu kuăn ngế mơngế ai hnoăng tơnêi têa, khu ki châ tơnêi têa, pơlê pơla veăng kum, mâu hdroâng kuăn ngo... châ hbru theh ƀaoh hiêm khăm pơlât tê kơtê.

Pakĭng mê, mâu kong pơlê, tơring, cheăm ki ‘nâ ối ai tơ’nôm troăng hơlâ pơkâ tŏng kum pá xêh kum tơ’nôm ăm hok tro, sinh viên drêng veăng rôe ƀaoh hiêm khăm pơlât. Kơxô̆ liăn nâp khăm pơlât ƀă ƀaoh hiêm khăm pơlât ăm mâu hok tro, sinh viên cho xua ing liăn ‘măn kơdĭng ƀaoh hiêm khăm pơlât ‘no ăm tung mâu hơnăm achê kố tâk troh rơpâu rơtal liăn rêm hơnăm. Ôh tá iâ mâu hok tro, sinh viên châ ƀaoh hiêm ăm liăn khăm pơlât ƀă kơxô̆ liăn hên, tâk troh hrĭng rơtuh liăn.

Malối, sap apoăng hơnăm 2021 troh nôkố, mơngế ki veăng rôe ƀaoh hiêm khăm pơlât, tung mê ai lối 18 rơtuh ngế hok tro sinh viên, châ xúa hên troăng hơlâ pơkâ tŏng kum ki nếo tâ. Ki tơ-brê má môi luât pơkâ tŏng kum tung khăm pơlât ƀaoh hiêm khăm pơlât châ tơbleăng ing pơkâ tung lâp tơnêi têa sap ing hâi lơ 1/1/2021, kum mâu ngế veăng rôe ƀaoh hiêm khăm pơlât ki ôh tá tro troăng pơkâ xuân châ xúa tâi tâng kơxô̆ liăn pơlât a hngêi pơkeăng tro  tiô troăng pơkâ. Jâ Đinh Mai Hạnh, ăm ‘nâi:

“Tung pơla ai pơreăng COVID tâ tú rơ-iô, ing khế 8, ngin hiăng pơtroh hlá mơ-éa vâ hnê mơhno ăm ƀaoh hiêm pơlê pơla mâu kong pơlê, pơlê kong kân. Ƀaoh hiêm pơlê pơla mâu kong pơlê xuân dế thâ tơbleăng mâu troăng rơhlâ vâ hơnăm kố khu hok tro, sinh viên thế veăng rôe tŭm. Vâ mơ-eăm ai kơxô̆ mơngế rôe ƀaoh hiêm khăm pơlât tối tơchoâm, mê pin thế mơ-eăm mơdêk mâu khu cheăng môi tiah ƀaoh hiêm khăm pơlât hok tro, sinh viên ƀă mâu khu ngế châ liăn ngân tơnêi têa veăng tŏng kum”.

Ki pơxúa dêi tơdroăng veăng rôe ƀaoh hiêm khăm pơlât hiăng châ pơkuâ ngăn, la nôkố lâp tơnêi têa ai 3% kơxô̆ mơngế hok tro, sinh viên, tơ’mô vâ chê 600 rơpâu ngế hâi ti rôe. Tơdroăng kố pro mâu khu tung vâi hdrêng vâ pêi pro tro tiô pơkâ tâi tâng mâu hok tro, sinh viên thế veăng rôe ƀaoh hiêm khăm pơlât, pro tơ’lêi hlâu kum mâu vâi o châ mơnhông mơdêk tâi tâng tá tuăn ngôa ƀă mơdêk mo lĕm châ, kal ai veăng tơmâng khât dêi Khu cheăng kal kí ing xiâm tơnêi têa troh mâu kong pơlê. Malối hnoăng cheăng pêi dêi mâu hngêi trung, thái cô tung tơdroăng mơhnhôk hok tro sinh viên, xuân môi tiah mâu nôu pâ dêi vâi o ki veăng rôe ƀaoh hiêm khăm pơlât hok tro, sinh viên, veăng mơdêk ki tơ-ƀrê tung rak ngăn ivá ăm mâu rơxông tung la ngiâ.

VOV1

Gương tơplôu ƀă tơbleăng