VOV4.Sêdang - Hâi lơ 23/3, pôa Trịnh Đình Dũng, Ngế pro xiâm phŏ hnê ngăn tơnêi têa hiăng kĭ pơkâ troăng ki ‘no liăn ăm tơdroăng tơkêa pro Kơno Liên Chiểu, pơlê kong kân Đà Nẵng, troăng prôk ki xúa tơdjuôm. Kố cho tơdroăng tơkêa khu A, ‘no liăn tơdjuôm ƀă tâi tâng kơxô̆ tiô tối hdrối cho 3.426 rơtal liăn, xua Vi ƀan hnê ngăn pơlê kong kân Đà Nẵng cho kơ koan xiâm.

Tiô pơkâ kố, Ngế pro xiâm hnê ngăn Chin phuh pơcháu ăm Vi ƀan hnê ngăn pơlê kong kân Đà Nẵng pôu râng dêi hnoăng cheăng ‘na tơdroăng ki lĕm tro ‘na tơdroăng ki kal, mâu tơdroăng tung pơkâ hriăn ngăn ki apoăng; pơkuâ chêh pro Tối tơbleăng hriăn ngăn ‘na tơdroăng tơkêa, pơtroh ăm khu ki ai hnoăng pơkuâ pơkâ ‘no liăn ăm tơdroăng kố tro tiô pơkâ dêi luât.

Tiah mê, klêi kơ’nâi 3 hơnăm pơkâ khŏm mơ-eăm pro tơdroăng tơkêa pơtroh ăm mâu ki ai hnoăng pơkuâ, troh nôkố tơdroăng tơkêa pro kơno Liên Chiểu, pơlê kong kân Đà Nẵng – Xoăng hngêi trăng troăng xúa tơdjuôm hiăng pơxiâm châ kĭ pơkâ.

Nga tơplôu ƀă tơbleăng