VOV4.Sêdang - Ƀuôn Ma Thuột cho inâi ki krâ ƀă tơdroăng ƀlêi trâng Ƀuôn Ma Thuột, po troăng ăm rôh mot plâ ƀâ a rơnó hơngui 1975, pêi pro troh tơleăng lĕm tâi tâng peăng Hdroh pro tơnêi têa tơrŭm chiâng môi a hâi lơ 30/4/1975. Ƀuôn Ma Thuột xuân cho tíu xiâm dêi pơ’leăng kơphế Việt Nam, cho tơdroăng ki xiâm ăm tơdroăng cheăng kâ dêi Tây Nguyên, kơpong pơlê nếo dêi lối 40 hdroâng kuăn ngo sap ing mâu kơpong tung lâp tơnêi têa. Klêi kơ’nâi 46 hơnăm mơjiâng ƀă mơnhông tơtêk, Ƀuôn Ma Thuột rế hía rế chiâng kơphô̆ tíu xiâm kơpong Tây Nguyên, rế bâ eăng, ối nếo, rơkê plĕng, rế ai hên tơdroăng ton nah, mơhno túa lĕm tro khôi hmâ.

Ƀuôn AKŏ Dhông, bêng Tân Lợi, pơlê kong kơdrâm Ƀuôn Ma Thuột mot tung rôh tơbâ 46 hơnăm hâi tơleăng Peăng Hdroh, rế hía rế chiâng hơniâp ro tâ. ‘Na gong, rơxế ô tô chơ tơmối tot a kĭng ki xŏn. Tung dế cho hơniâp ro tâng to rơkong tơpui tối dêi kuăn mơngế, idrâp kơmăi dế pro hngêi trá khôi hmâ dêi mơngế Rơđế. Rơtế ƀă mâu ngế ki pro hngêi dế pro tơ’nôm hngêi trá ki nếo.

Pâ Jenni ăm ‘nâi: kố cho hngêi ki ai tá hngêi ƀă kơdrum vâ tơbâ ngế krâ pơlê cho Pâ H’Rin, ngế ki ai hnoăng mơjiâng ƀă pơkâ khôi túa dêi ƀuôn Akŏ Dhông.

“Tơdroăng ‘mâi mơnhông khôi túa, vêa vong vâ pơtối rak vế inâi Pâ H’Rin. Mê tơdroăng mơjiâng vâi kô lăm troh tăng hlo rơpŏng hngêi dế rak vế khôi túa lĕm tro. Kuăn pơlê kô pro tơ’lêi hlâu ăm tơná, mơngế ki ôm hyô troh lăm ngăn vâi hlo ki pơxúa dêi mơngế mê vâi kô veăng rak vế khôi túa lĕm tro”.

buôn

Ƀuôn Ma Thuột – Pơlê kong kơdrâm tiô rơxông nếo

AKŏ Dhông, tiô rơkong Rơđế cho “Kơnhŏng”, mê chiâng ai kơnhŏng têa plâ hơnăm, ai kong a peăng kơnhŏng têa ngiât lĕm 4 rơnó. Kong krâi lĕm rơtâ tá mâu hngêi trá xŏn tiô túa ton nah, rơtế ƀă khôi túa lĕm tro dêi mơngế Rơđế, pro Akŏ Dhông chiâng môi tung mâu tíu ôm hyô ki lĕm tơviah dêi Dak Lak. Akố, jâ H’Kdăp Niê hiăng mơjiâng kơpong ôm hyô Akŏ Ea, ƀă tíu kuăn pơlê ối rơpâu met karê, hên tơmeăm tê ki vâ rôe ‘măn, hên veăng pơtê ối mơjiâng pro ƀă kơlá tơmeăm kong... ƀă rĕng chiâng môi tiú ai nhâ loăng kuăn kiâ, mơhno ki lĕm tro vâ kuăn pơlê tung kong pơlê rơtế ai hên tơmối lo ing mâu kong pơlê tăng troh.

