VOV4.Sêdang - A kơpong tíu tơkăng kong tơring Ea Súp, kong pơlê Dak Lak, thươ̆ng ŭi Hoàng Ngọc Linh, ngế ki pơkuâ Ƀơrô khăm pơlât dêi khu lêng ƀă kuăn pơlê ối tung Đông mố đô̆i gak tơkăng kong Ia Rvê (Mố đô̆i gak tơkăng kong, kong pơlê Dak Lak) tá hiâm mơmo khăm, pơlât ƀă hbru pơkeăng ăm kuăn pơlê môi tiah mâu nhŏng o rơpŏng hngêi dêi tơná. Tuấn Long, ngế chêh hlá tơbeăng cheăng tung Rơ’jiu Việt Nam a kơpong Tây Nguyên ai chêh ‘na ngế ƀok thái pơkeăng krâ tơlŏng ngiât kố

Kot mâ ƀă xông kân a pơlê xiâm ai khôi túa cheăng kăch măng Nghệ An, ngế rơtăm Hoàng Ngọc Linh kot mâ hơnăm 1982, klêi kơ’nâi mơgêi  râ má pái phôh thong, hiăng chêh xêh đơn pâ lăm pro mô đô̆i. Mơgêi 2 hơnăm pro mô đô̆i, ngoh pơtối hriâm a Hngêi trung Cao Đẳng Quân Y 2 Pơlê kong kân Hồ Chí Minh. Mơgêi châ ƀâng rơkê, ngoh châ pơtroh pêi cheăng a Mô đô̆i gâk kring tíu tơkăng kong kong pơlê Gia Lai.

Hơnăm 2018, Hoàng Ngọc Linh châ pơtroh pêi cheăng a Đông mô đô̆i gak kring tíu tơkăng kong Ia Rvê, tơring Ea Súp, kong pơlê Dak Lak pơkuâ kơ-ƀong khăm pơlât khu lêng kuăn pơlê tơrŭm, pêi pro tơdroăng khăm pơlât ivá ăm mâu kăn ƀô̆, mô đô̆i dêi đông ƀă kuăn pơlê tung cheăm.

Thươ̆ng ŭi Hoàng Ngọc Linh tối:

‘’Ki phá tơ-ê a kơpong tíu tơkăng kong ‘na rơnó mêi mê đi đo ai pơreăng tơngê lo mơheăm; ƀă rơnó tô mê châi klêa, êi troăng hiâm ƀă hía hé ƀă rêm hâi ai sap 10 – 15 ngế troh khăm pơlât ƀă pơrá châ ngin pơlât prêi. Rêm hơnăm vêh tơ’nôm mê thế lối 4 rơpâu ngế châi tamo châ pơlât teăm tơdrêng.

Mơhé kơdrâm laga tŏng kum khăm pơlât ăm kuăn pơlê mê tâi tâng nhŏng o ngin pơrá phiu ro ƀă đi đo mơ-eăm. Rơtế ƀă tơdroăng mơ-eăm tung troh khăm pơlât mê nhŏng o ối pơtâng tối kuăn pơlê pêi pro mơgrúa hngêi trăng, pêi pro tơdroăng kâ tô ôu chên ƀă hía hé tơniăn ivá châ chăn’’.

Thươ̆ng ŭi ƀok thái pơkeăng khu lêng Hoàng Ngọc Linh pâk trum pơlât ăm mâu ngế châi tamo

Pôa Vi Văn Ngút 67 hơnăm, ối a thôn 5, cheăm Ia Rvê, tơring Ea Súp tối ăm ‘nâi, thôn kơtăn tíu xiâm tơring Ea Súp troh lối 60 km, troăng prôk ‘mêi ‘mâk, ki má lối drêng mot a rơnó mêi hngê. Sap ing ai kơbong khăm pơlât khu lêng kuăn pơlê Đông mô đô̆i gâk kring tíu tơkăng kong Ia Rvê, kuăn pơlê ôh tá prôk hơngế vâ khăm pơlât ăm mâu ngế châi tamo hơnăm hiăng hên, châi tamo râ…

