VOV4.Sêdang - Tơdroăng pơkâ dêi tơnêi têa mơnhông cheăng kâ rêh ối kơpong hdroâng kuăn ngo kong ngo pơla hơnăm 2021-2030 dế tung pơla vâ klêi vâ pơtroh ăm Ngế pro xiâm hnê ngăn Chin phuh pơkâ troăng rơhlâ tŏng kum. Nôkố Vi ƀan ngăn kuăn ngo dế hbrâ mâu tơdroăng tơdjâk troh, tá mâu pơkâ, kơlo, tơdroăng pơkâ xĭng xoăng liăn vâ pêi cheăng, mâu tơdroăng hnê mơhno khu tơrŭm tơbleăng pêi. Tiah mê tơbleăng pêi tơdroăng mê a mâu kong pơlê, mê tơdroăng mơnhên ngăn hdrối ‘nôi tíu pêi pro tơdroăng mê ga ti lâi?

Tơdroăng pơkâ xiâm tơnêi têa mơnhông mơdêk cheăng kâ - rêh ối pơlê pơla kơpong hdroâng kuăn ngo ƀă kong ngo hneăng hơnăm 2021 – 2030 kô pêi pro a mâu pơlê kơpong hdroâng kuăn ngo ƀă kong ngo cho mâu cheăm, thôn ai kơxô̆ rơpŏng hdroâng kuăn ngo sap ing 15% tơngi klêng.  Cheăm pêi pro cho mâu pơlê pá puât (mê cho mâu cheăm kơpong III, thôn ki pá puât tiô tơdroăng séa ngăn, mơnhên kơpong vâi krâ hdroâng kuăn ngo ƀă kong ngo tiô tuăn ngôa rơkê ƀă tơdroăng mơnhông mơdêk rêm kong pơlê xua Vi ƀan hdroâng mơngế tơbleăng ăm pêi pro, hneăng hơnăm 2021 - 2025).

Tơdroăng vâ pêi tơnêi têa xuân pêi pro a mâu kơpong cheăng kâ – rêh pơlê pơla hrá mơnhông mơdêk; mơngế pêi cheăng rơkê iâ; hngêi trăng, troăng klông ôh tá tŭm, ki má lối cho ‘na troăng klông; tơdroăng khăm pơlât, hriâm tâp dêi kuăn pơlê ối hên tơdroăng pá puât ƀă hía hé.

Mâu cheăm, thôn nếo tối mê kô châ Tơnêi têa kơjo mơ’no liăn mơjiâng pro hngêi trăng troăng klông, tăng cheăng pêi, mơjiâng mơngế pêi cheăng ƀă mâu troăng hơlâ tơniăn tơdroăng rêh ối pơlê pơla ăm kuăn pơlê châ xúa mâu tơdroăng kal xúa rêm hâi ki xiâm, chôa ‘lâng pro pro kơtăn ƀă mâu kơpong mơnhông mơdêk. Pôa Quàng Văn Hương, kăn phŏ hnê ngăn Hô̆i đong Hdroâng mơngế dêi Kuô̆k hô̆i tối:

“Kơpong ki mê cho kơpong hiăng kơtiê, nôkố thế thăm hnê mơjiâng cheăng pêi, vâ vâi krâ chiâng pêi, mê pêi kâ nếo mơnhông. Mơdêk ki rơkê mơngế pêi cheăng tung tơdroăng pêi pro xuân ai, laga kố cho vâ Đảng, Tơnêi têa tơmâng hên tâ mê nếo, mê cho pin thế ai hên troăng pêi xuân môi tiah tiâ tối, xua bu môi roh kong mêi, lân lu, lơ pơreăng, mê kuăn pơlê lŭp tâi tâng, tiah mê, thế ai hên tơmeăm vâ kuăn pơlê hbrâ xêh, môi cho tung tăng cheăng pêi, péa thế krá tơniăn, sap ing pơlât mơnăn troh hbrâ mơdât pơreăng, kong prâi pro ôh tá tơniăn’’.

Pakĭng mê, cheăm pêi pro ối cho mâu cheăm pá puât (cheăm kơpong II): Cho mâu cheăm ai kơdrâm vâi krâ hdroâng kuăn ngo rêh ối chiâng pơlê pơla, tá hâi tŭm môi lơ mâu tơmeăm ‘na hngêi trăng, troăng klông ƀă châ xúa mâu tơdroăng kal xúa rêm hâi pơlê pơla ki xiâm. Ƀă mâu cheăm kơpong II, tơnêi têa kô tŏng kum tăng cheăng pêi, mơ’no liăn tơ’nôm hngêi trăng, troăng klông ki tá hâi tŭm, ki hên cho pêi pro mâu troăng hơlâ ƀă kuăn mơngế.

