VOV4.Sêdang - Pôa Lê Minh Khái, Ngế pro xiâm phŏ hnê ngăn tơnêi têa nếo kĭ mâu tơdroăng pơkâ ‘na tơdroăng ki ‘no phái, hngêi ki pro ƀă ƀaih, kơmăi ‘no on tơhrik sap ing kơxô̆ phái ki ‘măn kơdĭng dêi tơnêi têa ăm mâu kong pơlê Gia Lai, Bình Phước, Sóc Trăng vâ kum kuăn pơlê ki tro tơdjâk xua pơreăng ƀă kum hnoăng cheăng hbrâ mơdât pơreăng COVID-19.

Tiah mê, Ngế pro xiâm phŏ hnê ngăn tơnêi têa pơcháu ăm Khu xiâm rak liăn ngân ‘no kum ôh tá xo liăn ƀă lối 208 tâ̆n phái sap ing phái ‘măn kơdĭng dêi tơnêi têa ăm kong pơlê Gia Lai. Klêi kơ’nâi pêi pro tâng xuân ối ai mâu tơdroăng xơpá, Vi ƀan hnê ngăn kong pơlê Gia Lai tơbleăng ăm Khu xiâm ngăn cheăng pêi mố đô̆i tro rong ƀă rêh ối pơlê pơla, Khu xiâm rak liăn ngân vâ pơtroh ăm Ngế pro xiâm hnê ngăn Chin phuh séa ngăn, pơtối tŏng kum.

Rôh kố, Ngế pro xiâm phŏ hnê ngăn tơnêi têa xuân pơcháu ăm Khu xiâm rak liăn ngân ‘no xoăng ôh tá xo liăn hngêi ki pro ƀă ƀaih, kơmăi ‘no on tơhrik sap ing kơxô̆ ki ‘măn kơdĭng dêi tơnêi têa ăm Vi ƀan hnê ngăn mâu kong pơlê Bình Phước, Sóc Trăng vâ kum hnoăng cheăng hbrâ, tơplâ mơdât pơreăng COVID-19 ƀă rêm kong pơlê châ kum 30 tơmeăm khoăng hngêi pro ƀă ƀaih, 2 khu kơmăi ‘no on tơhrik túa 30 KVA.

Katarina Nga tơplôu ƀă tơbleăng