Leh tơbâ 46 hơnăm hâi lâp tơnêi têa tơrŭm môi, jâ H’Kdap Niê tơ’nôm yă hlá mơ-eá rêm veăng pơtê ối môi khu kơxop hlá mơ-eá Lịch sử Việt Nam ƀă hbrâ ăm hâi pế pơchên hmê kơchâi kâ 3 kơpong, pơ’lăng a hâi lơ 30/4 ƀă lơ 1/5. Tiô jâ H’Kdăp tŭm tơdroăng ‘măn rơnuâ rơtế ƀă tơdroăng cheăng akố xuân pêi pro tro tiô pơkâ mơhno túa lĕm tro, tuăn ngôa dêi kuăn pơlê:

“Tây Nguyên nôkố hiăng ai 47 hdroâng kuăn ngo nhŏng o, ai hên hdroâng kuăn ngo rêh ối akố la pin hâi hlê tâi. Ƀă a púi vâ tâi tâng rêm ngế akố ngăn kố cho hngêi dêi tơná, vâ ‘nâi tơdroăng ki kân, pơtê koi,‘nâi plĕng ‘na mơhno túa lĕm tro”.

Ki lĕm ối tiah chal ton nah dêi ƀuôn AKŏ Dhông

46 hơnăm mơnhông tơ-ƀrê, Ƀuôn Ma Thuột ing tơdroăng tơplâ nah hiăng chiâng kơphô̆ nếo nôkố, rơkê plĕng, hlối trâu hơngế ƀă dế mơ-eăm troh tung la ngiâ ăm tơ-ƀrê tâ. Tung la ngiâ mê ôh tá xê to mơhno tung mâu luât pơkâ tŏng kum ki hiăng pơkâ, môi tiah tối mơgêi kơxô̆ 60 hơnăm 2009 dêi khu xiâm Kal kí ‘na mơjiâng Ƀuôn Ma Thuột  chiâng kơphô̆ xiâm kơpong Tây Nguyên; tối mơgêi kơxô̆ 67 hơnăm 2019 ‘na mơnhông mơdêk, pơlê pơla Ƀuôn Ma Thuột lơ tung tuăn tơmiât ‘na troăng kân lĕm dêi Ƀuôn Ma Thuột - Nha Trang.

Pôa Vũ Văn Hưng, Kăn hnê ngăn Vi ƀan pơlê kong kơdrâm Ƀuôn Ma Thuột ăm ‘nâi, Ƀuôn Ma Thuột  chiâng  mơnhông mơdêk ƀă troăng hơlâ ki lĕm nhâ loăng, khôi túa, vêa vong - rơkê plĕng ƀă ai tơmeăm khoăng vâ mơjiâng pơlê kong kơdrâm tiô tơdroăng púi vâ. Ƀuôn Ma Thuột cho pơlê xiâm kơphế dêi lâp tơnêi têa, xuân cho inâi ki kân ‘na kơphế dêi lâp plâi tơnêi.

Mâu kăn pơlê kong kơdrâm kô pê tâi hnoăng cheăng vâ rĕng chiâng ki ai khât: 

“Tung mơgêi kơxô̆ 67 dêi khu xiâm Kal kí ai pơkâ mơjiâng Ƀuôn Ma Thuột chiâng kơphô̆ ngiât, nhâ loăng kuăn kiâ, khôi túa, vêa vong ƀă rơkê plê̆ng. A mâu tơdroăng tối mê, hiăng mơhno troăng hơlâ mơnhông Ƀuôn Ma Thuột tung la ngiâ. Pin pơtối ‘mâi hơ’leh mâu túa pro hlá mơ-eá ki kal mâu tơdroăng vâ pro ti lâi ăm tơ’lêi hlâu má môi, ăm mâu kuăn pơlê ƀă khu mơdró.

Malối cho tơdroăng tơ’lêi hlâu mê kô tơ’mot mâu tơdroăng tơkêa bro mơnhông tơ-ƀrê kơphô̆ troh ƀă Ƀuôn Ma Thuột”.

Gương tơplôu ƀă tơbleăng