Cheăm apoăng mơnhông mơdêk (mâu cheăm kơpong I) xuân ối tung khu ki châ kum dêi tơdroăng pơkâ pêi tơnêi têa, tá mâu cheăm hiăng châ plah thôn pơlê nếo; mâu cheăm ai kơxô̆ rơpŏng kơtiê pá kơdâm 10%. Laga, ƀă mâu cheăm kơpong I, ki xiâm vâ pêi pro troăng hơlâ ƀă mơngế ối tung rơpŏng kơtiê, vâ chê kơtiê.

Tiô jâ Ma Thị Thúy, kăn phŏ pơkuâ khu kăn teăng mâ Kuô̆k hô̆i kong pơlê Tuyên Quang, tơdroăng xing xoăng kơxô̆ liăn kố kal tiô tơdroăng kal vâ nôkố dêi cheăm, kơjo mâu cheăm ki pá puât, cheăm ki pá puât hên khât vâ pro tơ’’lêi hlâu kum mâu cheăm pá puât rĕng châ ai mâu tơmeăm khoăng ki kal ‘na hngêi trăng troăng klông ƀă mâu tơmeăm khoăng ki ê vâ xông tơtêk.

Hâi lơ 8/7 pơla kố nah, pôa Trương Hòa Bình, Kăn pơkuâ Hnê mơhno Tơnêi têa Tơdroăng pơkâ pêi tơnêi têa mơnhông mơdêk cheăng kâ – rêh ối pơlê pơla kơpong vâi krâ hdroâng kuăn ngo ƀă kong ngo hneăng hơnăm 2021 – 2030 hiăng kĭ tơbleăng Tơdroăng pêi cheăng hơnăm 2021 dêi Khu hnê mơhno.

Pơtối mê, mâu kăn pêi cheăng Khu xiâm hnê mơhno ƀă mâu khu xiâm, kơ koan râ xiâm, kơ koan ối tung Chin phuh (mâu khu xiâm, kơ koan Tơnêi têa) Vi ƀan mâu kong pơlê, pơlê kong kân, pơlê kong kơdrâm ối tung tơnêi têa tiô tơdroăng cheăng, hnoăng cheăng châ pơcháu, thâ pêi pro mâu hnoăng cheăng, ki nhên: kêi đeăng Tơbleăng hriăn plĕng chiâng pêi pro Tơdroăng pơkâ pêi; séa mơnhên, tơbleăng Ngế pro xiâm hnê ngăn Chin phuh kĭ Pơkâ mơ’no Tơdroăng pơkâ pêi tiô tro pơkâ dêi luât ‘na mơ’no liăn cheăng; rah xo tŭm Khu hnê mơhno ƀă kơ koan kum cheăng Khu hnê mơhno a mâu râ tiô pơkâ dêi luât; tơkŭm po pêi pro, pơtâng tối tơbleăng troh mâu khu pú hên, ngế krê ki tơdjâk ƀă kuăn pơlê ‘na Tơdroăng pơkâ pêi ƀă mâu tơdroăng xiâm dêi Tơdroăng tơkêa bro tŭm tâi tâng; tơbleăng, pơkâ mâu troăng mơhnhôk, ai hên khu liăn pêi pro Tơdroăng pơkâ pêi, ki má lối cho kơxô̆ liăn ODA ƀă mơhnhôk xo tơ’nôm kơxô̆ liăn pơlê pơla, veăng tơlo tro luât dêi pơlê pơla vâ tơ’nôm ăm Tơdroăng pơkâ pêi ƀă hía hé.

Drêng tơkôm Ngế pro xiâm hnê ngăn Chin phuh kĭ tơdroăng pơkâ pêi, tơdroăng kal pêi nôkố dêi mâu Khu pơkuâ hdroâng mơngế a mâu kong pơlê ối tung khu ki châ kum tơdroăng tơkêa bro kal rĕng tơbleăng ăm Vi ƀan kong pơlê pơkâ Vi ƀan mâu tơring, pơlê kong kơdrâm pơtối séa mơnhên ngăn mâu ngế, pơlê ki châ tŏng kum, tiô tối hdrối tâi tâng kơxô̆ liăn pêi pro vâ tơbleăng râ ai hnoăng mơnhên kĭ tiô pơkâ.

Hoàng Thái – VOV4

A Sa Ly tơplôu ƀă tơbleăng