Xuân kơnôm ai kơbong khăm pơlât kố ƀă ƀok thái pơkeăng Hoàng Ngọc Linh mê mâu ngế tro pơreăng tơpá vâ pơlât môi tiah kơdrâi pôa Vi Văn Ngút mê nôkố hiăng chiâng prôk lăm. Pôa Vi Văn Ngút hơ’muăn:

‘’Kơdrâi á châi troăng kơxêng rêh hiăng râ ó, hngêi pơkeăng vâi tối ôh tá kâi pơlât prêi, kơdrâi á ôh tá chiâng vâ prôk lăm. Á tâng tối a kơbong pơlât khu lêng kuăn pơlê ai ƀok thái pơkeăng Linh chiâng vâ pâk trum pơlât prêi, xua mê djâ kơdrâi troh khăm pơlât. Klêi kơ’nâi pâk trum pơlât dâng 18 hâi mê kơdrâi á hiăng prêi lĕm, hiăng chiâng prôk lăm. Rơpŏng hngêi phiu ro ‘nâng’’.

Ia Rvê cho cheăm tíu tơkăng kong hơngế má môi dêi tơring Ea Súp, ƀă 6 rơpâu 800 ngế ối tung 28 hdroâng kuăn ngo nhŏng o rơtế rêh ối. Tơdroăng cheăng kâ pá puât pro tơdroăng rak ngăn ivá dêi kuăn pơlê pá puât. Tiô pôa Lê Văn Hoàng Lâm – Kăn hnê ngăn Vi ƀan cheăm Ia Rvê, mâu hơnăm hiăng hluâ, kơbong khăm pơlât khu lêng kuăn pơlê tơrŭm dêi Đông mô đô̆i gâk kring tíu tơkăng kong Ia Rvê hiăng pêi pro tơtro hnoăng cheăng khăm, pơlât ăm kuăn pơlê tung tíu tơkăng kong.

Krê thươ̆ng ŭi Hoàng Ngọc Linh hiăng châ tơdah hên tơdroăng nhuô̆m pâ dêi vâi krâ mâu hdroâng kuăn ngo.

‘’Ngoh Hoàng Ngọc Linh cho môi ngế ƀok thái pơkeăng tá hiâm mơno, mơ-eăm ƀă tơdroăng khăm pơlât ăm kuăn pơlê. Rêm roh châ vâi krâ pơkâ thế mê hmâ kơhâi lơ kơmăng lơ troăng prôk hơngế troh kum kuăn pơlê. Rơtế ƀă khăm pơlât, ngoh ối pơtâng tối kuăn pơlê mơgrúa kong prâi, pêi pro tơdroăng kâ tô ôu chên, pơtâng tối tơdroăng hbrâ mơdât pơreăng COVID 19 pro tơdroăng loi tơngah tung kuăn pơlê’’.

Kơbong khăm pơlât khu lêng kuăn pơlê dêi Đông mô đô̆i gak kring tíu tơkăng kong (737) a cheăm Ia Rvê

Ƀă mâu tơdroăng mơ-eăm tung hnoăng pêi cheăng, Thươ̆ng ŭ\i ƀok thái pơkeăng khu lêng Hoàng Ngọc Linh hiăng châ hên khu râ, kơvâ cheăng diâp ăm pri ki kơnâ. Laga ƀă ngoh, tơdroăng ki phiu ro kân má môi cho châ khu pú mô đô̆i, vâi krâ mâu hdroâng kuăn ngo nhuô̆m pâ loi tơngah, rak ngăn ivá rơtế mơjiâng kơpong tíu tơkăng kong rế hía rế kro mơdrŏng lĕm.

A Sa Ly tơplôu ƀă tơbleăng