VOV4.Sedang - Hâi lơ 27/5, pôa Nguyễn Thế Mạnh, Kăn xiâm pơkuâ Ƀaoh hiêm pơlê pơla Việt Nam teăng mâ tâi tâng kăn ƀô̆, mơngế pêi cheăng kơvâ Ƀaoh hiêm pơlê pơla Việt Nam diâp ăm 2 rơtal liăn tŏng kum hbrâ mơdât COVID 19 ing Vi ƀan Măt trâ̆n Tơnêi têa Việt Nam. Kố cho kơxô̆ liăn veăng tơlo dêi tâi tâng kăn ƀô̆, kông chưk kơvâ Ƀaoh hiêm pơlê pơla Việt Nam.

Ƀaoh hiêm pơlê pơla Việt Nam diâp 2 rơtal liăn tŏng kum hbrâ mơdât COVID 19

Drêng pơreăng COVID 19 xông tâ tú ó, ton xŏn, pakĭng tơdroăng tơniăn pêi pro tŭm hnoăng ăm mơngế veăng rôe Ƀaoh hiêm pơlê pơla, Ƀaoh hiêm khăm pơlât, Ƀaoh hiêm ôh tá ai cheăng pêi, Ƀaoh hiêm pơlê pơla Việt Nam đi đo séa ngăn tơdroăng hbrâ mơdât COVID 19 vâ teăm tơdrêng ai mâu pơkâ vâ pro tơ’lêi hlâu tŏng kum ăm mơngế veăng rôe tung tơdroăng châ pơxúa troăng hơlâ Ƀaoh hiêm pơlê pơla, Ƀaoh hiêm khăm pơlât, Ƀaoh hiêm ôh tá ai cheăng pêi.

Drêng pơreăng COVID 19 roh má 4 xông tâ tú, Ƀaoh hiêm pơlê pơla Việt Nam hiăng teăm tơdrêng hnê mơhno Ƀaoh hiêm pơlê pơla mâu kong pơlê hbrâ ƀă mâu tíu cheăng ki tơdjâk tơniăn tơtro má môi hnoăng khăm pơlât ăm mâu ngế rôe Ƀaoh hiêm khăm pơlât.

A Sa Ly tơplôu ƀă tơbleăng